Zistwar 58

David Ek Goliath

ANKOR enn fwa bann Filistin vinn lager ar Israël. Asterla, trwa gran-frer David form parti dan larme Saül. Alor enn zour Jessé dir David: ‘Pran inpe sereal ek dipin pou to bann frer. Pran zot nouvel enn kou.’

Kan David ariv kot larme ete, li galoupe ek li al rod so bann frer dan landrwa kot zot pe lager. Goliath, enn zean Filistin, boufonn bann Izraelit. Li fer sa toule-gramatin ek toule-swar pandan 40 zour. Li kriye: ‘Swazir enn parmi to bann zom pou lager ar mwa. Si li gagne ek si li reisi touy mwa, nou pou vinn zot esklav. Me si mo gagne ek mo touy li, zot pou vinn nou esklav. Mo lans zot enn defi pou rod enn kikenn ki kapav lager ar mwa.’

David demann sertin parmi bann solda: ‘Si enn kikenn touy sa Filistin-la ek tir Israël dan sa laont-la, ki li pou gagne?’

Solda-la reponn: ‘Saül pou donn li boukou dibien. Ek li pou donn li so tifi pou marye.’

Me tou bann Izraelit bien per Goliath parski li telman ot. Li mezir preske trwa met oter, ek li ena enn lot solda ki sarye so boukliye.

Sertin solda ale ek dir Lerwa Saül ki David anvi lager kont Goliath. Me Saül dir David: ‘To pa pou kapav lager kont sa Filistin-la. To ankor enn zenn garson ek li toutlong so lavi li ti enn solda.’ David reponn: ‘Mo finn touy enn lours ek enn lion ki ti sarye mouton mo Papa. Ek sa Filistin-la pou vinn enn kouma sa bann zanimo-la. Jéhovah pou ed mwa.’ Alor Saül dir: ‘Ale, ek ki Jéhovah avek twa.’

David al kot enn ti larivier ek ramas sink ros lis, ek li met zot dan so sak. Lerla, li pran so zarm pou lans ros-la ek li al zwenn zean-la. Kan Goliath trouv li, li pa’le krwar. Li panse li pou bien fasil pou touy David.

Goliath dir: ‘Nek vinn ar mwa, ek mo pou donn to lekor bann zwazo ek bann zanimo pou manze.’ Me David dir: ‘To vinn ar mwa avek enn lepe, enn lans ek enn zavlo, me mwa mo vinn ar twa avek nom Jéhovah. Zordi, Jéhovah pou fer mwa gagne ek mo pou touy twa.’

Apre sa David galoup ver Goliath. Li tir enn ros dan so sak, li met li dan so zarm, ek li lans ros-la avek tou so lafors. Ros-la tap direk lor latet Goliath, ek li tom sek! Kan bann Filistin trouve ki zot sanpion finn tonbe, zot tou sove. Bann Izraelit galoup deryer zot ek gagn sa lager-la.

1 Samuel 17:1-54.