Ena enn lespes kourpa ki viv dan lamer ki apel Patella vulgata. Li ena enn koki ek bann ledan ki vremem bien solid. Sa bann ledan-la fer avek enn mineral bien dir ki apel goethite, ek zot antoure avek enn proteinn.

 Reflesi lor la: Pou ki kourpa-la kapav manze, li ena bann ti ledan lor so lalang. Sak ledan fer mwins ki enn milimet, ek zot koumadir enn larap. Sak ledan bizin bien solid ek bien dir pou ki kourpa-la grat ek manz bann gomon ki lor bann ros.

 Bann siantis inn servi enn mikroskop bien pwisan pou gete ki kantite sa bann ledan-la for. Zot inn dekouver ki ledan sa kourpa-la boukou pli for ki bann lezot kitsoz natirel ki zot inn teste, li mem pli for ki difil enn zarenie. Enn parmi sa bann siantis-la ti dir: “Nou bizin etidie plis lor ledan sa kourpa-la pou invant bann nouvo kitsoz.”

 Bann siantis panse ki zot kapav baz zot lor ledan sa kourpa-la pou invant bann materyo pou aranz bann loto, bato, avion, ek fer bann fosdan ki bien solid.

 Ki ou panse? Kan ou get ledan sa kourpa-la, ki ou pou dir? Li’nn aparet par limem ouswa eski inn kree sa?