Ieremia 28:1-17
28 Una laḡani tamona ai, Sedekia, Iuda pavapavana, ena lohia negana matamana ai, laḡani ihahanina huana iha-imana ai, Hanania Asuru, peroveta tauna Gibeon amo, ese e hereva henigu, Iehova ena dubu ai, hahelaḡa taudia bona taunimanima iboudiai vairadiai, eto,
2 Iehova Sabaota, Israel Diravana, na ini e gwau tomamu: Babulono pavapavana ese e atoa madunana vada na hakwaidua.
3 Laḡani rua do basie ore ai, Iehova ena dubu kohudia iboudiai, Nebukadnesara, Babulono pavapavana, ese ina gabu amo e abi oho Babulono e laohai ḡaudia, na lau ese baina loulai ina gabu ai.
4 Bona Iekonia, Iuda pavapavana Iehoiakim natuna, bona Iuda amo Babulono e laohaidia taudia iboudiai danu, lau ese baina hakaudia lou mai ina gabu ai, badina be Babulono pavapavana ese e atoa madunana na baina hakwaidua. Iehova na e herevamu.
5 Bena peroveta tauna Ieremia ese peroveta tauna Hanania e hereva henia, hahelaḡa taudia bona Iehova ena dubu Ialonai e gini taudia iboudiai vairadiai.
6 Peroveta tauna Ieremia eto, Amen! Iehova unu baine kara toma baine namo. Iehova ese oiemu peroveta herevadia baine hamomokanidia, Iehova ena dubu kohudia iboudiai bona abi-mauri taudia danu na Babulono amo baine loulaidia ema bona ina gabu, una na baine namo.
7 Ḡau tamona, ina hereva oi vairamu ai bona taunimanima iboudiai vairadiai na gwauraiamu na ba kamonai.
8 Peroveta taudia, ita raruosi e gunalaida taudia, ese nega gunadia amo tuari bona doe bona dai-hanai goreredia na tano momo bona basileia badadia latadiai e perovetalai.
9 A maino e perovetalaiamu tauna be una peroveta tauna ena hereva anina baine vara negana ai vada bae diba momokani, Iehova ese una peroveta tauna vada e siaia.
10 Bena peroveta tauna Hanania ese maduna audia na peroveta tauna Ieremia aiona amo e abidia, bena e hakwaidudia.
11 Bena Hanania na taunimanima iboudiai vairadiai e hereva, eto, Iehova ini e gwau tomamu: Laḡani rua do basie ore ai lau ese Nebukadnesara, Babulono pavapavana, ese e atodia madunadia na bese iboudiai aiodia amo unu baine hakwaidudia toma. Bena peroveta tauna Ieremia na ena ura dalana amo ela.
12 Peroveta tauna Hanania ese maduna audia na peroveta tauna Ieremia aiona amo e hakwaidudia murinai, nega taina vada ela, bena Iehova ena hereva na Ieremia enai e kau, eto,
13 Aola, Hanania ba hamaoroa, baoto, Iehova ini e gwau tomamu: Oi ese au madunadia vada o hakwaidudia, a lau ese auri madunadia baina kara, idia ibolodia.
14 Badina be Iehova Sabaota, Israel Diravana, na ini e gwau tomamu: Lau ese ini bese iboudiai aiodia ai auri madunadia vada na atodia, Nebukadnesara, Babulono pavapavana, isiaina ilao-henina ḡaudia; bona idia ese ia isiaina bae lao heni, badina be lau ese tanobada boromadia danu vada na henia.
15 Bena peroveta tauna Ieremia ese peroveta tauna Hanania e hamaoroa, eto, Hanania e, a kamonai! Iehova ese se siaimu; bona oi ese ina bese taudia lalodia e ha-uradia bena koikoi herevana vada e abidadama henia.
16 Taunabunai, Iehova ini e gwau tomamu: A itaia, lau ese tanobada kopina amo baina abimu oho; hari ina laḡani lalonai vada ba mase, badina be Iehova igwau-edeede-henina herevadia vada o gwaurai.
17 Una laḡani lalonai, hua ihahituna ai, peroveta tauna Hanania na e mase.
