Kisannla Ouswa Ki Ete “Alfa ek Omega”?
Seki Labib dir
Lexpresion “Alfa ek Omega” dezign Zeova, ki Tou-Pwisan. Sa lexpresion-la aparet trwa fwa dan Labib.—Revelasion 1:8; 21:6; 22:13. a
Kifer Bondie apel Limem “Alfa ek Omega”?
Alfa ek omega se premie ek dernie let dan alfabet Grek, lang ki ti servi pou ekrir enn parti Labib ki apel Nouvo Testaman, parmi ena liv Revelasion. Pozision sa bann let-la dan alfabet Grek finn servi pou montre ki Zeova tousel Li koumansman ek lafin. (Revelasion 21:6) Li ti Bondie Tou-Pwisan dan lepase, ek Li pou kontigne res Bondie Tou-Pwisan pou touletan. Li tousel ki “depi touletan ek pou touletan.”—Psom 90:2.
Kisannla “premie ek dernie”?
Labib aplik sa expresion-la ar Zeova ek so Garson, Zezi toulede, me avek diferan sinifikasion. Anou examinn de lexanp.
Dan Izai 44:6, Zeova dir: “Momem premie ek momem dernie. Pena lot Bondie apart mwa.” Isi, Zeova montre dan enn fason bien kler ki Limem vre Bondie ek Li eternel. Apart Li, pena okenn lezot bondie. (Deteronom 4:35, 39) Alor, dan sa ka-la, lexpresion “premie ek dernie” ena mem sinifikasion ki “Alfa ek Omega.”
Nou trouv osi lexpresion “Premie [pro’tos, pa alfa] ek Dernie [e’skha·tos, pa omega]” dan Revelasion 1:17, 18 ek 2:8. Kontex sa bann verse-la koz lor enn kikenn ki ti bizin mor ek plitar resisite. Alor, sa bann verse-la pa pe koz lor Bondie parski zame Li’nn mor. (Abakuk 1:12) Parkont, Zezi inn mor ek inn resisite. (Zistwar Bann Apot 3:13-15) Li ti premie dimounn ki ti resisite antan ki enn lespri imortel ek al viv dan lesiel, kot li ete aster “pou leternite.” (Revelasion 1:18; Kolosien 1:18) Aster, se Zezi ki pou resisit bann dimounn. (Zan 6:40, 44) Alor, limem dernie dimounn ki’nn resisite par Zeova direkteman. (Zistwar Bann Apot 10:40) Dan sa sans-la, nou kapav apel Zezi “Premie ek Dernie.”
Eski Revelasion 22:13 montre ki Zezi li “Alfa ek Omega”?
Non. Nou pa kapav bien idantifie sa kikenn ki pe koze dan Revelasion 22:13 akoz ena plizir dimounn ki pe koze dan sa sapit-la. Lor sa parti dan Revelasion la, Profeser William Barclay ti ekrir: “Bann kitsoz pa finn ekrir neseserman an-ord; . . . ek bien souvan li difisil pou kone kisannla ki pe koze.” (The Revelation of John, Volim 2, Edision Revize, paz 223) Alor, kan servi lexpresion “Alfa ek Omega” dan Revelasion 22:13, sirman sa dezign sa Kikenn ar ki sa tit-la aplike lezot plas dan Revelasion—setadir Zeova.
a Li aparet enn katriem fwa dan Revelasion 1:11 dan Labib King James Version. Me selman, bann tradiksion modern pa servi sa term-la dan Revelasion 1:11 parski pena li dan pli vie maniskri an lang Grek, ek sirman finn azout sa plitar dan bann kopi Lekritir.
Ena Osi
REPONS POU BANN KESTION BIBLIK
Kisannla Zeova Ete?
Eski Li Bondie pou zis enn pep, kouma par exanp bann Izraelit?
ESSENTIAL BIBLE TEACHINGS
Eski Bondie Ena enn Nom?
Bondie ena plizir tit, kouma Tou-Pwisan, Kreater, ek Segner. Me inn servi nom personel Bondie inpe plis ki 7,000 fwa dan Labib.
REPONS POU BANN KESTION BIBLIK
Komie Nom Bondie Ena?
Bann dimounn kapav panse ki bann nom Bondie se ‘Allah,’ ‘El Shadday,’ ‘Zeova-Zire,’ ouswa ‘Alfa ek Omega.’ Kifer li inportan ki nou kone kouma Bondie apele?
