LAU na laḡani 1923 ai na vara, Hemsworth, Yorkshire ena taoni ta, England ai. Lau taihugu na tamona, ladana na Bob. Laḡanigu 9 neganai, tamamai na buka haida e abi, unu buka ese tomadiho koikoi edia kara e hahedinarai. Tamamai ese tomadiho edia koikoi karadia na se ura heniva dainai, e duahiva ḡaudia na e moalelai. Laḡani haida muridiai, Bob Atkinson na emai ruma ema bona Tadikaka Rutherford ena tok ta na rekodi misini (o phonograph) amo e hataiava. A laloparara una tok na ai ese abi bukadia e halasi oreana amo. Tamagu bona sinagu na e gwa Tadikaka Atkinson na hanuaboi iboudiai ai ida baia aniani hebou, bona emai henanadai momo e haerelaidia. Ia ese e boirimai tadikaka ta ena ruma ai e karava heboudia baiala, una gabu ena daudau na kilomita haida mo emai gabu amo. Ai na a ura dainai ala, bona Hemsworth ai kongrigeisen maraḡina ta e hematama. Gabeai, ai ese zone taudia (hari e gwauraidiamu seket taudia) na emai ruma ai abidia daeva, bona painia haida a boiridiava baia aniani hebou. Idia ihebamo henidia karana ese lau na e hagoadagu.

Ai ese bisnes ta a hamatamaia, to Tamagu ese taihugu e hamaoroa, “Bema oi na o uramu ba painia, ina bisnes na baita koua.” Bob na e lalotamona, bona laḡanina e 21 neganai painia ḡaukara e karaia matama. Laḡani rua muridiai, lau laḡanigu e 16 neganai, lau danu painia ḡaukara na karaia matama. Wiken ai lau na haida ida na ḡaukarava, to wiki lalodiai nega momo sibogu na ḡaukarava. Lau ese haroro kadidia (o testimony card) bona rekodi misinidia na ḡaukaralaiva. To Iehova ese e hanamogu dainai, egu Baibul stiuden ta na e goadava. Una Baibul stiuden ena ruma bese momo danu gabeai hereva momokani e abia dae. Murina laḡanina ai, lau bona Mary Henshall na spesol painia ḡaukara a karaia matama. Ai raruosi na e siaimai Cheshire hanuana ta, una hanua ena teritori momo na do asie karadia.

Tanobada Tuarina Iharuana ai, hahine na tuari iduruna ḡaukaradia e karava. Ai na spesol painia taumai dainai, a lalo tuari ai na basia vareai, tomadiho ma haida edia haroro taudia e karava heḡereḡerena. To kota taudia ese una na asie abia dae, una dainai e siaigu dina 31 dibura ruma ai baina  noho. Laḡanigu e 19 neganai, lau na nega rua kota nala badina asina ura tuari ai baina vareai. Nega rua kota vairadiai na gini, to egu keis na e koua. Una negai, na diba lauma helaḡa ese e duruguva bona Iehova na vaitani imagu idibana e dogoataova, baine hagoadagu totona.​—⁠Isa. 41:10, 13.

Lau bona Arthur Matthews na laḡani 1946 ai a hedavari. Ia na dibura ruma ai hua toi e noho badina se ura tuari ai baine vareai, to dibura ruma amo e ruhaia murinai, tadina Dennis ida spesol painia ḡaukara e karaiava, Hemsworth ai. Idia na tamadia ese maraḡidia ai Iehova ena dala e hadibadia, bona laḡanidia 16 bona 17 neganai e bapatiso. Se daudau Dennis na e siaia Ireland bainela, bona Arthur na asi bamona. Tamagu bona sinagu ese Arthur ena haroro goadagoada karana na e moalelaia dainai, e boiria idia ida baine noho. Na vadivadi henidiava neganai, nega momo aniani muridiai Arthur ida mereki a huriva. Gabeai, ai raruosi na revareva amo a hetore heheniva. Laḡani 1948 ai, Arthur na ma e siaia dibura ruma ai hua toi baine noho. January 1949 ai raruosi a headava, bona a ura ful-taim hesiai ḡaukara baia karaia. Emai moni a ḡaukaralai namonamova, bona emai holidei negadia ai, ai na fruti gogo ḡaukarana a karaiava unu amo moni a abiva. Iehova ese e hanamomaiva dainai, doini painia ḡaukara a karaiava.

Laḡani ta murinai, ai na e siaimai Northern Ireland baiala, Armagh ala guna, bena una murinai Newry ala, unu taoni taudia momo na Katolik. Unuseniai daḡedaḡe karadia na bada dainai, taunimanima a haroro henidiava neganai a henahua tohova. Tadikaka ta bona adavana edia ruma ai hebou a karava, una gabu ena daudau na 16 kilomita heḡereḡerena. A hebouva taumai na 8. E noimaiva unuseniai baia mahuta neganai, floa ai a hekureva bona daba ai aniani namodia a moalelaiva. A moalemu badina hari ina negai una gabu ai Witnes taudia na momo herea.

Kakagu bona adavana, Lottie, danu Northern Ireland ai e spesol painiava, bona laḡani 1952 ai, taumai haniosi na Belfast ena distrik hebouhebou ta ala. Tadikaka ta ese ai taumai haniosi bona guna Britain brens e nariava tadikakana Pryce Hughes na e abimai dae ena ruma ai baia noho. Hanuaboi ta ai, buklet matamatana God’s Way Is Love, a herevalaiava, una buklet na Ireland taudia idurudia totona e karaia. Tadikaka Hughes na e gwa Irish Republic ai Katolik taudia iharoro henidia karana na auka. Tadikaka na edia noho gabudia amo e luludiava bona dubu igunalaina taudia ese taunimanima e hagoadadiava tadikaka bae daḡedaḡe henidia. Pryce na e gwa: “Ai na a uramu headava taudia mai edia motuka ese ina buklet na ina tano ibounai lalonai bae hariharilaia.” *Bena ai na maoromaoro a gwa, “Baia karaia!” Una na sivarai matamana ai na gwauraia herevana.

 Dublin ai, painia taudia na nega momo Ma Rutland ena ruma ai e nohova, ia na laḡani daudau Iehova e hesiai henia taihuna ta. Unuseniai a noho bona emai kohu haida a hoihoilai murinai, taumai haniosi na Bob ena motubaik mai ena sidecar ai a gui bena motuka itahudia ala. Motuka gunana ta a davaria bena a hoia, to asi taritari dibamai dainai una motuka e hoihoilaia tauna a noia baine taria. Una hanuaboina ai, Arthur na bedi ai helai bona motuka itarina dalana e lalohadailaiava. Dabai, ia na e ura motuka baine taria lasi neganai, misinari taihuna Mildred Willett (gabeai John Barr e adavaia) ema. Ia na mai taritari dibana! Ia ese taritari dalana e hadibamai murinai, ai na a heḡaeḡae baiala totona!

Gabeai, ai na noho gabudia a tahuva. Tadikaka ese e hadibamai trailer ai na basia noho badina badu taudia ese lahi ai bae gabua garina, una dainai ai na ruma a tahuva, to ta asia davaria. Una hanuaboi ai taumai haniosi na motuka ai a mahuta. Daba ai, trailer ta a itaia, una na haida ese imadia amo e karaia ḡauna bona lalonai na bedi rua. Una na emai ruma ai ela. Moale ḡauna na, emai trailer na taunimanima namodia edia gabu ai atoava neganai dika ta se varava. A kara teritoridia edia daudau na 16 ela 24 kilomita. Emai ḡaukara e oreva murinai, a louva trailer a atoa gabuna bona unuseniai e nohova taudia a haroro henidiava.

Irish Republic ena saut hanuadia iboudiai a vadivadidia neganai, dika ta emai ai se vara. Ai ese buklet 20,000 mai kahana a hariharilai bona e kamonai taudia ladadia na Britain brens ofesi a siai lao. A moalemu badina hari unu hanua ai Witnes taudia momo herea e nohomu!

Gabeai, ai na saut London e siaimai. Pura haida muridiai, Britain brens ofesi tadikakadia ese Arthur e noia seket ḡaukara baine karaia! Pura ta lalonai treinin e abi murinai, Scotland ala. Arthur na asi ena nega ena tok baine heḡaeḡaelai, to ia na Iehova ihesiai henina ai baine davari hahetohodia baine hanaidia totona e heḡaeḡae, una ese lau na e hagoadagu. Emai seket ḡaukara na a moalelaiava. Laḡani haida lalodia daudau teritori a karava, bona hari tadikaka bona taihu momo bogaraḡidiai a nohomu dainai a moalemu.

Laḡani 1962 ai, Arthur na e boiria hua 10 lalonai Gilead Sikuli baine karaia, una neganai abi hidi badana ta a karaia. Ai na a lalo tamona, ena be Arthur na sibona be laomu, to una hahenamo baine abia dae na namo. Lau na asi painia bamogu dainai, e siaigu lou Hemsworth ai baina spesol painia. Arthur na laḡani ta murinai e lou neganai, e siaimai distrik ḡaukara baia karaia Scotland, northern England, bona Northern Ireland ai.

Laḡani 1964 ai, Arthur na asainmen matamatana ta e abia, Irish Republic ai brens baine naria. Distrik ḡaukara na a moalelaiava dainai, matamanai na gari betele bainala. To hari, na moalemu badina betele ai na ḡaukaramu na hahenamo ta. Na abia daemu bema oi na so ura heniamu asainmen ta o abia daemu, Iehova ese nega iboudiai be hanamomumu. Betele ai, lau na ofesi ḡaukaradia na karava, buka na boksi ai na udadiava, na nanaduva, bona gabu na haḡoevava. Nega haida na distrik ḡaukara a karaiava bona tadikaka taihu momo a hedavari henidia. Danu, emai Baibul stiuden e goada e laova, bona Ireland ai emai hetura karana tadikaka taihu ida na e goada. Una na hahenamo ta!

Laḡani 1965 ai, Ireland ai intanesinol hebouhebou ginigunana na Dublin ai e heabi. * Ena be daḡedaḡe karana e vara, to hebouhebou na e heau namonamo. Taunimanima 3,948 e hebou, bona 65 e bapatiso. Dublin taudia ese una hebouhebou ela taudia iboudiai 3,500 na e abidia dae edia ruma ai bae noho, una dainai edia tenkiu revarevadia e abi. Danu, ruma taudia ese unu tadikaka taihu na edia kara namodia dainai e hanamodia. Una ese Ireland taudia na e durudia bada herea.

Laḡani 1966 ai, not bona saut Ireland na Dublin brens ofesi henunai e ḡaukara hebouva​—⁠una motumotu ai politikol bona tomadiho karadia ese taunimanima na e hapararadia. Ai na a moale badina a itaia Katolik taudia momo na hereva momokani ai e vareai bona guna Protestan dubu e badinaia tadikakadia ida e ḡaukara hebouva.

Laḡani 2011 ai, Britain bona Ireland edia brens na e hatamonadia bona ai na London Bethel e siaimai. Una negai, lau na Arthur ena gorere dainai na lalohekwarahi. Ia na Parkinson gorerena e abia. May 20, 2015 ai e mase, ai raruosi na laḡani 66 lalodiai a ḡaukara hebou.

E hanai laḡanidia lalodiai, na lalohisihisi bada bona na daradoko. Guna, Arthur na hanaihanai lau e duruguva. Na reaia bada hereamu! To hekwakwanai unu bamodia bo davarimu neganai, emu hetura karana Iehova ida na be goadamu. Na moalemu badina momo ese Arthur na e lalokau henia badava. Ireland, Britain, bona United States amo bamo namodia edia revareva na abiva. Unu revareva bona Arthur tadina Dennis, adavana Mavis, bona lalagu Ruth bona Judy ese lau na e hagoadagu bada herea.

Lau e hagoadagu sirina ta na Isaia 30:18. E gwaumu: “Iehova na e henarimu, baine hanamomui e tomamu; taunabunai ia na e tore isimu, baine bogamui hisi e tomamu. Badina be Iehova na hahemaoro ḡoevaḡoeva Diravana; ia e nariamu taudia iboudiai na nanamo.” Na moalemu badina na dibamu Iehova na mai ena haheauka ida e narimu eda hekwakwanai baine haoredia bona iena tanobada matamatana ai ḡaukara namodia baine henida.

Emai mauri lalonai a kara ḡaukaradia na lalo loumu neganai, na dibamu Iehova ese e hakaumai bona Ireland ai emai ḡaukara na e hanamoa! Una ḡaukara ai na heduru dainai na moalemu. Momokani, Iehova ena ura baita karaiamu neganai, hahenamo momo baita abimu.