LARTIK KOUVERTIR | KI BONDIE PANSE LOR LAGER?
Seki Bondie Panse lor Lager dan Premie Siek
Enn pep pe bien soufer. Parey kouma zot bann anset, plizir fwa zot pe priye Bondie pou gagn soulazman. Sa pep-la se bann Zwif dan premie siek. Bann ki pe fer dominer ar zot, se bann Romin. Me zot tann koz lor Zezi. Eski se limem Lemesi ki bann Lekritir ti anonse? Boukou ‘panse ki limem ki pou kapav delivre Izrael’ ar bann Romin. (Lik 24:21) Me zame zot inn gagn delivrans! Okontrer, an 70 Nou Lepok, larme Romin inn vinn detrir Zerizalem ek so tanp.
Ki’nn arive? Kifer Bondie pa’nn lager pou bann Zwif parey kouma Li’nn fer dan lepase? Ouswa, kifer li pa’nn permet zot al lager kont bann Romin? Eski Bondie inn sanz so fason panse lor lager? Non. Me enn kitsoz ki’nn sanz net, se konsernan bann Zwif. Zot pa’nn aksepte Zezi, Garson Bondie, kouma Lemesi. (Zistwar Bann Apot 2:36) Alor, antan ki nasion, zot inn perdi zot relasion spesial avek Bondie.—Matie 23:37, 38.
Bann Zwif antan ki nasion ek Later Promiz ti nepli ena proteksion Bondie. Bann Zwif ti nepli kapav pretann osi ki zot ena drwa partisip dan bann lager ek ki se Bondie ki demann zot al lager. Parey kouma Zezi ti anonse, Bondie ti tir so benediksion lor sa nasion-la ek ti donn sa enn nouvo nasion ki Li’nn swazire. Labib apel sa nasion-la ‘Izrael Bondie.’ (Galat 6:16; Matie 21:43) Se bann Kretien ki ena lesperans pou al dan lesiel ki form parti dan sa nouvo nasion-la. Se akoz sa ki dan premie siek, Pier ti dir: “Asterla, zot pep Bondie.”—1 Pier 2:9, 10.
Asterla ki bann Kretien premie siek ti “pep Bondie,” eski Bondie pou lager pou zot kont bann Romin? Ouswa eski Li pou permet zot al lager kont bannla? Non. Kifer? Parey kouma lartik avan montre, kan Bondie donn lord pou al lager, se Li tousel ki deside kan pou ena sa lager-la. Li pa ti lager pou bann Kretien premie siek, ni Li ti permet zot al lager. Alor, li kler ki premie siek pa ti ler pou Bondie lager kont bann move.
Alor, parey kouma bann serviter Bondie dan lepase, sa bann Kretien-la ti bizin atann. Antretan, Bondie pa ti donn zot lotorizasion pou lager kont zot bann lennmi. Zezi Kris ti bien explik sa dan so lansegnman. Par exanp, olie li dir so bann disip al lager, li ti dir zot: “Kontan zot lennmi e priye pou bann ki persekit zot.” (Matie 5:44) Kan li ti anons destriksion Zerizalem par larme Romin, li ti donn linstriksion so bann disip pou sove. Zot pa ti bizin reste ek lager. Ek se seki so bann disip ti fer.—Lik 21:20, 21.
Anplis, Bondie ti inspir Pol pou ekrir: “Pa rod tir vanzans zotmem, . . . kouma Lekritir dir: ‘Mwa ki pou tir vanzans, mwa ki pou regle kont.’” (Romin 12:19) Pol ti pe sit seki Bondie ti dir plizir siek avan dan Levitik 19:18 ek dan Deteronom 32:35. Parey kouma nou trouve dan lartik avan, enn fason Bondie ti tir vanzans pou so pep dan lepase se kan Li ti ed zot pou lager kont zot bann lennmi. Seki Pol dir montre ki fason panse Bondie lor lager pa’nn sanze. Dan premie siek, Bondie ti touzour panse ki lager se enn mwayin pou tir vanzans pou so bann serviter, ek pou detrir bann ki fer dominer ar lezot. Me parey kouma dan lepase, zis Bondie tousel ti deside kan pou fer lager ek kisannla pou al lager.
Li kler ki dan premie siek, Bondie pa ti donn bann Kretien lotorizasion pou al lager. Me ki nou kapav dir zordi? Eski ena enn group dimounn ki Li’nn donn lord pou al lager? Ouswa eski se asterla ler kot Li pou lager pou so bann serviter? An realite, ki Bondie panse lor lager zordi? Prosin lartik pou reponn sa bann kestion-la.
