Izai 5:1-30
5 Silvouple, les mo sant pou sa kikenn ki mo bien kontan la,Enn sante lor sa kikenn ki mo kontan la ek lor so karo rezin.
Sa kikenn ki mo bien kontan la ti ena enn karo rezin lor lapant enn kolinn ki bien fertil.
2 Li’nn fouy later ek li’nn tir tou bann ros.
Li’nn plant enn bon pie rezin rouz,Li’nn ranz enn latour omilie karo-la,Ek li’nn fouy enn plas pou kraz rezin.
Apre sa, li ti ena lespwar ki li pou gagn bann bon rezin,Me karo-la ti gagn zis bann rezin sovaz.
3 “Ek aster-la, zot bann abitan Zerizalem ek bann zom Zida,Silvouple ziz ant mwa ek mo karo rezin.
4 Ki mo ti kapav fer ankor pou mo karo rezinKi mo pa’nn fini fer?
Kifer li’nn gagn zis bann rezin sovaz,Alor ki mo ti ena lespwar ki li ti pou gagn bann bon rezin?
5 Aster-la, silvouple, les mo dir zotSeki mo pou fer ar mo karo rezin:
Mo pou tir so baraz,Ek pou bril karo-la.
Mo pou kraz so miray ros,Ek bann dimounn pou mars lor la.
6 Mo pou fer li vinn enn terin abandone;Pa pou tay bann pie rezin ki ladan ouswa ras so bann lerb.
Li pou ranpli ar bann touf pikan ek bann move zerb,Ek mo pou donn bann niaz lord pou pa fer lapli tom lor li.
7 Parski karo rezin ki pou Zeova Sef bann larme, se pep* Izrael;Bann zom Zida, se plantasion ki li ti bien kontan.
Li ti ena lespwar ki pou ena lazistis,Me gete! ti ena linzistis;Li ti pe atann ki ena ladrwatir,Me gete! bann ki ti pe soufer akoz linzistis ti pe kriye.”
8 Maler pou bann ki azout enn lakaz ar enn lot lakazEk ki azout enn karo ar enn lot karoZiska ki nepli ena plasEk ki zis zot tousel ki viv dan pei-la!
9 Zeova Sef bann larme inn fer serman dan mo zoreyKi boukou bann lakaz, mem si zot gran ek zoli,Pou vinn enn kitsoz ki fer per,Kot personn pa pou reste.
10 Parski dis arpan* karo rezin pou prodir zis enn mezir bat* divin,Ek enn homer* lagrin dible pou prodir zis enn efa* dible.
11 Maler pou bann ki lev boner gramatin pou bwar bann labwason ki ena lalkol,Ek ki aswar bwar divin ziska bien tar ziska ki zot sou!
12 Zot ena laarp, bann instriman ki ena lakord,Tanbourin, laflit, ek divin dan zot bann gran repa;Me zot pa pran kont seki Zeova ferEk zot pa trouv travay so lame.
13 Alor mo pep pou al an exilParski zot mank konesans;So bann zom inportan pou mor-de-fin,Ek lepep an-antie pou mor-de-swaf.
14 Akoz samem Tom* inn ouver limem bien granEk inn ouver so labous an gran, san okenn limit;Ek seki zoli dan Zerizalem,* so bann lafoul ki fer tapaz,Ek bann ki kontan fer tapaz kan zot amize,Vremem pou desann ladan.
15 Ek bann dimounn pou kourbe,Pou fer bann dimounn bes latet,Ek pou fer bann dimounn ki ena lorgey bes latet.
16 Zeova Sef bann larme pou gagn laglwar gras-a so zizman;*Vre Bondie, sa Kikenn Ki Sin la, pou sanktifie limem atraver lazistis.
17 Ek bann ti mouton pou manze koumadir zot dan zot patiraz;Bann etranze pou manz dan bann landrwa abandone, kot avan ti ena bann zanimo ki bien nouri.
18 Maler pou bann ki ris zot bann pese ansam avek zot bann foste,Parey kouma enn zanimo ki ris enn saret avek bann lakord.
19 Bann ki dir: “Ki li degaze fer so travay;Ki sa vinn vit pou ki nou kapav trouv sa.
Ki proze* sa Kikenn Ki Sin dan Izrael la akonpliPou ki nou kapav konn sa!”
20 Maler pou bann ki dir ki seki bon li move ek seki move li bon,Bann ki fer nwarte pas pou lalimier ek lalimier pas pou nwarte,Bann ki met amer dan plas dou ek dou dan plas amer!
21 Maler pou bann ki krwar ki zot ena sazesEk ki krwar ki zot malin!
22 Maler pou bann ki for dan bwar divinEk pou bann ki enn spesialis dan melanz bann labwason ki ena lalkol,
23 Bann ki pran brayb pou deklar non koupab bann ki moveEk bann ki refiz lazistis anver bann ki drwat!
24 Akoz sa, zot pou detrir parey kouma dife bril bann lapayEk bann lerb sek,Zot bann rasinn pou pouri,Ek zot bann fler pou fane kouma lapousier,Parski zot inn rezet lalwa* Zeova Sef bann larmeEk zot inn mepriz parol sa Kikenn Ki Sin dan Izrael la.
25 Ala kifer koler Zeova inn anflame kont so pep,Ek li pou lev so lame kont zot ek li pou tap zot.
Bann montagn pou tranble,Ek zot bann kadav pou kouma bann salte lor semin.
Akoz tousala, so koler pa’nn diminie,Ek so lame ankor leve pou tap zot.
26 Li’nn met enn signal lor enn poto pou enn nasion ki bien lwin;Li’nn soufle pou ki zot vini depi lot bout later;Ek gete zot pe vini bien vit.
27 Pena personn parmi zot ki fatige ouswa ki pe al tonbe.
Pena personn ki pe gagn somey ouswa ki pe dormi.
Sintir ki otour zot lerin bien atase,Ek lase zot sandalet pa kase.
28 Tou zot bann fles inn bien fite,Ek tou zot bann lark inn pare pou tire.
Sabo zot bann seval parey kouma ros,Ek zot bann larou parey kouma enn siklonn.
29 Zot kriye parey kouma enn lion;Parey kouma bann zenn lion zot kriye.
Zot pou grogne, zot pou trap zot viktimEk zot pou pran li ale san ki personn kapav sap li.
30 Sa zour-la zot pou grogn lor zot viktim,Parey kouma lamer grogne.
Tou dimounn ki pou get sa pei-la pou trouv enn marenwar ek enn gran dezespwar;Mem lalimier inn vinn nwar akoz bann niaz.
Not
^ Lit., “lakaz.”
^ Isi sa pe fer referans ar enn terin anviron 4 ha.
^ Apepre 22 L. Get Bann Detay B14.
^ Apepre 220 L. Get Bann Detay B14.
^ Apepre 22 L. Get Bann Detay B14.
^ Ouswa “Seol,” setadir, tom kot tou dimounn ale. Get Lexplikasion Bann Mo.
^ Ouswa “so bann dimounn ki sorti dan bann gran fami.”
^ Ouswa “lazistis.”
^ Ouswa “desizion, konsey.”
^ Ouswa “instriksion.”
