•  Kouma bann Temwin Zeova kone si enn fet li bon ouswa li pa bon?

•  Si bann Temwin Zeova pa fer sertin fet, eski savedir ki zot nepli kontan zot fami?

•  Eski bann Temwin Zeova dir bann dimounn ki fode pa zot fer sertin fet?

 Avan ki bann Temwin Zeova deside si zot pou fer enn fet ouswa non, zot fer bann resers dan Labib. Sertin fet pa an-akor ar bann prinsip ki ena dan Labib, ek bann Temwin Zeova pa fer sa bann fet-la. Konsernan bann lezot fet, sak Temwin deside ki li pou fer. Selman, li pou fer “zefor pou gard enn konsians kler devan Bondie ek bann zom.”​—Zist. 24:16.

 Anou get de-trwa kestion ki bann Temwin Zeova poz zotmem pou kone si zot pou selebre enn fet ouswa non. a

•   Eski sa fet-la an-akor avek seki Labib ansegne?

   Prinsip Labib: “‘Sorti parmi zot, ek separe avek zot,’ Zeova dir, ‘ek aret tous sa kitsoz ki inpir la.’”​—2 Korintien 6:15-17.

   Pou zot separ zot net ar bann lansegnman ki pa an-akor avek Labib, bann Temwin Zeova pa fer bann fet ki ena enn lien ar sa bann kitsoz-la:

   Bann fet ki ena enn lien avek ladorasion bann lezot bondie. Zezi ti dir: “Se Zeova to Bondie ki to bizin adore, ek se zis li tousel ki to bizin donn enn servis sakre.” (Matie 4:10) Bann Temwin swiv sa komannman-la, akoz sa zot pa fet Nwel ek Pak, parski sa bann fet-la ena enn lien ar ladorasion bann lezot bondie. Zot pa selebre osi bann fet kouma:

  •  Kwanzaa. Nom Kwanzaa “sorti dan enn lexpresion lang Swaili (matunda ya kwanza) ki vedir ‘bann premie frwi,’ ek sa montre ki sa fet-la li baze lor bann fet premie rekolt ki ti fer dan Lafrik.” (Encyclopedia of Black Studies) Mem si sertin dimounn pa konsider Kwanzaa kouma enn fet relizie, Encyclopedia of African Religion konpar sa fet-la ar enn fet Afriken, kot bann dimounn “donn bann premie frwi bann bondie ek bann anset pou remersie zot.” Sa ansiklopedi-la dir osi ki “Kwanzaa, ki enn fet Afro-Ameriken, li baze lor sa fet Afriken la.”

  •  Fet Lalinn (Mid-Autumn Festival). Sa fet-la donn “loner bondie lalinn.” (Holidays, Festivals, and Celebrations of the World Dictionary) Ena enn koutim, pandan sa fet-la, kot “bann madam pou prostern zot devan sa bondie-la.”​—Religions of the World​—A Comprehensive Encyclopedia of Beliefs and Practices.

  •  Thanksgiving. Parey kouma Kwanzaa, sa fet-la baze lor bann fet rekolt ki ti fer lontan ek ki ti donn loner diferan bondie. Avek letan, “bann relizion Kretien inn koumans swiv sa bann tradision-la.”​—A Great and Godly Adventure​—The Pilgrims and the Myth of the First Thanksgiving.

   Bann fet ki ena enn lien avek siperstision ouswa lasans. Labib dir ki “bann ki pe prepar latab pou bondie Lasans,” zot “bann ki pe kit Zeova.” (Izai 65:11) Se akoz sa ki bann Temwin Zeova pa fer sa bann fet-la:

  •  Ivan Kupala. Liv The A to Z of Belarus dir: “Dapre bann dimounn, pandan fet Ivan Kupala, lanatir larg bann pouvwar mazik, ek se bann dimounn ki ena kouraz ek lasans ki kapav kontrol sa bann pouvwar-la.” O-koumansman, sa fet-la pa ti enn fet Kretien ek bann dimounn ti selebre sa pandan solstis, setadir lazourne ki pli long dan lete. Me Encyclopedia of Contemporary Russian Culture dir ki, apre ki bann payin inn vinn Kretien, “sa fet-la inn melanz ar enn fet Legliz [fet “Sin Zan” ouswa fet Zan Batis].”

  •  Lane Sinwa ouswa Lane Koreen (Lunar New Year). “Dan sa peryod-la, bann fami ek bann kamarad donn loner bann bondie ek bann lespri. Zot fer osi tou seki zot kapav pou ki, pandan lane ki pe vini, zot ena lasans ek bann bon kitsoz ariv zot.” (Mooncakes and Hungry Ghosts​—Festivals of China) Pou Lane Koreen, zot “ador bann anset, zot fer bann sistem pou zot ena lasans ek pou pous bann move lespri, ek zot get zot destin pou kone ki pou ariv zot pandan sa nouvo lane-la.”​—Encyclopedia of New Year’s Holidays Worldwide.

   Bann fet ki ena enn lien ar krwayans ki nam enn dimounn pa mor. Labib bien kler lor la: Nam kapav mor. (Ezekiel 18:4) Akoz sa, bann Temwin Zeova pa selebre sa bann fet-la parski zot baze lor krwayans ki nam pa mor:

  •  Fet Bann Mor (Fête des morts). Dapre New Catholic Encyclopedia, sa zour-la bann dimounn “donn loner bann mor. Ant bann lane 500 a 1500, bann dimounn ti krwar ki, pandan sa zour-la, bann nam ki dan pirgatwar ti kapav aparet ar bann dimounn ki’nn fer zot ditor; zot aparet dan form bann fantom, bann sorsier, ouswa bann krapo.”

  •  Fet Qingming (Ch’ing Ming) ek Fet Bann Fantom (Hungry Ghost Festival). Fer sa de fet-la pou donn loner bann anset. Liv Celebrating Life Customs Around the World​—From Baby Showers to Funerals, dir ki pandan fet Ch’ing Ming, bann dimounn “bril manze, labwason, ek kas, pou ki bann dimounn ki’nn mor pa gagn fin, pa gagn swaf, ek pou ki zot pa mank kas.” Sa liv-la dir osi ki, “pandan mwa ki ena Fet Bann Fantom, sirtou lanwit kot ena plennlinn, [bann dimounn ki fer sa fet-la krwar] ki sa lanwit-la koneksion avek bann mor pli for. Akoz sa, li inportan ki zot pran bann prekosion pou kalme bann mor ek pou donn loner zot bann anset.”

  •  Chuseok. Liv The Korean Tradition of Religion, Society, and Ethics dir ki pandan sa fet-la, bann dimounn “donn manze ek divin bann nam.” Zot fer sa bann ofrand-la parski zot “krwar ki nam kontign existe apre lamor.”

   Bann fet ki ena enn lien ar sorselri. Labib dir: “Fode ki personn parmi zot . . . pa get destin, pa fer mazik, pa rod konn lavenir, pa fer sorselri, ouswa zet sor lor lezot, al get enn dimounn ki koz avek bann lespri ouswa ki predir lavenir, ouswa ki koz avek bann mor. Parski Zeova deteste ninport kisann-la ki pratik sa bann kitsoz-la.” (Deteronom 18:10-12) Pou zot pena okenn kontak ar sorselri ek astrolozi (ki enn form sorselri) bann Temwin Zeova pa fet Halloween ouswa bann fet kouma:

  •  Lane Tamil ek Lane Singale (Sinhala). “Parmi bann kitsoz ki bann dimounn fer pandan sa fet-la . . . dapre bann astrolog, zot bizin fer bann sistem dan bann moman bien presi, pou zot ena lasans pandan sa nouvo lane-la.”​—Encyclopedia of Sri Lanka.

   Bann fet ki ena enn lien ar Lalwa Moiz, me ki nepli bizin fer depi ki Zezi inn donn so lavi an sakrifis. Labib dir ki “Kris li lafin Lalwa.” (Romin 10:4) Bann prinsip ki ena dan Lalwa Moiz, zot touzour itil pou bann Kretien azordi. Selman, bann Temwin pa fer bann fet ki ena enn lien avek Lalwa Moiz, sirtou bann fet ki anons larive Lemesi, parski pou bann Kretien, Lemesi inn fini vini. Labib dir: “Sa bann kitsoz-la zot enn lonbraz bann kitsoz ki pou vini, me seki reel se Lekris.” (Kolosien 2:17) Alor, parski sa bann fet-la nepli itil azordi, ek parski dan sa bann fet-la, ena bann koutim ki pa an-akor avek Labib, bann Temwin Zeova pa fer sa bann fet-la:

  •  Hanoukka. Sa fet-la selebre deziem inogirasion tanp Zerizalem. Me Labib dir ki Zezi inn vinn Gran Pret enn tanp ouswa ‘latant ki pli gran ek pli parfe ek ki pa’nn fer ar lame, setadir, ki pa trouv lor later.’ (Ebre 9:11) Pou bann Kretien, sa tanp spiritiel la inn ranplas tanp ki ena dan Zerizalem.

  •  Rosh ha-Shana. Se premie zour lane Zwif. Dan lepase, ti fer bann sakrifis spesial pou Bondie pandan sa fet-la. (Nonb 29:1-6) Selman, kan Zezi ti vini kouma Lemesi, sa bann “sakrifis ek bann ofrand” la, ti nepli ena valer devan lizie Bondie.​—Daniel 9:26, 27.

•   Eski sa fet-la ankouraz tou bann relizion pou zwenn ansam?

   Prinsip Labib: “Ki relasion ena ant enn krwayan ek enn kikenn ki pa krwayan? Ki lakor ena ant tanp Bondie ek bann idol?”​—2 Korintien 6:15-17.

   Bann Temwin Zeova fer zefor pou res anpe avek lezot ek zot respekte krwayans lezot. Selman, zot pa fer bann fet ki ankouraz diferan relizion pou zwenn ansam.

   Bann fet ki donn loner bann dimounn ki relizie ouswa bann levennman ki ankouraz bann dimounn ki dan diferan relizion pou zwenn ansam. Kan Bondie ti fer bann Izraelit rant dan enn pei kot bann dimounn ti pe ador lezot bondie, Li ti dir zot: “Fode pa to fer enn lalians avek zot ouswa avek zot bann bondie. . . . Si to servi zot bann bondie, vremem sa pou vinn enn piez pou twa.” (Exod 23:32, 33) Akoz sa, bann Temwin Zeova pa partisip dan sa bann fet-la:

  •  Loy Krathong. Pandan sa fet-la, “bann dimounn fer bann bol ar bann fey, zot met bann labouzi ouswa bann sandal ladan, ek zot larg sa bann bol-la lor delo. Zot panse ki sa bann ti bol-la pou fer zot malsans al lwin ar zot. Me avredir, sa fet-la donn loner Bouda.”​—Encyclopedia of Buddhism.

  •  Vesak. “Se zour pli sakre pou bann Boudis, parski sa zour-la zot selebre Bouda so nesans, so nesans spiritiel, ek so lamor (kan li’nn ariv Nirvana).”​—Holidays, Festivals, and Celebrations of the World Dictionary.

   Bann fet ki ena enn lien ar bann tradision ki pa sorti dan Labib. Zezi ti dir bann sef relizie: “Zot inn fer parol Bondie perdi tou so valer akoz zot koutim.” Li ti osi dir zot ki zot ti pe ador Bondie dan vid, parski zot “lansegnman se komannman bann zom.” (Matie 15:6, 9) Bann Temwin Zeova swiv bien sa lavertisman-la. Akoz sa, zot pa fer sa bann fet-la:

  •  Épiphanie (Timkat ouswa la fête des Rois). Bann dimounn ki fer sa fet-la, zot selebre swa batem Zezi, swa moman ki bann astrolog ti vinn get Zezi. Sa fet-la “inn fer bann fet payin, ki donn loner bann bondie larivier, vinn enn fet Kretien.” (The Christmas Encyclopedia) Dan Letiopi, sa fet-la apel Timkat, ek sa fet-la “form parti zot tradision.”​—Encyclopedia of Society and Culture in the Ancient World.

  •  Lasonpsion. Sa fet-la baze lor krwayans ki Mari, mama Zezi, inn mont dan lesiel ar so lekor fizik. Liv Religion and Society​—Encyclopedia of Fundamentalism dir: “Dan premie siek, bann Kretien pa ti konn sa krwayans-la ek Labib pa koz lor la.”

  •  Immaculée conception. “Immaculée conception [Mari] se pa enn lansegnman ki sorti dan Labib . . . Se Legliz ki ansegn sa.”​—New Catholic Encyclopedia.

  •  Gard karem. Dapre New Catholic Encyclopedia, sa peryod penitans ek karem la inn koumanse dan “katriem siek,” setadir plis ki 200 an apre ki’nn ekrir dernie liv Labib. Konsernan premie zour karem-la, sa ansiklopedi-la dir: “Se an 1091 ki Legliz Katolik (synode de Bénévent) inn fer koutim pou met lasann lor fron bann dimounn pou Merkredi desann, vinn enn kitsoz ki ofisiel.”

  •  La sainte croix (Fête de la Croix). Dan so liv The Religious Studies, Profeser Lubsky dir ki sa fet-la, “se enn parmi bann fet pli inportan ki selebre lakrwa kouma enn sinbol Kretien. . . Pandan fet la sainte croix, zot fer bann gran-gran selebrasion ek sa ena enn gran lefe lor zot bann krwayan.” Selman, bann Temwin Zeova pa servi lakrwa pou ador Bondie.

•  Eski sa fet-la donn loner enn dimounn, enn lorganizasion, ouswa enn lanblem nasional?

   Prinsip Labib: “Ala seki Zeova dir: ‘Modi sa dimounn ki met so konfians dan bann zom la, ki kont lor pwisans bann imin, ek ki’nn vir so ledo ar Zeova.’”​—Zeremi 17:5.

   Mem si bann Temwin Zeova bien kontan zot prosin ek ki zot mem priye pou bann-la, zot pa partisip dan sa bann fet-la:

   Bann fet ki donn loner enn dirizan ouswa enn kikenn ki seleb. Labib dir: “Pou zot bien, aret met zot konfians dan bann dimounn ki respire pou viv. Kifer bizin pran zot kont?” (Izai 2:22) Se pou sa rezon-la ki bann Temwin Zeova pa selebre laniverser enn lerwa ouswa enn larenn.

   Fet ki donn loner drapo enn pei. Bann Temwin Zeova pa donn loner drapo. Kifer? Parski Labib dir: “Res lwin ar bann zidol.” (1 Zan 5:21) Sertin dimounn pa konsider enn drapo kouma enn zidol, setadir kouma enn kitsoz ki bizin donn enn ladorasion. Me enn istorien, ki apel Carlton J. H. Hayes, ti ekrir: “Drapo se sinbol prinsipal lafwa bann dimounn ki nasionalis, ek se kitsoz prinsipal ki zot adore.”a

   Fet ki donn loner bann sin. Ki ti arive kan enn kikenn ti tom azenou devan lapot Pier? Labib dir: “Pier ti fer li leve ek ti dir: ‘Leve; mwa osi mo enn zom parey kouma twa.’” (Zistwar Bann Zapot 10:25, 26) Ni Pier, ni bann lezot zapot pa ti aksepte ki bann dimounn donn zot loner ouswa ador zot. Se pou sa rezon-la ki bann Temwin Zeova pa partisip dan bann fet ki donn loner bann sin, kouma par exanp:

  •  La Toussaint. “Se enn fet ki donn loner tou bann sin . . . Nou pa kone apartir kan ek kifer inn koumans fer sa fet-la.”​—New Catholic Encyclopedia.

  •  La fête de Notre-Dame de Guadalupe. Sa fet-la donn loner “sin ki protez Mexik,” ek sertin dimounn panse ki sa sin-la se Mari, Zezi so mama. Zot dir ki li ti aparet ar enn dimounn ki ti res dan lakanpagn dan lane 1531.​—The Greenwood Encyclopedia of Latino Literature.

  •  Fet Bann Nom (Name Day). Liv Celebrating Life Customs Around the World​—From Baby Showers to Funerals explike ki, kan batiz bann zanfan ouswa kan zot fer zot konfirmasion, donn zot nom bann sin. Fet Bann Nom selebre sa bann sin-la. Liv-la dir osi ki “sa zour-la se enn gran fet relizie.”

   Fet ki donn loner bann parti politik ouswa bann mouvman sosial. Labib dir: “Preferab met nou lavi dan lame LESEGNER, ki fer konfians enn imin.” (Psom 118:8, 9, Psom an Kreol Morisien) Bann Temwin Zeova fer Bondie konfians pou rezoud bann problem ki ena dan lemond, pa bann imin. Akoz sa, zot pa partisip dan bann fet sosial ouswa politik kouma la Journée de la femme, la Journée de la jeunesse, ouswa Labolision Lesklavaz. Okontrer, zot kont lor Rwayom Bondie pou rezoud bann linzistis ek bann problem kouma rasis.​—Romin 2:11; 8:21.

•   Eski sa fet-la donn loner enn pei ouswa enn kominote?

   Prinsip Labib: “Bondie pa fer preferans, me dan tou nasion dimounn ki ena enn gran respe pou li ek ki fer seki drwat gagn so faver.”​—Zistwar Bann Zapot 10:34, 35.

   Mem si bann Temwin Zeova bien kontan zot pei, zot pa fer bann fet ki donn loner enn pei ouswa enn kominote. Parmi sa bann fet-la, ena:

   Bann fet ki donn loner bann militer. Zezi pa ti ankouraz bann dimounn pou al lager. Li ti dir so bann disip: “Kontign kontan zot bann lennmi ek priye pou bann ki persekit zot.” (Matie 5:44) Se pou sa rezon-la ki bann Temwin Zeova pa selebre bann fet ki donn loner bann solda, kouma par exanp:

  •  Anzac Day. “Anzac vedir Australian and New Zealand Army Corps,” ek sa fet-la “tigit-tigit inn vinn enn zour kot rapel bann ki’nn mor pandan lager.”​—Historical Dictionary of Australia.

  •  L’Armistice (Veterans Day). Sa fet-la donn loner “bann veteran ki ti dan larme ek bann ki’nn mor pou zot pei pandan lager.”​—Encyclopædia Britannica.

   Bann fet ki donn loner listwar ouswa lindepandans enn pei. Zezi ti dir so bann disip: “Zot pa fer parti dan lemond, parey kouma mwa mo pa fer parti dan lemond.” (Zan 17:16) Mem si bann Temwin Zeova bien kontan pou aprann listwar zot pei, zot pa partisip dan bann fet kouma:

  •  Australia Day. Dapre Worldmark Encyclopedia of Cultures and Daily Life, sa fet-la selebre “zour ki bann solda Angle ti pik zot drapo dan later Lostrali ek ti fer li vinn enn parmi zot bann koloni an 1788.”

  •  Guy Fawkes Day. Sa zour-la, se “enn fet nasional pou rapel zour kot Guy Fawkes ek bann lezot Katolik pa ti reisi touy Lerwa Jacques 1^e ek fer exploz Parlman [Angle] an 1605.”​—A Dictionary of English Folklore.

  •  Zour Lindepandans. Dan plizir pei, “sa zour-la bann dimounn selebre lindepandans zot pei.”​—Merriam-Webster’s Unabridged Dictionary.

•   Eski pandan sa fet-la bann dimounn konport zot dan enn move fason?

   Prinsip Labib: “Zot finn deza pas ase letan pou fer volonte bann nasion kan zot ti kontign ena enn kondwit devergonde, bann move dezir ki pa kontrole, bwar plis ki bizin, fer bann fet kot pena okenn kontrol, met paryaz bwar, ek pratik lidolatri degoutan.”​—1 Pier 4:3.

   Bann Temwin Zeova swiv sa prinsip-la ek zot pa partisip dan bann fet kot pena okenn kontrol ek kot bann dimounn bwar boukou. Bann Temwin Zeova bien kontan pas letan ar zot bann kamarad, ek si zot bwar lalkol, zot fer sa ar moderasion. Zot fer tou seki zot kapav pou swiv sa konsey Labib la: “Kan zot pe manze, kan zot pe bwar ouswa ninport ki kitsoz ki zot pe fer, fer tou pou laglwar Bondie.”​—1 Korintien 10:31.

   Akoz sa, bann Temwin Zeova pa partisip dan bann karnaval ek dan bann lezot fet kot bann dimounn ena enn konportman ki pa an-akor ar Labib. Parmi sa bann fet-la, ena fet Zwif ki apel Pourim. Mem si pandan lontan bann dimounn inn fer sa fet-la pou rapel delivrans bann Zwif dan sinkiem siek Avan Nou Lepok, liv Essential Judaism dir ki azordi, Pourim se inpe version Zwif fet Mardi Gras ouswa Karnaval.” Boukou zom ki partisip dan sa fet-la, ‘zot degiz zot an fam, zot dekontrole, zot bwar boukou, ek zot fer boukou tapaz.’

 Non. Labib ansegn nou ki nou bizin kontan ek respekte nou fami, mem si zot pa dan mem relizion ki nou. (1 Pier 3:1, 2, 7) Li vre ki kan enn Temwin Zeova aret fer sertin fet, sertin manb so fami kapav tris ouswa ankoler. Se pou sa rezon-la ki boukou Temwin Zeova rasir zot fami ki zot ankor kontan zot. Avek respe, zot explik zot fami kifer zot inn pran sa desizion-la, ek zot fer zefor pou al kot zot fami dan bann lezot lokazion.

 Non. Bann Temwin Zeova panse ki sak dimounn bizin pran so prop desizion. (Zozwe 24:15) Nou “onor tou sort kalite dimounn,” mem si lezot pena mem krwayans ki nou.​—1 Pier 2:17.