Mo ti ne dan enn ti lavil, pa lwin ar frontier l’Allemagne dan Pologne. Pre kot mo ti reste ti ena bann laferm ek bann lafore ek mo lavi ti trankil. Mo bann paran ti bien kontan mwa ek ti ankouraz mwa pou vinn enn bon dimounn, pou travay bien lekol, ek pou fer enn gran karyer.

Se kan mo’nn al etidie lalwa dan enn liniversite dan Wrocław ki mo’nn koumans gagn problem. Mo ti lwin avek mo bann paran ek mo’nn koumans frekant bann kamarad ki ti ena enn move linflians lor mwa. Mo ti touletan kontan footbalI. Me mo bann nouvo kamarad ti telman inflians mwa ki mo ti vinn enn gran fanatik. Mo lekip prefere ti sorti Warsaw, ek toule wikenn mo ti al get zot zwe ninport kot sa zot ti pe zwe. Pandan sa bann sorti-la, nou ti bwar boukou, nou ti pran ladrog, ek parfwa nou ti lager avek bann siporter lezot lekip. Mo ti kone si lapolis aret mwa, sa kapav gat mo karyer. Me mo ti kontign fer sa pou defoul mwa.

Mwa ek mo bann kamarad nou ti kontan al dan bann club ek bann diskotek. Laba, souvan nou ti lager ar lezot lor lari. Plizir fwa lapolis inn aret mwa, me mo’nn touletan trouv enn mwayin pou evit gagn bann problem pli grav. Parfwa mo ti mem donn zot bribe. Mo ti panse ki vremem mo pe profit lavi plin-plin. Selman mo ti kone ki mo pe fer bann kitsoz pa bon. Alor, toule Dimans mo ti al lames pou apez mo konsians.

An 2004, de Temwin Zeova ti tap mo laport, ek mo ti aksepte pou etidie Labib avek zot. Amezir mo ti pe aprann kouma enn vre Kretien bizin konport li, mo konsians ti koumans fatig mwa. Mo ti kone mo bizin aret bwar boukou, aret droge, ek aret frekant bann dimounn ki pa viv dapre bann prinsip Labib. Mo ti trouve ki mo bizin osi aret lager. Mem si mo ti kone mo bizin sanze, mo ti kontign fer seki pa bon.

Enn swar mo lavi finn sanze kan mo’nn lager avek wit misie. Mo rapel mo ti anba lor lari. Bannla ti’nn bat mwa ek ti’nn donn mwa kout pwin dan mo latet. Mo ti ena linpresion mo pre pou mor, alor mo’nn fer sa lapriyer-la: “Pardon Zeova, mo  pa’nn ekout to Parol. Me si mo sape, mo promet twa mo pou etidie Labib avek bann Temwin ek mo pou redres mo lavi.” Mo pa ti’le krwar, me mo’nn viv. Vremem mo’nn tini mo promes ek mo’nn etidie Labib.

An 2006, mo ti al res l’Angleterre. Mo ti anvi gagn ase kas pou retourn Pologne pou fer enn letid pli pouse dan lalwa. Me amezir mo ti pe etidie Labib, enn verse inn bien tous mwa. Lapot Pol ti ekrir: “Ler mo konpar grander dibien ki mo gagne dan konesans Zezi Kris, mo konsider tou kiksoz kouma enn lapert. Akoz li mo finn perdi boukou kiksoz ki mo konsider kouma enn bann salte pou mo kapav gagn Kris.” (Filipien 3:8) Parey kouma mwa, lapot Pol ti etidie lalwa ek li osi li ti enn zom bien violan. (Zistwar Bann Apot 8:3) Pourtan li’nn rann li kont ki ena enn pli bon fason viv, setadir servi Zeova ek fer tou seki li kapav pou imit Zezi. Kan mo’nn medit lor lexanp Zezi, mo’nn konpran ki se pa enn bon karyer ek laviolans ki pou rann mwa ere. Si Pol ti’nn reisi sanze, mo’si mo ti pou kapav sanze. Alor mo ti desid pou res l’Angleterre ek pa al fer sa degre-la.

Plis mo ti aprann konn Zeova, plis mo ti vinn pros ar Li. Li promet pou pardonn tou bann ki vremem anvi sanze, ek sa ti bien tous mwa. (Zistwar Bann Apot 2:38) Ek kan mo’nn medit lor 1 Zan 4:16 ki dir “Bondie limem lamour,” mo’nn koumans konpran kifer Bondie deteste violans.

Mo ti osi bien inpresione ar konportman bann Temwin. Mo ti trouve kouma zot fer zefor pou aplik bann prinsip Labib. Mo’si mo ti anvi form parti dan sa fami ere la. Apre ki mo’nn fer zefor pou fer sertin sanzman, mo’nn pran batem antan ki Temwin Zeova an 2008.

Labib finn transform mwa. Asterla mo pa anbisie ek mo nepli violan. Mo nepli pran ladrog, bwar boukou, ek mo nepli enn siporter fanatik. Okontrer, mo enn serviter Bondie ki kontan ansegn lezot Labib. Mo ankor kontan get football, me mo bien deside pou donn li plas ki bizin.

Azordi mo ena enn lavi maryaz ere. Mo madam apel Esther ek li osi li enn Temwin Zeova. Nou ansegn bann dimounn ki koz Polone Labib dan nor-wes l’Angleterre ek sa fer nou extra kontan. Se premie fwa dan mo lavi ki mo santi mwa vremem ere. Mo ena enn konsians kler ek mo lavi ena enn sans.