Yantikheliyaaya Afilipo 1:1-30
1 Miiva Paulu ni Timotiyu, nikhanle ipottha ca Kristu, ninwantikhela mayamunna otheene ookhuluvelya anonvaresesa Kristu ankhala u Filipo, nkhayi ni mahumu ni arumiya owanlokoni.
2 Nluku apaapeehu ni Pwiiyeehu Yesu Kristu, awoonihereni unamaana wo wuuronyani.
3 Kinansukhuru Nluku ukati kinwuupuwelaakani.
4 Kinaatteeliya venci cinene ukati kinoolompelaakani,
5 nlattu wookavihera winyu ihapari comaana ukhuma nihuku noopacera mpaka nna va.
6 Kinaakupali wiira Nluku pacerihile miteko cowaarya nlattu waawinyu, naahala umalihera mpaka nihuku na Kristu.
7 Kihaana isariya yowuupuwela commo, kontha otheene cinyu nri wanrimani waka. Khweeliini mayamunna, nyuuva ni miiva ninooniheriya nkhayi unamaana woonironya, hataa kinatthukiyeene nuunyolo ni ukati unvarelaaka nteko nlamulo naahooleli onlaponi wiira kaakihere miteko coolalyeera ihapari comaana.
8 Kinaanukheliya venci ni nyuuva mayamunna, Nluku phikhanle saahityaaka ni kinawufentani toko Yesu Kristu cinoofentaaweni.
9 Ila phiitthu kihinhiyereraaka ulepela ukati unlompaaka, wiira nifento ninyu nincive, nkhalane ucuwelaca weekhweeli ni moopuwelelo omaana;
10 wiira ntepe uvaresesa citthu cootepa ukhalana ifayita, wiira nhittheke ni nhaakakathule akhunaninyu mpaka nihuku ninhalaawe uwa Kristu;
11 ni wiira nkhalane mihokorokho cinci cinweela wa Yesu Kristu wiira attitthimihiye ni attottopeliye Nluku.
12 Mayamunna, kimpheela ncuwele wiira khweeliini, citthu cinkiraneela cinawiiriha urwaa uhoolo ulalyeeriya ihapari comaana.
13 Phimaana, utthukeliya waka nlattu wa Kristu, uhocuweliya naatthu enci, niimakwaarta omamwene ni atthu otheene.
14 Nna vaa, mayamunna enci anhancera ukhuluvela cinene moolumo a Nluku nlattu wootthukiya waka ni anawoonihera ulipa nrima yalalyeeraka moolumo a Nluku.
15 Khweeliini, atthu akina anlalyeera ihapari ca Kristu nlattu wonttima ni upheela usinttana, masi akina ninrimaaya wotheene.
16 Ala atthu oomalelaala, anlalyeera ihapari ca Kristu ni nifento, kontha anaacuwela wiira kihothanliya wiira kaakihere ihapari comaana.
17 Masi oopaceraayo anlalyeera wiira yaasintte akhwaaya kahi ninrimaaya wotheene, masi ampheela ukiwaanela masakha ukati kitthukeliyaaka nkhattya.
18 Anhala uphwanyerani? Kontha hataa ukhalaka ninrimaaya wotheene awula mena, Kristu neera alalennyaka, iyo inaakitteeliha nrima. Akinhala uhiya utteeliya nrima,
19 kontha kinaacuwela wiira wiimaleloni waya, unhala ukhala woopoliya waka nlattu womavekelweenyu ni ukaviheriya ninnepa wa Yesu Kristu.
20 Miiva kinaakhuluvela wiira, akinhala wuulihaciya muru hataa vakaani, masi kalipaka nrima kinaahala unttottopela Kristu nenna co khampa ikhumelo yokhalayi, pooti ukhala nuukumyaaka awula ukhwa.
21 Kontha, moonelwaaka miiva: Ukhala nkumi, kinonkhalela Kristu ni ukhwa, ukhanle uphwanyera ifayita.
22 Masi kakhalanaka ukumi nanlelo, kinaahala utepa unvarela nteko Kristu; masi, akinhimya isiyani yaahalaaka uthanla.
23 Nhina nnya citthu piilinnya, akinoona yoothanla kontha kinaapheela woopoliya, wiira kakhale ni Kristu itthu itepile ukhala yomaana.
24 Masi, ikhanle itthu yomaana miiva ukhalana ukumi wiira kuukavihereni.
25 Vano, kinaakupali wiira kinaahala ukhalana ukumi ni ukhala nkhayi ni nyuuva, wiira kuulipiheni nhina mminepani ni wiira nkhalane waamini wuutteelakani nrima.
26 Naayo manannaayo, ukati unhalaaka uturuwela-tho ukhala ni nyuuva, utteeliya winyu nrima nlattu wontthara Yesu Kristu, unaahala winciva.
27 Mweetteke ni mananna* anoonihera wiira nnotthara ihapari ca Kristu, wiira hataa kiwaaka uwootolani ni hataa kikhalaka uttayi ni nyuuva, kiiwe ihapari cinyu ni kicuwele wakhala wiira nnaakhala oolipa ni moopuwelelo mamocaaru, ciicammo ni makhalelo mamocaaru, mwiikurumicaka nkhayi, waamini winyu ihapari comaana,
28 nhiwoovaka hataa vakaani awananiinyu. Iyo inthoonyera ukwanyulaciya waya, masi mphantteenyu unthoonyera wiira nnaahala woopoliya. Iyo itthwiiyo, inkhuma wa Nluku.
29 Kontha nyuuva nhaakhela iparakha nlattu wa Kristu, kahi paahi nlattu woomwaamini, masi ciicammo, woohuva winyu nlattu wawawe.
30 Phimaana, nyuuva mayamunna nnawaanana masakha mamocaaru ankooneenyu kaananaka, ni khampa nnocuweleenyu wiira nanlelo kinawaanana.
Notas
^ Awula: Nkhalane makhalelo
