Enn gro zwazo marin, ki apel Fou de Bassan, kapav plonz dan losean bien vit. Li kapav al ziska enn vites 190 km/h. Kan zwazo-la tap ar delo, linpak ki sa prodir kapav depas 20 fwa lafors gravite. Kouma sa bann zwazo-la reisi sirviv ek kontign plonze dan enn fason extraordiner koumsa?

 Reflesi lor la: Avan ki zwazo-la rant dan delo, li avoy so lezel par deryer pou fer li fer form enn fles, ki permet li plonz pli vit. Avan li plonze, ena enn membrane ki kouver so lizie pou protez li, ek bann organn ki pre ar so likou ek so lestoma gonfle parey kouma bann airbag pou amorti sa sok-la.

 Kan zwazo-la rant dan delo, so labek, so latet ek so likou vinn dan form enn konn. Sa permet ki presion delo-la pa tap zis lor enn sel misk me lor tou misk ki ena dan so likou. Apre sa, so lizie readapte limem pou ki zwazo-la trouve anba delo.

 Ziska ki profonder zwazo-la kapav plonze? Gras-a vites ki zwazo-la plonz dan delo, li kapav al ziska 11 met profonder. Me, li kapav al ankor plis dan fon kan li bat so lezel ki deza pliye ek kan li bat so lapat ki koumadir bann palmes. An realite, bann plonzer inn deza trouv sa bann zwazo-la plonz ziska 25 met profonder dan losean. Kan li fini plonze, san fer okenn zefor, zwazo-la remont lao ek li kapav re-anvole.

 Get kouma bann Fou de Bassan pe plonze

 Bann siantis inn invant bann robo ki resanble sa zwazo-la pou kapav rod ek sap bann dimounn dan lamer. Sa bann robo-la ti sipoze anvole, plonz dan delo, ek re-anvole apre. Me selman, kan ti pe fer bann test, plizir fwa enn robo ladan ti kase akoz sa sok ki li ti gagne kan li tap ar delo la. Bann siantis inn rekonet ki zot robo “pa ase bon pou kapav plonze kouma sa zwazo-la.”

 Ki ou panse? Kan ou get kapasite ki sa zwazo marin la ena, ki ou pou dir? Li’nn aparet par limem ouswa eski inn kree sa?