Iesu do se mase ai, ini e gwau toma: “Basileia sivaraina namona na tanobada idoinai bae harorolaia, bese iboudiai ihadibalaidia; bena dokona vada baine kau.” (Mataio 24:14) To una hereva be ede baine ḡuḡuru toma? Iesu ena haroro dalana ibadinana amo una hereva baine ḡuḡuru.—Luka 8:1.

Ruma ta ta ai. Iesu ese ruma ta ta ai sivarai namona iharorolaina dalana na aposetolo taudia e hadibalaidia. (Mataio 10:11-13; Kara 5:42; 20:20) Idia na Iesu ese e gwauraiva gabudiai mo e harorova. (Mataio 10:5, 6; 2 Korinto 10:13) Emai haroro ḡaukara danu unu a karaia tomamu, bona kongrigeisen ta ta na mai edia haroro gabudia. Unu amo Iesu ena haheḡani heḡereḡerena, sivarai namona na ‘taunimanima vairadiai a harorolaiamu bona a gwauraia hedinarai’ namonamomu.—Kara 10:42.

Gabu idauidau ai. Iesu na kone, ranu guri badidiai, bona gabu idauidau ai taunimanima e haroro henidiava danu. (Mareko 4:1; Ioane 4:5-15) Ai danu dala ai, bisinesi gabudiai, kone badidiai, eiava telefon amo taunimanima ida Baibel a herevalaiamu. Nega haida dekemai taudia, a ḡaukara heboumu taudia, a sikuli heboumu taudia bona varavaramai a haroro henidiamu. Unu dala idau-idau a badinamu dainai, tanobada heḡeḡemadai hutuma ese “hahemauri” sivaraina e kamonaiamu.—Salamo 96:2.

O uramu daika enai Dirava ena Basileia sivarai namona bona vairai bae vara ḡau namodia ba herevalai? Namona na basio hunia to ma haida ba hadibalaidia!

• Edena ‘sivarai namona’ baia harorolaia na namo?

• Iehova ena Witnes taudia ese Iesu ena haroro dalana be ede e badinaia tomamu?