Dan lartik avan, nou ti examinn sign ki Zezi ti done. Sa sign-la prouve ki Rwayom Bondie finn etabli dan lesiel ek ki Zezi Kris Lerwa dan sa Rwayom-la.

Labib dir ki, kan Zezi pou koumans dirize li pou tir Satan ek so bann demon dan lesiel. Se enn parmi bann rezon kifer bann kitsoz finn deteriore depi 1914, parski Satan ek so bann demon ena enn linflians zis lor bann kitsoz ki pase lor later.​—Revelasion 12:7, 9.

Malgre bann kondision difisil ki ena dan lemond, Zezi, antan ki Lerwa dan Rwayom Bondie, inn fer bann kitsoz pou ed bann dimounn partou lor later. Zezi ti predir ki pou ena enn travay lansegnman Labib ki pou fer dan lemond antie. Gras-a sa boukou dimounn pe aprann ek pe aplik bann prinsip Labib dan zot lavi toulezour. (Izai 2:2-4) Bann milyon dimounn finn aprann pou ena enn pli bon lavi fami, ek pou pa les zot travay, ouswa bann kitsoz materyel vinn kitsoz ki pli inportan dan zot lavi. Ek se sa kalite dimounn-la ki Bondie anvi ena dan so Rwayom. Kan zot fer zefor pou fer sa bann sanzman-la depi asterla mem, sa pou permet zot vinn bann sitwayen Rwayom Bondie.

Mem si Zezi deza pe regne dan lesiel, lor later se bann gouvernman imin ki ankor pe dirize. Me selman Bondie ti dir Zezi: “Al omilie to bann lennmi ek fer zot soumet.” (Psom 110:2, NW) Biento, Zezi pou detrir tou bann ki opoz ar Bondie ek li pou amenn enn soulazman pou bann ki volonterman obeir Bondie.

Pandan sa lepok-la, Rwayom Bondie pou:

• Detrir fos relizion. Pou detrir bann relizion ki finn ansegn bann foste lor Bondie ek ki finn rann lavi bann dimounn difisil. Labib konpar fos relizion ar enn prostitie. Bann dimounn pou gagn sok kan pou detrir fos relizion.​—Revelasion 17:15, 16.

• Lafin dominasion bann imin. Rwayom Bondie pou azir ek li pou detrir tou bann gouvernman imin.​—Revelasion 19:15, 17, 18.

• Detrir bann move dimounn. Ki pou ariv bann ki determine pou fer seki pa bon ek ki refiz pou obeir Bondie? “Me bann move dimounn zot, pou tir zot lor sa later-la.”​—Proverb 2:22.

• Detrir Satan ek bann demon. Satan ek bann demon pou nepli kapav “detourn bann nasion ankor.”​—Revelasion 20:3, 10 NW.

Ki tousala pou reprezante pou bann dimounn ki aksepte Rwayom Bondie?

Antan ki Lerwa dan lesiel, Zezi pou fer boukou plis ki seki enn dirizan imin inn kapav fer. Pou ed li, finn swazir 144,000 dimounn lor later pou diriz ansam avek li. (Revelasion 5:9, 10; 14:1, 3) Li pou fer sir ki volonte Bondie fer lor later. Ki Rwayom Bondie pou fer pou bann dimounn ki res lor later?

• Tir maladi ek lamor. “Okenn abitan pa pou dir: ‘Mo malad’” ek ‘pa pou ena lamor.’​—Izai 33:24; Revelasion 21:4.

• Amenn vre lape ek sekirite. “Lape to bann garson pou an-abondans,” ek “sakenn pou asiz anba so pie rezin ek anba so pie fig, ek pa pou ena personn ki fer zot per.”​—Izai 54:13; Mishe 4:4.

• Bann dimounn pou gagn enn travay ki donn zot satisfaksion. “Bann ki mo’nn swazir pou profit maximum tou travay zot lame. Zot pa pou rinte pou nanye.”​—Izai 65:22, 23.

• Regle bann problem lanvironnman. “Dezer ek landrwa sek pou bien kontan, ek laplenn kot nanye pa pouse pou dan lazwa ek pou bourzone kouma safran.”​—Izai 35:1.

• Ansegn bann dimounn seki zot bizin fer pou ki zot kapav viv pou touletan. “Samem ki vedir lavi eternel, ki zot aprann konn twa, sel vre Bondie, ek sa kikenn ki to finn avoye la, Zezi Kris.”​—Zan 17:3, NW.

Bondie anvi ki ou profit sa bann benediksion-la. (Izai 48:18) Prosin lartik pou explike ki ou kapav fer depi asterla mem pou kapav profit sa zoli lavenir-la.