Antũ bagũrene orĩo, berĩgagĩĩra kũgwĩrua kũrĩa bethagĩrwa naku ntukũ yaao ya mũranũ gũgatũũra kenya na kenya. Na bũu nobũmbĩke. Akristũ barĩa bethĩrĩtwe bagũrene ĩgiita rĩraaja, na barĩa bethĩrĩtwe bagĩciũmagia gũtumĩra ũtaaro bwa Bibiria, nĩbaijĩ ũntũ bũu no bũmbĩke.

1. Nĩ ũtaaro bũrĩkũ Bibiria ĩejaga akũrũ?

Jehova naete mũkũrũ kaanya ga kwĩthĩrwa arĩ kĩongo kĩa nja. (Thooma Aefeso 5:23.) Jehova erĩgagĩĩra mũkũrũ atua matua jarĩa jakaguna nja yaawe. Bibiria ĩejaga akũrũ ũtaaro bũbũ: “Endageni aka benu.” (Aefeso 5:25) Kũu nĩkuuga atĩa? Mũkũrũ ũrĩna wendo athithagĩria mwekũrũ waawe na njĩra ya kĩao rĩrĩa barĩ nja, ona kinya rĩrĩa barĩ kĩrĩ mwingĩ. Namũkaragia kuumania na mogwati, na akathithia jonthe jarĩa akũũmba nĩkenda amwingĩria mobatu jaawe ja kĩmwĩrĩ, na ja kĩmathũgaanio. (1 Timotheo 5:8) Ũntu bwa gĩtũmi nkũrũki, natongagĩĩria kĩrĩ kwingia mobatu ja gĩkĩrundu ja mwekũrũ waawe. (Mathayo 4:4) Ngerekano, omba kũromba na kũthooma Bibiria amwe na mwekũrũ waawe. Rĩrĩa mũkũrũ athithĩria mwekũrũ waawe na njĩra ya wendo na kũmũmakĩra, ũcoore bwawe na Jehova nĩbwĩtaga na mbere.—Thooma 1 Petero 3:7.

2. Nĩ ũtaaro bũrĩkũ Bibiria ĩejaga ekũrũ?

Rũteto rwa Mũrungu rugaga atĩ o mũka “nakirage murumewe.” (Aefeso 5:33) Nĩatĩa omba kũthithia ũu? Omba kũthũgaanĩria bwegie nkuma injega cia mũkũrũ waawe na ũrĩa aciũmagia nĩkenda amũmenyeera, na amenyeera aana baao. Kinya omba kũmwonia gĩtĩĩo na njĩra ya kũgwata mbaru matua jarĩa akũthithia, na kinya kũmwarĩria na njĩra ya kĩao, na kwaria bwega bũmwegie, kinya ethĩrwa tĩ mũthathayia wa Jehova.

3. Nĩatĩa barĩa bagũrene bomba gwĩkĩra inya ngũrano yaao?

Bibiria yugaga ũjũ bwegie barĩa bagũrene: “Bo-bairi bakaa mwiri jumwe.” (Mathayo 19:5) Kũu nĩ kuuga babuĩrĩte kũrwa na ũntũ bunthe bũrĩa bũũmba gũtũma baathũkana. Bathigagia ũu na njĩra ya gũtumĩra kaanya amwe magiita jamaingĩ, na kwĩrana ũrĩa muntũ akwigua, na jarĩa jarĩ nkorone na mathũgaanione. Batĩrekagĩĩria muntũ kana gĩntũ kinya kĩrĩkũ kĩthĩrwa kĩrĩ kĩa gĩtũmi nkũrũki ya ũrĩa bagũrene nawe, tinga Jehova akĩ. Nĩbaimenyagĩĩra mono batĩgakũrie ũcoore bũtĩagĩrĩte na muntũ ũngĩ kinya ũrĩkũ.

 ĨNJA NKŨRŨKI

4. Akũrũ—endeni ekũrũ benu na bũbamenyeere

5. Mwekũrũ—Enda na ũtĩĩe mũkũrũ waaku

Bibiria ĩĩraga mwekũrũ atĩĩe mũrũmewe kinya kethĩra tĩ mũtumĩkĩri wa Jehova. Thooma 1 Petero 3:1, 2, rĩu bwarĩĩrie bĩũria bibi:

• Kethĩra mũkũrũ waaku atĩĩtĩkĩtie, no mwanka wĩthĩrwe nĩ wendaga mono athathayia Jehova. Ũrĩthũgaania nĩ njĩra ĩrĩku ĩnjega ya kũmũtethia—nĩ kũmũtũmĩrĩria rĩonthe kana nĩ kwĩthĩrwa ũrĩ mwekũrũ ũmwega, ũrĩna kĩao, na gĩtĩĩo? Nĩkĩ ũgũcookia ũu?

Mũkũrũ na mwekũrũ bomba gũtua matua jameega barĩ amwe. Amwe nou, magiita jamwe mwekũrũ no arege gwĩtĩkanĩĩria na mũkũrũ waawe. Ũntũne ta bũu, mwekũrũ no auge ũrĩa akũthũgaania na njĩra ya ũboreru na gĩtĩĩo, ĩndĩ no mwanka amenye atĩ Jehova naete mũkũrũ kaanya ka gũtua nĩ mantũ jarĩkũ jakwagĩra kĩrĩ nja  yaao. Nabuĩrĩte gũciũmia ũrĩa akũũmba nĩkenda agwata mbaru matua ja mũkũrũ waawe. Rĩrĩa athithia ũu, natũmaga gũkethĩrwa na kũgwĩrua ndene ya nja. Thooma 1 Petero 3:3-5, rĩu bwarĩĩrie kĩũria gĩkĩ:

• Nĩatĩa Jehova aigagua rĩrĩa mwekũrũ atĩĩa mũkũrũ waawe?

6. Womba gũcinda mathĩĩna ndene ya nja

 NA NJĨRA ĨNKUĨ

Mũkũrũ na mwekũrũ boomba kwĩthĩrwa na kũgwĩrua rĩrĩa bonania wendo, gĩtĩĩo, na batumĩra moritani ja Bibiria.

Gũcookera

• Nĩatĩa mũkũrũ omba gũtũma ngũrano yaawe ĩthĩrwa na kũgwĩrua?

• Nĩatĩa mwekũrũ omba gũtũma ngũrano yaawe ĩthĩrwa na kũgwĩrua?

• Kethĩra ũrĩ ngũranone, nĩ moritani jarĩkũ ja Bibiria jomba gũgũtethia gwĩkĩra inya ngũrano yaaku?