Labib dir ki Bondie anvi ki bann dimounn “rezet limoralite sexiel.” (1 Tesalonisien 4:3) Kan Labib servi lexpresion “limoralite sexiel,” li fer referans ar ladilter, bann relasion sexiel ant de dimounn mem sex, ek bann relasion ant enn zom ek enn fam ki pa marye ansam.

•  Eski li inportan pou Bondie ki de dimounn ki viv ansam zot marye?

•  Eski de dimounn kapav viv ansam avan ki zot marye, pou gete si zot adapte ar zot kamarad?

•  Kouma enn misie ek so madam kapav fer zot maryaz vinn pli for?

•   Se Bondie ki’nn kree maryaz. Li ti fer sa kan Li ti ini premie koup imin. (Zenez 2:22-24) Li pa ti prevwar ki enn zom ek enn fam zis viv ansam, me ki zot marye, ek res fidel ar sakenn so kamarad.

•   Bondie kone ki pli bon pou bann dimounn. Bondie inn prevwar ki enn misie ek enn madam ki marye, res ansam pou touletan. Lerla, zot tou dan lafami pou gagn bann bienfe ek sa pou protez zot osi. Anou pran enn lexanp. Kan nou aste enn meb, nou gagn bann instriksion ki ed nou pou mont li bien. Dan mem fason, bann instriksion ki Bondie donn nou, ede pou ki nou fami ere. Bann dimounn touletan gagn bann bienfe kan zot swiv bann prinsip Bondie.​—Izai 48:17, 18.

•   Bann dimounn ki gagn bann relasion sexiel san ki zot marye kapav gagn bann problem. Par exanp, zot kapav gagn bann maladi sexiel, bann panse negatif, ouswa madam-la kapav tom ansint alor ki li pa ti anvi.

•   Bondie inn donn bann zom ek bann fam kapasite pou gagn zanfan gras-a bann relasion sexiel. Lavi ena boukou valer pou Bondie, ek kapasite pou gagn bann zanfan se enn extra zoli kado. Bondie anvi ki zis bann dimounn ki marye ansam gagn bann relasion sexiel. Kan nou obeir Bondie, nou montre Li ki sa kado-la ena boukou valer pou nou.​—Ebre 13:4, Nouvo Testaman Dan Kreol Morisien, NTKM.

 Pou ki enn maryaz reisi, li pa neseser ki de dimounn esey viv ansam pandan enn sertin letan. Okontrer, bann lien ant de konzwin vinn pli for kan zot determine pou res ansam ek kan zot fer tou pou sirmont bann problem ansam. a Bann dimounn ki marye ena plis tandans pou res ansam parski zot inn fer enn promes ar zot kamarad.​—Matie 19:6, NTKM.

 Pena okenn maryaz ki parfe. Me parkont, enn misie ek so madam kapav ere ek fer zot maryaz vinn pli solid, kan zot swiv bann konsey ki ena dan Labib. Anou get de-trwa konsey:

•   Pans nou konzwin avan ki nou pans noumem.​—1 Korintien 7:3-5, NTKM; Filipien 2:3, 4, NTKM.

•   Kontign ogmant lamour ek respe ki nou ena pou nou konzwin.​—Efezien 5:25, 33, NTKM.

•   Aprann pou kontrol seki nou dir.​—Proverb 12:18.

•   Ena pasians ek pa tarde pou pardone.​—Kolosien 3:13, 14, NTKM.