Parski bien souvan bann prezize baze lor bann fos linformasion. Anou get sertin lexanp:

• Sertin patron panse ki bann madam pa kalifie pou fer bann travay siantifik ouswa teknik.

• Dan Lerop ver bann lane 500 a 1500, ti dir ki swadizan bann Zwif ti pe met pwazon dan bann pwi ek ki zot ti pe fann bann maladi. Kan bann Nazi ti pe dirize, zot ti gat repitasion bann Zwif ankor. Me sa’nn fwa-la, ti dir ki se akoz zot ki ti ena enn kriz ekonomik dan Lalmagn. Akoz sa, bann Zwif ti viktim bann gran prezize, ek sertin sa bann prezize-la ankor existe azordi.

• Boukou dimounn panse ki si enn dimounn ena enn andikap, li tris ouswa so lavi amer.

Bann ki krwar dan sa bann fos zistwar-la servi bann swadizan lexanp ek prev pou konfirm zot prezize. Ek zot panse ki enn kikenn ki pa dakor avek zot, dan liniorans.

“Li pa bon ki enn dimounn pena konesans.”​—PROVERB 19:2.

Ki savedir? Kan nou pena bann bon linformasion, nou pran bann move desizion. Alor, si nou krwar dan bann kitsoz ki fos olie ki nou krwar dan bann kitsoz ki vre, nou pou mal ziz bann dimounn.

Kan nou kone kouma bann dimounn ete vremem, nou pa pou ena tandans pou krwar  bann fos zistwar ki rakonte lor zot. Ek kan nou realize ki bann kitsoz negatif ki’nn dir lor sa bann dimounn-la fos, nou pou esey aprann laverite lor zot.

• Bann dimounn kapav dir ki enn group dimounn ena sa defo-la. Me ou bizin rapel ki pa tou dimounn dan sa group-la ki ena sa defo-la.

• Ou bizin rekonet ki ou pena tou linformasion lor sertin dimounn.

• Esey gagn bann linformasion avek bann dimounn ouswa bann kitsoz ki kapav fer konfians.