Mũrungu naathuranĩĩre nciarwa cia Iburahimu baa mũgongo jũmũnene, na arabanenkera mawaatho jaawe. Mũgongo jũu ajwĩtĩre “Isiraeli” na ajũethia jwa kũrũngamĩĩra ũthaathayia bwa mma, na kũmenyeera rũteto rwawe. (Zaburi 147:19, 20) Kwou, antũ ba mĩgongo yonthe barĩngĩgunĩka gũkũrũkĩĩra Israeli.—Thooma Kiambiriria 22:18.

Mũrungu naathuurĩre Aisraeli batwĩke akũũjĩ baawe. Rũgono rwao rwa karaaja nĩ kĩonanĩĩria kĩa ũrĩa antũ batharimĩkaga baathĩkĩra mawaatho ja Mũrungu. (Kuriikanithia Maathana 4:6) Kwou, gũkũrũkĩĩra Aisraeli, antũ bangĩ barĩngĩũmba kũmenya Mũrungu wa mma.—Thooma Isaya 43:10, 12.

Nyuma ya kagiita, Aisraeli nĩbaaregerwe nĩ Jehova, na araambĩrĩria kĩũthũrano kĩa Gĩkristũ antũ a mũgongo jũu. (Mathayo 21:43; 23:37, 38) Nandĩ, antũ a Aisraeli, barĩa batumĩkaga barĩ Akristũ ba mma, nĩ Akũũjĩ ba Jehova.—Thooma Mathithio 15:14, 17.

Jesũ aathuranĩĩre athingati baawe batũmĩĩrie na baeethie antũ ba mĩgongo yonthe aritwa baawe. (Mathayo 10:7, 11; 24:14; 28:19, 20) Ngũgĩ ĩjĩ ĩrĩ akuĩ gũkinya mũthia, matukũũne jaja ja mũthiro. Nĩ ũntũ bũtoonekana kaĩrĩ, Jehova kũgwatithania antũ mirioni inyiingĩ kuuma mĩgongo yonthe, kĩrĩ ũthaathayia bwa mma. (Kugwurirwa 7:9, 10) Akristũ ba mma nĩbathuranĩrĩtwe nĩkenda bekanĩra inya na bateethania. Nthĩgũrũne yonthe, nĩbagwĩragĩrua mũtaratara jũmwe jwa ũritanĩ bwa kĩmaandĩko mĩcemanĩone yaao.—Thooma Ahibirania 10:24, 25.

Mĩakeene ya 1870, gakuundi kaniini ka aritwa ba Bibiria nĩ kaambĩrĩĩrie gũciũkĩrwa nĩ ũritani bwa mma bwa Bibiria bũrĩa bwarĩ bũgũtewa. Nĩbaijĩ atĩ Jesũ naarĩ akũthuranĩra athingati baawe batũmĩĩria nkuma ĩnjega, kwou, nĩbaambĩrĩrie kampĩĩni ĩnene ya nthĩgũrũne yonthe ya gũtũmĩĩria Ũnene bwa Mũrungu. Mwakene jwa 1931 nĩbaambĩrĩrie gwĩĩtwa Akũũjĩ ba Jehova.—Thooma Mathithio 1:8; 2:1, 4; 5:42.

Ĩgiitene rĩa Akristũ ba mbere, biũthũrano bia Gĩkristũ kuuma nthĩgũrũ inyiingĩ, nĩbiagunĩkaga kuumania na ũtongeeria bwa kĩama kĩrĩa gĩatongagĩĩria kĩrĩa gĩetĩkĩĩre Jesũ eethĩrwa arĩ Kĩongo kĩa kĩũthũrano. (Mathithio 16:4, 5) Kinya nandĩ, Akũũjĩ ba Jehova nthĩgũrũne yonthe, nĩbagunĩkaga kuumania na ũtongeeria bwa Kĩama kĩrĩa Gĩtongagĩĩria kĩa akũrũ barĩna kĩrĩra kĩa mĩaka ĩmiingĩ. Nĩkĩrũngamĩĩrĩte ndwang’i cia obici cia Akũũjĩ ba Jehova irĩa itaũraga, igacaba mauku, na kũgaa into bia ũritani bwa Bibiria na mĩgambo nkũrũki ya 600. Na njĩra ĩu, Kĩama kĩrĩa Gĩtongagĩĩria nĩkĩũmbaga gwĩkanĩra inya na njĩra ya kĩmaandĩko, na gũtongeeria biũthũrano nkũrũki ya 100,000 nthĩgũrũne yonthe. Kĩrĩ o kĩũthũrano, arũme barĩa baagĩrĩte nĩbo batumĩkaga barĩ akũrũ, kana ategeeri. Arũme bau nĩbamenyagĩĩra ũrĩĩthi bwa Mũrungu na wendo.—Thooma 1 Petero 5:2, 3.

Akũũjĩ ba Jehova nĩbathuranĩrĩtwe gũtũmĩĩria nkuma ĩnjega, na kweethia bangĩ aritwa ba Jesũ. O ta atũmwa, tũtũmagĩĩria nyomba kwa nyomba. (Mathithio 20:20) Kinya nĩtũcieejanaga kũritana Bibiria barĩa beendaga kũmenya ũmma. Ĩndĩ Akũũjĩ ba Jehova tĩ ũthuranĩri o ũu akĩ. Tũrĩ ba nja ĩmwe ya Baaba ũrĩna wendo. Twĩ nĩ ataana na aarĩ ba baaba barĩa bamenyanagĩĩra. (2 Athesalonike 1:3) Tontũ antũ ba Jehova bathuranĩrĩtwe nĩkenda bagwĩria Mũrungu na bateethia bangĩ, bo nĩ nja ĩrĩna kũgwĩrua nkũrũki nthĩgũrũne.—Thooma Zaburi 33:12; Mathithio 20:35.