Mo’nn grandi dan Ancram, enn ti lavil dan lenor New York, l’États-Unis. Dan sa lavil-la ti ena sirtou bann laferm ki prodir dile. Ofet, dan nou lavil ti ena plis vas ki dimounn.

Mo fami ti frekant sel legliz ki ti ena dan sa lavil-la. Toule Dimans gramatin, mo granper ti glas mo soulie, ek lerla mo ti al lekol relizie ki fer dan Dimans avek enn ti Labib blan ki mo granmer ti donn mwa. Ti ansegn mo frer, mo ser, ek mwa ki nou bizin travay dir, respekte ek ed nou bann vwazin, ek ena rekonesans pou tou bann bon kitsoz ki nou gagne.

Kan mo’nn vinn gran, mo ti aret res kot mo fami ek mo ti travay profeser. Mo ti ena boukou kestion lor Bondie ek lavi. Sertin mo bann zelev ti ena boukou kapasite. Lezot pa ti ena otan kapasite, me zot ti travay bien dir. Sertin ti ena bann ti andikap fizik, alor ki lezot ti ena enn bon lasante. Mo ti trouv sa sitiasion-la inzis. Parfwa, paran sa bann zelev ki ti ena mwins kapasite la ti dir: “Se koumsa ki Bondie anvi mo zanfan ete.” Mo ti demann momem kifer Bondie permet sertin tibaba ne avek bann andikap. Apre tou, sa bann tibaba-la pa’nn fer nanye demal.

Mo ti osi demann mwa: ‘Ki mo bizin fer pou ki mo lavi ena enn sans?’ Mo ti ena linpresion ki letan ti pe pas vit. Mo’nn grandi dan enn bon fami, mo’nn al bann bon lekol, ek mo ti pe fer enn travay ki mo ti kontan. Me apart sa mo lavi pa ti vremem ena enn sans. Pli bon kitsoz mo ti kapav atann ariv mwa se, marye, ena enn zoli lakaz ek de-trwa zanfan, kontign travay ziska mo pran retret, ek finalman al dan enn home. Mo ti demann momem si ena zis samem dan lavi.

Enn lete, mo ti al vizit l’Europe avek lezot profeser. Nou ti al l’Abbaye de Westminster, Notre-Dame de Paris, ek Vatican, ek osi dan boukou lezot ti legliz. Partou kot mo ti ale mo ti poz mo bann kestion. Kan mo ti retourn kot mwa dan Sloatsburg,  New York, mo ti vizit plizir legliz. Me mo pa ti satisfe avek bann repons ki mo ti gagne.

Enn zour, enn zelev ki ti ena 12 an ti vinn get mwa ek ti poz mwa trwa kestion. Premierman, li ti demann mwa si mo ti kone li enn Temwin Zeova. Mo ti dir wi. Deziemman, li ti demann mwa si mo ti pou kontan konn plis lor bann Temwin Zeova. Mo ti redir wi. Trwaziemman, li ti demande kotsa mo reste. Kan mo ti donn li mo ladres, nou’nn trouve ki mo res pre kot li. Sa moman-la mo pa ti panse ki sa trwa kestion ki sa tifi-la ti poz mwa ti pou sanz mo lavi pou touletan.

Enn tipe apre, li ti pedal so bisiklet li ti vinn kot mwa, ek li ti koumans enn letid Labib avek mwa. Mo ti poz li mem kestion ki mo ti poz boukou sef relizie. Mo ti satisfe ar so bann repons parski li, li ti montre mwa bann repons bien kler dan mo prop Labib​—bann repons ki zame mo’nn trouve avan!

Mo ti kontan ek mo ti satisfe ar seki mo ti pe aprann dan Labib. Sa ti bien tous mwa kan mo ti lir 1 Zan 5:19, ki dir: “Lemonn antie li dan pouvwar Lemal.” Mo ti soulaze kan mo ti aprann ki se pa Bondie, me Satan ki responsab tou sa sagrin ki ena otour nou la​—ek ki Bondie pou repar sa sitiasion-la. (Revelasion 21:3, 4) Mo ti trouve ki li fasil konpran Labib kan enn kikenn explik li dan enn fason kler. Mem si sa tifi ki ti pe fer mo letid la ti ena zis 12 an, mo ti dir momem ki laverite li res laverite.

Kanmem sa, mo ti anvi gete si bann Temwin pratik seki zot ansegne. Par exanp, tifi-la ti met laksan ki bann vre Kretien manifeste bann kalite kouma pasians ek bonte. (Galat 5:22, 23) Mo ti deside pou teste li ek gete si limem li manifeste sa bann kalite-la. Enn zour, par expre mo ti ariv tar pou mo letid. Mo ti demann momem: ‘Eski li pou atann mwa? Si wi, eski li pou ankoler ki mo’nn vinn tar?’ Kan mo ti pe rant dan mo lale avek mo loto, mo ti trouv li pe atann lor peron devan mo lakaz. Li ti galoupe li ti vinn kot mo loto ek li ti dir: “Mo ti pre pou al lakaz ek dir mo mama telefonn lopital ek lapolis pou gete si ou bien parski zame ou an retar pou ou letid. Mo ti pe gagn ou traka!”

Enn lot zour, mo ti poz li enn kestion ki mo ti panse pou tro difisil pou enn zanfan 12 an reponn. Mo ti anvi gete si li pou zis invant enn repons. Kan mo ti poz li sa kestion-la, li ti get mwa avek enn figir serye ek ti dir: “Li difisil sa kestion-la. Mo pou ekrir li ek mo pou demann mo bann paran.” Ek vremem, prosenn fwa li ti vinn fer letid, li ti amenn enn Latour Degard kot ti ena repons sa kestion-la. Se sa ki finn atir mwa ar bann Temwin​—zot bann piblikasion ki baze lor Labib reponn tou mo bann kestion. Mo ti kontign etidie avek sa tifi-la, ek enn an apre mo ti batize mo ti vinn Temwin Zeova. a

Kan finalman mo ti satisfe ar bann repons ki mo’nn gagne, mo ti anvi partaz sa avek zot tou. (Matie 12:35) O-koumansman, mo fami pa ti dakor ar mo bann nouvo krwayans. Me avek letan, zot latitid ti sanze. Kan mo mama ti pre pou mor, li ti koumans etidie Labib. Mem si li pa’nn viv ase lontan pou pran batem, mo sir ki li ti’nn deside pou servi Zeova.

An 1978, mo ti marye avek enn Temwin ki apel Elias Kazan. An 1981, Elias ek mwa ti gagn linvitasion pou al servi dan Betel l’États-Unis. b Malerezman, apre ki nou ti servi laba pandan kat-r-an, Elias inn mor. Mem si mo ti vev, mo’nn kontign servi dan Betel. Sa ti permet mwa res okipe ek sa ti rekonfort mwa dan enn sertenn fason.

An 2006, mo ti marye avek Richard Eldred, enn lot manb fami Betel. Richard ek mwa ankor pe servi dan Betel ek nou kontan nou servis. Lefe mo konn laverite lor Bondie, mo rann mwa kont ki mo pa’nn zis gagn bann repons ki mo ti pe rode, me osi enn lavi ki ena enn sans​—ek tousala inn koumanse avek trwa kestion ki enn tifi ti poz mwa.