HARI ina nega ai momo na e uramu ma haida ese idia sibodia mo bae kara namo henidia. Bona e kara namo henidiamu neganai, dounu e laloamu idia ediai una na dia heḡereḡere. Baibul ese e hahedinaraia lalohadai bona kara unu bamodia na dina gabedia toadia.—2 Tim. 3:2.

To, una na dia kara matamatana ta. Heḡereḡere, Adam bona Heva na e urava sibodia abi hidi bae kara dahaka be namo bona dahaka be kerere, to mai dibada lalohadai unu bamona ese dika bada e havaraia. Laḡani handred momo muridiai, Iuda ena King Usia na e laloava ia na mai ena maoro dubu helaḡa ai muramura mai bonana baine gabua, to una na dia ia ena ḡaukara. (2 Sis. 26:​18, 19) Una heḡereḡerena, Farisea bona Sadukea taudia na e gwauva idia tubudia na Abraham dainai, Dirava ese idia baine kara namo henidia.—Mat. 3:9.

Ita na, sibodia e helalo badamu taudia bogaraḡidiai ta nohomu, bona edia kara ese laloda bae veri diba. (Gal. 5:26) Bena da baita lalomu lau danu idia ese e abimu hahenamodia nama abi eiava lauegu na bema bada. Una lalohadai be ede baita dadaraia toma? Una baita dibaia totona, Iehova ese una kara e laloamu dalana aita itaia. Baibul ena hahekau herevadia rua ese be durudamu.

Iehova sibona ese ita ta tahumu ḡaudia baine henida. Haheitalai haida aita ita.

• Iehova na e uramu tau na baine mamia adavana ese ia na e matauraiamu, hahine danu adavana ese baine lalokau henia be namo. (Efe. 5:33) Iehova na e gwa headava tau bona hahine na mai edia maoro edia heura heheni bae hahedinarai, to dia tau o hahine ma ta enai. (1 Kor. 7:3) Danu, natu ese tamadia sinadia bae matauraidia  na maoro, bona natu na mai edia maoro tama sina edia henari bona lalokau bae mamia.—2 Kor. 12:14; Efe. 6:2.

• Iehova na e gwa kongrigeisin ese e ḡaukara goadamu elda taudia bae matauraidia na maoro. (1 Tes. 5:12) To, elda taudia na asi edia maoro tadikaka taihu bae biagudia.—1 Pet. 5:​2, 3.

• Dirava ese tanobada gavamanidia na maoro e henidia tax bae gogo bona e itadia taomu taudia ese bae matauraidia.—Roma 13:​1, 6, 7.

Iehova na mai lalokauna ida e heni ḡauna ese ita ta laloamu ḡauna e hereaia. Badina ita na kara dika tauda dainai, baita mase diba. (Roma 6:23) To Iehova na dounu ena mia hanaihanai lalokauna dainai, mai ena ura ida hahenamo idauidau e henidamu. (Sal. 103:​10, 11) Iehova ena hebogahisi hereadaena dainai hahenamo momo ta davarimu.—Roma 12:​6-8; Efe. 2:8.

Tanobada ena lalohadai amo ba henahua toho. Haida ta hereadia lalohadaina, na baita abia matamamu, to siboda ese una na basita dibaiamu. Iesu ese e gwauraia haheitalaina amo ta dibamu lalohadai unu bamona na ta lalonai baine vara diba. Ḡaukara taudia haida na daba amo ela adorahi dina siahu ai e ḡaukara; haida be hora tamona heḡereḡerena e ḡaukara. Dina idoinai e ḡaukara taudia na e laloava be abiamu peina na bada hora tamona e ḡaukara taudia edia amo. (Mat. 20:​1-16) Una haheitalai amo Iesu ese e hahedinaraia, ia murinai e rakamu taudia ese Dirava ena amo e abimu hahenamodia, na mai moaledia ida bae abidae.

Ta abimu hahenamodia daidiai baita moale, to basita mataḡaniḡani. (1 Tes. 5:18) Aposetolo Paulo baita tohotohoa, ia na Korinto tadikakadia ediai ena dabu ḡaudia na se noiva ena be dala na hekeho unu baine kara toma. (1 Kor. 9:​11-14) Namona na taunimanima ese e henidamu ḡaudia daidiai baita moale to basita mataḡaniḡani.

Ba manau. Bema ta na sibona mo be helalo badamu, ia enai ḡau momo iabidia lalohadaina vada be hematamamu. Bema baita manaumu, una ese be durudamu lalohadai dikadia baita dadaraimu.

Peroveta tauna Daniel na haheitalai namona manau karana ai. Ia na mai ḡaukara dibadia  bona aonega ruma besena amo ema. Daniel na raho namo, mai aonegana bona ḡaukara momo mai dibana. Unu ḡau daidiai bema lalo, haida ese bae matauraia bada bona ena dagi ese haida edia e hereadia. (Dan. 1:​3, 4, 19, 20) To, Daniel na e manau, una kara dainai Iehova matana ai ia na mai anina bada.—Dan. 2:30; 10:​11, 12.

Siboda basita helalo bada, hari ina negai tanobada heḡeḡemadai hekokoroku karana na de bada herea. To, hanaihanai Iehova ese ena hebogahisi mai lalokauna amo e henidamu hahenamodia baita moalelai.