Enn fwa ki bann zanfan vinn adilt, se zot ki ena responsabilite pou okip zot bann paran aze. Labib dir ki bann zanfan bizin ‘met anpratik zot lafwa anver zot fami e rann zot paran seki zot dwa parski sa pou fer plezir Bondie.’ (1 Timote 5:4, Nouvo Testaman Dan Kreol Morisien, NTKM) Kan bann zanfan fer sir ki zot pe pran swin zot bann paran, zot pe obeir komannman ki Labib done pou onor zot paran.​—Efezien 6:2, 3, NTKM.

 Labib pa donn bann instriksion presi lor kouma pou pran swin bann paran ki pe vinn vie. Selman, Labib koz lor bann misie ek bann madam ki ti fer sa. Li donn osi bann konsey pratik pou pran swin bann paran aze.

•  Dan lepok Biblik, kouma sertin manb lafami ti pran swin bann paran aze?

•  Ki bann konsey pratik ena dan Labib, ki kapav ed bann ki pran swin zot paran aze?

•  Eski Labib dir ki bizin pran swin bann paran aze dan zot prop lakaz ouswa dan lakaz zot zanfan?

 Zot ti fer sa dan diferan fason ek dapre zot sitiasion.

•   Zozef ti viv lwin ar so papa Zakob, ki ti pe vinn vie. Kan Zozef ti kapav, li ti fer Zakob vinn res pli pre ar li. Li ti rod enn lakaz pou li, li ti donn li manze ek li ti protez so papa.​—Zenez 45:9-11; 47:11, 12.

•   Rit ti al viv dan pei so belmer ek li ti travay bien dir pou pran li swin.​—Rit 1:16; 2:2, 17, 18, 23.

•   Zezi, ki ti pre pou mor, ti swazir enn kikenn pou okip so mama ki ti enn vev.​—Zan 19:26, 27. a

 Parfwa, bann ki okip zot bann paran aze, kapav santi zot bien fatige lor plan fizik ek emosionel. Me bann prinsip ki ena dan Labib kapav ed zot.

•   Onor ou bann paran.

   Ki Labib dir: “Onor to papa ek to mama.”​—Exod 20:12.

   Kouma pou aplik sa prinsip-la? Otan ki posib, montre ki ou onor ou bann paran kan ou les zot ena kontrol lor zot prop lavi ek les zot pran zot prop desizion. Ou montre osi ki ou onor zot kan ou fer seki ou kapav pou ed zot.

•   Konpran ek pardone.

   Ki Labib dir: “Lintelizans enn zom anpes li pou ankoler vit, ek se enn loner pou li pou pas lor bann erer.”​—Proverb 19:11.

   Kouma pou aplik sa prinsip-la? Si enn paran aze dir bann kitsoz ki bles nou ouswa ki li pena rekonesans pou seki nou fer, nou kapav demann noumem, ‘Kouma mo ti pou santi mwa si mo pa ti kapav fer seki mo anvi akoz mo bann limit?’ Kan ou esey montre ki ou konpran ou bann paran ek ki ou pardone, ou kapav evit fer enn sitiasion vinn pli pir.

•   Rod konsey ar lezot.

   Ki Labib dir: “Bann plan pa reisi kan pena okenn dialog, me zot reisi kan ena enn kantite konseye.”​—Proverb 15:22.

   Kouma pou aplik sa prinsip-la? Fer bann resers lor bann problem lasante ki ou paran ena ek gete ki kapav fer pou sa problem-la. Gete ki bann led ou kapav gagne dan ou landrwa pou pran zot swin. Koz avek bann ki finn deza pran swin zot bann paran aze. Si ou ena bann frer ek ser, fer enn renion fami pou kone kouma pou okip ou paran ek kouma pou partaz travay-la.

•   Rekonet ou bann limit.

   Ki Labib dir: “Lasazes li avek bann dimounn modes.”​—Proverb 11:2.

   Kouma pou aplik sa prinsip-la? Rekonet ki ou ena bann limit. Par exanp, nou tou nou letan ek nou lenerzi zot limite. Sa bann limit-la pou fer ou realize ki ou pa kapav fer tou pou ou paran. Si ou santi ou deborde pou okip ou paran ki aze, pa ezite pou demann led lezot manb ou fami ouswa bann profesionel.

•   Pran oumem swin.

   Ki Labib dir: “Personn pa air so prop lekor, me li nouri li e donn li boukou latansion.”​—Efezien 5:29, NTKM.

   Kouma pou aplik sa prinsip-la? Mem si ou ena responsabilite pou okip ou paran, ou bizin osi pran oumem swin ek si ou marye, pran swin ou fami. Ou bizin bien manze, repoze ek bien dormi. (Ekleziast 4:6) Otan ki posib, ou bizin fer bann poz. Kan ou fer sa bann kitsoz-la, ou pou santi ou pli bien lor plan emosionel, mantal ek fizik pou okip ou bann paran.

 Dan Labib, pena okenn lalwa ki dir si bizin pran swin bann paran aze dan zot prop lakaz ouswa dan lakaz zot zanfan. Sertin fami swazir pou gard zot paran aze kot zot tanki li posib. Lezot panse ki li pli bon pou met zot dan enn home kot pou pran zot swin. Kitfwa fami-la pou desid ansam ki pli bon pou zot tou.​—Galat 6:4, 5, NTKM.