L’Organisation des Nations unies (ONU) ti dir ki:

•   Depi le 7 ziska le 23 Oktob 2023, finn ena plis ki 6,400 dimounn ki finn perdi lavi ek 15,200 dimounn ki finn blese dan lager ant Gaza ek Izrael. Ek mazorite sa bann viktim-la ti bann sivil. Anplis, plizir milye dimounn inn bizin sove ek kit zot lakaz.

•   Depi le 23 Septam 2023, finn ena 9,701 sivil ki finn perdi lavi ek 17,748 dimounn ki finn blese dan lager ant Larisi ek Likrenn.

 Ki lespwar Labib donn bann ki pe soufer akoz lager?

 Labib dir ki Bondie pou “fer bann lager arete partou lor later.” (Psom 46:9) Li pou servi enn gouvernman ki dan lesiel, ouswa rwayom, pou ranplas tou bann gouvernman imin. (Daniel 2:44) Rwayom Bondie pou amenn enn soulazman pou limanite.

 Gete seki Zezi Kris, Lerwa dan Rwayom Bondie, pou fer:

•   “Li pou sap sa dimounn mizer ki kriye o-sekour la, ek osi sa dimounn ki dan gran sagrin la, ek ninport kisann-la ki pena personn pou ed li. Li pou ena pitie pou bann ti-dimounn ek pou bann pov, ek li pou sap lavi bann pov. Li pou delivre zot ar bann ki pe fer dominer ar zot ek li pou tir zot dan violans.”​—Psom 72:12-14.

 Bondie pou servi so Rwayom pou tir net lamizer ek soufrans ki finn ena akoz bann lager ek violans.

•   “Li pou souy tou larm dan zot lizie, ek lamor pou nepli existe, pou nepli ena ni dey, ni plore, ni douler. Bann kitsoz ki ti ena avan finn disparet.”​—Revelasion 21:4.

 Biento Rwayom Bondie pou amenn bann sanzman lor later. Labib ti predir ki ti pou ena “bann lager” ek ki nou ti pou tann “bann nouvel lor bann lager.” Se seki pe arive azordi. (Matie 24:6) Sa bann lager-la ek bann lezot levennman ankor, montre ki nou pe viv “bann dernie zour” kot bann zom pe domine.​—2 Timote 3:1.