Bann Temwin Zeova krwar ki bann prinsip ek bann lalwa dan Labib kapav ed nou pou pran bann desizion ki fer Bondie plezir ek fer nou gagn bann bienfe. (Izai 48:17, 18) Nou pa finn invant sa bann prinsip-la ek bann lalwa, me nou aplik zot dan nou lavi. Anou get sertin lexanp. a

•   Maryaz li enn lalians ki dir pou touletan. (Matie 19:6) Parski bann Temwin Zeova konsider frekantasion kouma enn letap ver maryaz, nou konsider frekantasion kouma enn kitsoz serye.

•   Frekantasion li zis pou bann ki ena laz pou marye. Zot inn pas sa peryod dan lavi enn zenn kot so bann dezir sexiel bien for.​—1 Korintien 7:36.

•   Bann ki pe frekante bizin lib pou marye. Ena dimounn ki’nn divorse dapre lalwa ki ena dan pei, me pou Bondie zot pa lib pou remarye. Parski dapre so bann prinsip, sel rezon valab pou divorse se limoralite sexiel.​—Matie 19:9.

•   Labib donn lord bann Kretien ki anvi marye pou marye zis avek enn kikenn ki ena mem relizion ki zot. (1 Korintien 7:39) Bann Temwin Zeova konpran ki sa lord-la pa aplik ar enn dimounn ki zis respekte nou bann krwayans, me ar enn dimounn ki partaz ek pratik nou bann krwayans antan ki enn Kretien batize. (2 Korintien 6:14) Bondie ti touletan donn lord so bann adorater pou marye selman avek enn kikenn ki partaz mem lafwa ki zot. (Zenez 24:3; Malaki 2:11) Kouma bann spesialis finn trouve, sa lord-la li touzour itil azordi. b

•   Bann zanfan bizin obeir zot bann paran. (Proverb 1:8; Kolosien 3:20) Pou bann zanfan ki viv kot zot bann paran, sa lord-la inplik obeir desizion zot bann paran konsernan frekantasion. Li kapav konsern ki laz enn garson ouswa enn tifi kapav koumans frekante ek bann aktivite ki zot gagn drwa fer.

•   Baze lor bann prinsip Labib, bann Temwin Zeova swazir personelman si zot pou frekante ek kisannla zot pou frekante. Li an-akor avek sa prinsip-la: “Sakenn pou sarye so prop responsabilite.” (Galat 6:5, not) Me kanmem sa, boukou rod konsey bann Temwin ki ena matirite ek ki vremem anvi zot boner.​—Proverb 1:5.

•   An realite, boukou kitsoz ki bann dimounn ki frekante fer, zot bann pese bien grav. Par exanp, Labib donn nou lord pou rezet limoralite sexiel. Li pa inplik zis bann relasion sexiel me osi bann lezot kitsoz ki inpir ant de dimounn ki pa marye, kouma kares sex enn lot kikenn ouswa sex oral ek sodomi. (1 Korintien 6:9-11) Avan maryaz, enn kondwit ki exsit bann dezir sexiel mem si pa al ziska limoralite sexiel li ‘inpir’ ek pa fer Bondie plezir. (Galat 5:19-21) Bann konversasion imoral kouma bann “parol grosie,” zot osi kondane dan Labib.​—Kolosien 3:8.

•   Leker, li tret. (Zeremi 17:9) Li kapav amenn enn dimounn fer bann kitsoz ki li kone move. Pou anpes zot leker tronp zot, bann koup ki pe frekante bizin evit bann sitiasion kot zot pou tousel ek ki kapav fer zot komet enn pese. Zot kapav swazir pou pran bann prekosion rezonab kouma res avek enn group ouswa swazir enn kikenn fiab pou akonpagn zot. (Proverb 28:26) Bann Kretien selibater ki pe rod enn kikenn pou marye rekonet risk ki ena lor bann sit internet sirtou risk ki ena kan devlop enn lamitie avek enn kikenn ki zot pa konn ditou.​—Psom 26:4.