Nou Invit Ou pou Vizit Betel Letazini
“Nou ena bann extra zoli souvenir kan nou ti vizit Betel, zame nou pou bliye sa.” Se seki enn koup ki res Vanuatu ti dir apre ki zot inn vizit batiman bann Temwin Zeova dan Letazini. Li parey osi pou bann dizenn milye dimounn ki fer sa vizit-la.
Eski ou finn deza vizit Betel Letazini? Si non, nou invit ou pou fer li.
Ki ou pou trouve dan trwa batiman prinsipal?
Biro Mondial, Warwick, New York. Vinn vizit nou trwa expozision ki ou kapav fer par oumem. Premie-la so tem se “Labib ek Nom Bondie.” Dan sa expozision-la ena bann Labib bien rar ek li explike kouma finn prezerv nom Bondie dan Labib. Deziem-la so tem se “Enn Pep pou Nom Zeova” ek li montre zistwar bann Temwin Zeova. “Biro Mondial—Lafwa An-aksion” montre kouma bann Temwin Zeova zwenn ansam pou organiz zot, pou etidie Labib, pou partaz mesaz ki ena dan Labib avek lezot ek pou montre lamour anver sakenn zot kamarad. Ou kapav gagn osi enn vizit gide pandan 20-minit ki pou montre bann biro, bann servis ek sertin plas dan Warwick.
Sant Lansegnman Bann Temwin Zeova dan Patterson, New York. Ou pou kapav aprann plis lor bann lekol ki ena laba kouma par exanp, Lekol Galaad ek Lekol pou Bann Manb Komite Biro Nasional ek Zot Madam. Ou pou trouv osi bann lekran ek bann video ki pou koz plis lor travay ki fer dan bann biro administrasion ek osi dan servis artistik ek dan servis odio/video.
Linprimri ek Lexportasion dan Wallkill, New York. Pandan ou vizit gide ou pou trouve kouma inprim ek fer binding Labib ek bann piblikasion ki baze lor Labib avan ki avoy zot dan bann lasanble dan Letazini, dan bann Karaib ek dan bann lezot parti lemond.
Kouma pou rezerv enn vizit?
Avan fer bann laranzman pou vwayaze, silvouple fer enn rezervasion lor nou paz: Vizit Betel. Lor la, ou pou trouv plis linformasion lor bann batiman dan Betel Letazini, zot ladres ek komie letan sak vizit pou dire.
Kisann-la ki pou fer ou vizite?
Se bann dimounn ki travay dan diferan servis dan Betel ki pou fer ou vizite. Pou zot, kan zot fer sa vizit-la se enn fason ki zot pe soutenir travay lansegnman Labib ki fer dan lemond antie. Nou fer sa bann vizit-la dan enn douzenn langaz.
Komie sa vizit-la pou koute?
Nanye. Li gratis.
Eski zis bann Temwin Zeova ki kapav vizite?
Non. Boukou dimounn ki vinn vizite, zot pa bann Temwin Zeova. Ki ou Temwin ouswa non, pou explik ou tou bann travay ki bann Temwin Zeova fer dan lemond antie.
Enn madam mizilman ki ti sorti Lenn ti vizit Patterson. Apre so vizit li ti dir: “Mo ti pou bien kontan pou res isi avek zot. Mersi ki zot finn tret mwa avek boukou respe.”
Eski bann zanfan kapav vini?
Wi biensir! Sa vizit-la kapav ena enn gran lefe lor zot. John, enn viziter ki res Letazini ti ekrir: “Depi ki nou’nn rantre, bann zanfan dan nou group pa ti aret koz lor la. Avan sa vizit-la bann zanfan pa ti kone kouma sa ete, aster-la zot anvi fixe lobzektif pou al servi dan Betel.”
Eski nou kapav vizit batiman bann Temwin Zeova dan lezot pei?
Wi. Nou kapav fer bann vizit dan enn douzenn pei. Pou rod enn landrwa al lor nou paz: Vizit Betel. Nou invit ou pou vinn vizit enn parmi bann biro nasional bann Temwin Zeova.
