ENA trwa nou bann ser ki res lor enn ti zil ki apel Sangir Besar, dan Indonezi. Kitfwa si to ti al laba de-trwa lane avan, to ti pou trouv zot pe travay lor laplaz. Lor sa zil-la, bann dimounn bien konn zot parski zot kontan ed lezot pou konpran Labib. Me ki travay zot ti pe fer lor laplaz?

Pou koumanse, zot rant dan lamer, zot rod bann gro ros, ek zot amenn sa bann ros-la lor laplaz. Sertin parmi sa bann ros-la kapav mem groser ki enn boul football. Apre sa, zot asiz lor bann ti-ban an dibwa ek zot kas sa bann ros-la avek enn marto. Zot fer sa bann ros-la vinn mem groser ar enn dizef poul. Lerla, zot met sa bann ros-la dan bann seo ek zot amenn sa kot zot. Finalman, zot met sa bann ros-la dan bann gran sak, pou ki kapav met zot dan bann kamion ek servi zot kouma materyo pou aranz bann semin.

Enn parmi sa bann ser-la apel Hulda. So sitiasion permet li pou travay plis ki lezot. Li abitie servi tou so larzan pou okip so fami. Me aster-la, li ena enn lot lobzektif osi. Li anvi aste enn tablet pou ki li kapav servi aplikasion JW Library. Hulda kone ki bann video ek bann lezot piblikasion ki ena lor sa aplikasion-la pou ed li pou vinn pli efikas dan predikasion ek pou konpran pli bien Labib.

Pandan enn mwa edmi, Hulda inn travay de-z-er-tan toule gramatin. Li’nn kas bann ros pou ki li kapav ranpli enn ti kamion, ek li’nn gagn ase kas pou ki li kapav aste so tablet.

Hulda dir: “Mem si mo ti extra fatige ek ki mo ti gagn boukou douler, mo ti bliye tousala kan mo ti reisi servi mo tablet. Sa ti ed mwa pou vinn pli efikas dan predikasion ek pou prepar pli bien mo bann renion.” Hulda dir ki tablet-la inn bien ed li dan koumansman pandemi, kan ti pe fer tou bann aktivite lasanble par video-konferans. Nou bien kontan ki Hulda inn reisi realiz so lobzektif!