Me, nou finn remarke ki bann zenn ki pas boukou letan lor Internet, zot ena tandans pou . . .

• vinn esklav zot bann laparey elektronik.

• arsel lezot ouswa vinn enn viktim arselman lor Internet.

• get pornografi, mem si defwa zot pa finn swazir pou get sa.

VINN ESKLAV

Sertin aktivite lor Internet, par exanp kouma bann zwe online, kapav vinn koumadir enn ladrog. Ek se pa par azar ki sa koumsa. Enn liv dir: “Sa bann aplikasion ki ena lor nou bann telefonn la finn fer dan enn fason pou ki nou res touletan lor nou telefonn.” Anplis, bann biznes kapav gagn boukou kas si nou get zot bann piblisite. Alor, plis nou servi sa bann aplikasion dan ki ena boukou piblisite la, plis zot gagn kas.

REFLESI LOR LA: Eski ou bann zanfan pas extra boukou letan lor zot bann laparey elektronik? Kouma ou kapav ed zot pou servi zot letan pli bien?​—EFEZIEN 5:15, 16, NW.

ARSELMAN LOR INTERNET

Sertin dimounn azir dan enn fason agresif, vilger, ek zot pa pran kont santiman lezot kan zot lor Internet.

Sertin dimounn telman anvi vinn popiler, ki zot servi bann rezo sosial dan enn move fason, zis pou atir latansion lor zotmem. Ouswa enn dimounn ki trouv bann foto enn fet ki’nn poste lor rezo sosial kapav santi li apar parski pa finn invit li.

REFLESI LOR LA: Eski ou bann zanfan zot koz ouswa azir brit ar lezot kan zot lor Internet? (Efezien 4:31) Eski zot santi zot mal kan zot trouv lezot lor bann rezo sosial fer bann kitsoz san zot?

PORNOGRAFI

Li extra fasil pou get bann kitsoz imoral lor Internet. Bann paran bizin kone ki mem si ena sertin aplikasion ki permet zot pou kontrol seki zot zanfan pe gete, sa pa touletan marse, ek zot bann zanfan kapav touzour gagn akse ar bann move kitsoz.

Sexting ouswa bann sexto, se bann mesaz, foto ouswa video sexiel ki avoye lor portab. Lalwa interdi sa pratik-la. Dan sertin pei, finn konsider bann adolesan ki finn avoy bann sexto kouma bann delinkan sexiel ek finn mem kondann zot.

REFLESI LOR LA: Kouma ou kapav ed ou bann zanfan pou pa tom dan piez pou get ouswa avoy bann zimaz imoral lor Internet?​—EFEZIEN 5:3, 4.

FORM OU BANN ZANFAN

Mem si bann zenn bien konn servi teknolozi, bann paran touzour bizin gid zot. Enn liv dir ki kan ou donn enn zanfan enn smartphone ouswa enn lot laparey elektronik avan mem ki li ena bann kapasite pou servi li kouma bizin, se “koumadir pe zet li dan enn pisinn ek dir li naze, san ki li konn naze.”

Swazir lakel parmi sa bann sigzesion-la ou anvi eseye, ouswa ekrir ou prop lide.

• Koz avek ou zanfan lor kouma li kapav ena enn bon kondwit ek bann bon manier lor Internet

• Ed ou zanfan pou sirmont bann santiman negatif kouma par exanp, kan li santi li rezete

• Fer tou seki ou kapav pou protez ou zanfan kont bann move kitsoz ki ena lor Internet

• Pran labitid pou chek telefonn ou zanfan

• Fixe komie letan ou pou les ou zanfan servi so laparey elektronik sak zour

• Kan finn ariv ler pou dormi, interdi ou zanfan pou servi so telefonn dan so lasam

• Interdi pou servi bann laparey elektronik kan lafami pe manze ansam