Zezi fek fini rakont lexanp lor enn garson ki’nn perdi. Bann dimounn ki ramas tax, bann skrib, ek bann Farizien ki’nn ekout li inn sirman konpran ki Bondie dispoze pou pardonn bann peser ki repanti. (Lik 15:1-7, 11) Asterla, Zezi koz ar so bann disip. Li servi enn lot lexanp, lexanp enn zom ris ki aprann ki sa kikenn ki ansarz so lakaz la, ouswa so administrater, finn mal fer so travay.

Bann dimounn inn akiz administrater-la ki li’nn gaspiy bann dibien so met. Alor met-la dir ki li pou met administrater-la deor. Administrater-la dir ar limem: “Ki mo pou fer aster? Mo patron pe donn mwa demision. Pou piose mo pena lafors, dimann sarite mo onte.” Lerla, li mazinn so lavenir ek li gagn enn lide. Li dir: “Mo kone ki mo bizin fer pouki dimoun kontign get mwa [“akeyir mwa kot zot,” NW] kan mo perdi mo travay.” Deswit, li apel bann dimounn ki dwa so met ek li demann zot: “Komie to dwa mo patron?”​—Lik 16:3-5.

Premie dimounn-la dir li: “De mil de-san lit delwil zoliv.” Kitfwa sa dimounn-la ena enn gran karo zoliv, ouswa li enn marsan delwil. Administrater-la dir li: “Pran to kontra, asize, ek degaze ekrir 1,100 lit.”​—Lik 16:6, NW.

Administrater-la demann enn lot dimounn: “Twa, komie to dwa?” Dimounn-la reponn: “San bal dible.” Sa fer apepre 22,000 lit. Administrater-la dir li: “Pran to karne [“kontra,” NW], mark katrovin.” Li diminie so det par 20 poursan.​—Lik 16:7.

Sa administrater-la ankor touzour ansarz bann finans so met. Alor, dan enn sertenn fason, li ena drwa diminie det bann dimounn ki dwa so met. Ek kan li fer sa, sa administrater-la pe fer kamarad ar bann dimounn ki pou kapav ed li kan li pou perdi so travay.

Plitar, met-la al aprann seki’nn arive. Mem si li’nn fer defet, met-la inpresione par seki administrater-la inn fer. Li felisit li parski mem si li “malonet,” li’nn “azir ar sazes.” Zezi dir: “Bann zanfan sa lemond-la azir ar plis sazes anver lezot ki bann zanfan lalimier.”​—Lik 16:8, NW.

Sa pa vedir ki Zezi dakor ar bann metod sa administrater-la, ouswa ki li pe ankouraz pou manday lezot. Non! Me alor, ki sa lexanp-la pe ansegne? Li donn sa konsey-la so bann disip: “Fer kamarad ar dibien ki ena lor later [“bann rises inzis,” NW], koumsa kan dibien la pou nepli existe, zot pou gagn plas dan lakaz eternel.” (Lik 16:9) Par sa bann parol-la, Zezi pe ankouraz so bann disip pou trouv pli devan ek pou azir avek sazes. Bann serviter Bondie, setadir bann “zanfan lalimier,” bizin mazinn lavenir eternel ki pe atann zot ek servi zot bann dibien materyel avek sazes.

 Zis Zeova ek so Garson ki kapav akeyir enn kikenn dan Rwayom ki dan lesiel ouswa dan Paradi ki pou ena lor later ek ki pou dirize par sa Rwayom-la. Alor, li inportan ki nou fer nou lamitie avek zot vinn bien for. Nou kapav fer sa kan nou servi nou bann dibien materyel pou soutenir tou kitsoz ki ena enn lien ar Rwayom Bondie. Koumsa, kan bann kitsoz materyel kouma lor ek larzan nepli pou ena okenn valer, nou, nou pou ena enn lavenir ki pou dire pou touletan.

Zezi explike osi ki bann dimounn ki fidel dan fason ki zot pran swin ek servi zot bann dibien materyel pou fidel osi dan bann kitsoz pli inportan. Alor, Zezi dir: “Si to pa finn fidel ar dibien ki ena lor later [“rises inzis,” NW], kisannla pou konfie twa dibien ki dan lesiel [“bann vre rises,” NW],” par exanp, bann kitsoz ki ena enn lien ar Rwayom Bondie?​—Lik 16:11.

Zezi pe explik so bann disip ki, si zot anvi rant dan bann “lakaz eternel,” zot pou bizin fer boukou sakrifis. Enn kikenn pa kapav enn vre serviter Bondie ek anmemtan esklav bann rises inzis. Zezi dir: “Personn pa kapav vinn esklav de met; swa li pou ena laenn pou enn, ek li pou kontan lot-la, ouswa li pou atase avek enn ek li pou mepriz lot-la. Zot pa kapav vinn esklav Bondie ek Larzan toulede.”​—Lik 16:9, 13, NW.