KĨTHOOMO KĨA 40
Nĩatĩa Tũumba Kwaa Baatheru Methone ja Mũrungu?
Ũthũgaanĩria mũciari ũrĩna wendo athuranĩrĩte mwana waawe nĩkenda eeta cukuru. Agatigiira akũthamba na nguũ ciawe nĩ intheru. Ũntũ bũbũ bũgatũma mwana waao ethĩrwa na ũgima bũbwega bwa mwĩrĩ na bũkonania atĩ aciari baawe nĩbakũmũmenyeera bwega. Ũu no uu, Baaba weetũ wa wendo, Jehova, akwenda twĩthĩrwa tũrĩ baatheru—kĩmwĩrĩ, kĩmathũgaanio, kĩrĩ jarĩa twaragia ona kinya kũthithia. Rĩrĩa twaa antũ baatheru, nĩtũgunĩkaga twingwa na tũkaretera Mũrungu ũkumio.
1. Nĩatĩa tũũmba kũthingatĩĩra ũtheru bwa mwĩrĩ?
Jehova arĩtwĩra: ‘Twejage baatheru.’ (1 Petero 1:16) Nĩkenda twĩthĩrwe tũrĩ baatheru, no mwanka twĩthĩrwe na mĩtugo yagĩri na tũtheri kĩmwĩrĩ. Twomba kwaa baatheru na njĩra ya kũmenyeria kũthamba mwĩrĩ, kũũra nguũ cietũ, kũtheria nja cietũ, kũmenyeera kũthambia ngarĩ, bikibiki kana kinya baicikiri irĩa tũtumagĩra. Twomba gũtetheeria kũtheria Nyomba cietũ cia Ũnene. Rĩrĩa twamenyeera ũtheru na njĩra ĩu, nĩtũretagĩra Jehova ũkumio.—2 Akorintho 6:3, 4.
2. Nĩkenda twaa baatheru, nĩ mĩtugo ĩrĩkũ tũkũbatara kwebana nayo?
Bibiria ĩtwĩraga “twitheragieni tutigane na untu kinya buriku buria buthuukagia miiri ya antu o na nkoro ciao.” (2 Akorintho 7:1) Kwou, nĩtũciũmagia kwebera ũntũ kana gĩntũ kinya kĩrĩkũ kĩrĩa kĩũmba kũthũũkia mĩĩrĩ yeetũ kana mathũgaanio jeetũ. Mathũgaanio jeetũ jabuĩrĩte kũgwĩria Jehova, nĩkĩo tũciũmagia ũrĩa tũkũũmba kũregana na mathũgaanio jatĩagĩri. (Zaburi 104:34) Kinya nĩtũciũmagia gũtumĩra biugo bibiega.—Thooma Akolosai 3:8.
Nĩ mantũ jarĩkũ jangĩ joomba gũtũma tũkethĩrwa tũtĩtheri kĩmwĩrĩ na kĩmĩtugo? Into bimwe birĩa tũtumagĩra biomba kũthũũkia mĩĩrĩ yeetũ. Kwou, nĩtũciebanagia na ũtumĩri bwa thigara, mĩraa na ndawa cia mbogita. Rĩrĩa twaciebania na into biu, nĩtwĩthagĩrwa na ũgima bũbwega bwa mwĩrĩ, na tũkonania nĩtũgũtĩĩa kĩewa kĩa mwoyo. Kinya nĩtũciũmagia kwĩthĩrwa na mĩĩtĩre ya wagĩru na njĩra ya gũciebania na mĩtugo ĩtĩagĩrĩte ya gũtega ponografia, na mĩtugo ĩmĩthũũku ya gũũkia irũngo bietũ bia ũciari. (Zaburi 119:37; Aefeso 5:5) No bwĩthĩrwe bũrĩ ũntũ bũbũũmũ gũtigana na mĩtugo ĩu, ĩndĩ Jehova omba gũtũtethia kũthithia ũu.—Thooma Isaya 41:13.
ĨNJA NKŨRŨKI
Iritane nĩkĩ tũtĩĩaga Jehova rĩrĩa twathĩngatĩĩra mantũ ja ũtheru, na wone ũrĩa ũũmba gũcinda mĩtugo ĩtĩagĩrite.
3. Kwĩthĩrwa tũtheri kĩmwĩrĩ nĩkũretagĩra Jehova ũkumio
Twomba kũmenya ũrĩa Jehova onaga ũtheru na njĩra ya gũcũnkũũna mawaatho jaawe jarĩa aeere mũgongo jwa Israeli. Thooma Kuuma 19:10 na 30:17-19, rĩu bwarĩĩrie biũria bibi:
-
Nĩatĩa mĩstaarĩ ĩu ĩkũgwũra maoni ja Jehova jegie ũtheru bwa kĩmwĩrĩ?
-
Nĩ mantũ jarĩkũ ũbuĩrĩte kũmenyeria kũthithia nĩkenda ũkara ũtheri kĩmwĩrĩ?
Muntũ nabataraga gũtumĩra ĩgiita na kinya gũciũmia nĩkenda athera kĩmwĩrĩ. Ĩndĩ no tũũmbe kũthera ĩtĩkũmakania naarĩa tũtũũraga kana ũũmbi bwetũ bwa kĩmbeca. Tega VIDIO, rĩu bwarĩĩrie kĩũria gĩkĩ kĩthingatĩte
-
Nĩatĩa tũkumagia Jehova rĩrĩa into bĩrĩa tũgũtumĩra biethĩrwa bibanganĩtue bwega na bitheri?
4. Cinda mĩtugo ĩmĩthũũku
Jehova agatũtethia gũcinda mĩtugo ĩmĩthũũku
Ũkeja kwĩthĩrwa ũgwati nĩ ũkombo bwa kũnyua thigara, kana bwa gũtumĩra ndawa cia mbogita, womba kwĩthĩrwa ũkĩmenyaga urĩa bũrĩ bũbũũmũ gũtigana na mĩtugo ĩu. Nĩmbi biũmba gũgũtethia? Thũgaanĩria maumĩĩra jamathũũku jarĩa ũntũ bũu bũkũreterete. Thooma Mathayo 22:37-39, rĩu bwarĩĩrie maumĩĩra jamathũũku jarĩa thigara na ũtumĩri bũthũũku bwa ndawa cia mbogita bwĩthagĩrwa najo kĩrĩ . . .
-
ũcoore bwa muntũ amwe na Jehova.
-
antũ ba nja ya muntũ ũu na barĩa bangĩ bamũthiũrũkĩte.
Jũkia matagaaria jarĩa jagagũtethia gũcinda mũtugo jũmũthũũku. a Tega VIDIO.
Thooma Afilipi 4:13, rĩũ bwarĩĩrie kĩũria gĩkĩ:
-
Nĩatĩa kũmenyeria kũromba, kwiritana Bibiria, na gwĩta mĩcemanione kũũmba kwaa muntũ inya ya gũcinda mĩtugo ĩmĩthũũku?
5. Ciũmie kũrwa na mathũgaanio na mĩtugo ĩtĩbui
Thooma Akolosai 3:5, rĩu bwarĩĩrie biũria bibi:
-
Nĩatĩa tũkũmenya ponografia, ntũmwa inthũũku thimũne ciegie kũmenyana kĩmwĩrĩ, na mĩtugo ĩmĩthũũku ya gũũkia irũngo bietũ bia ũciari, nĩ mantũ jatĩagĩri methone ja Jehova?
-
Nũkwona teka bũrĩ ũntũ bukũgwatanĩra na mathũgaanio Jehova kwĩrĩgĩĩra twĩthĩrwa na mĩtugo yagĩrĩte? Nĩkĩ ũgũcookia ũu?
Cũnkũũna ũrĩa ũũmba kũrwa na mathũgaanio jatĩagĩrĩte. Tega VIDIO.
Jesũ naatumĩĩre ngerekano ya kwonania no mwanka tũtue matua tũciandĩte nĩkenda twĩta na mbere kwĩthĩrwa na mĩtugo yagĩrĩte. Thooma Mathayo 5:29, 30, rĩu bwarĩĩrie kĩũria gĩkĩ:
-
Kinya kethĩra Jesũ teka augaga tũthithĩrie mĩĩrĩ yeetũ bũũthũũku, noonanĩrie nĩtũbuĩrĩte kũjũkia ĩtagaaria. Nĩ matagaaria jarĩkũ jamariku muntũ omba kũjũkia nĩkenda aciebania na mathũgaanio jatĩagĩrĩte? b
Kethĩra nĩũciũmĩtie kũrwa na mathũgaanio jamathũũku, Jehova nakwona ũntũ bũu ũkũthithia bũrĩ bwa gĩtũmi. Thooma Zaburi 103:13, 14, rĩu bwarĩĩrie kĩũria gĩkĩ:
-
Ũkeja kwĩthĩrwa ũkĩrũjaga na mũtugo jũtĩagĩrĩte, nĩatĩa ĩandĩko rĩrĩ rĩũmba gũgũtethia gwĩta na mbere kũthithia ũu?
Kũgitara tĩ kuuga ũgũcindwa!
Womba gũciĩra atĩrĩ, ‘Ũntũ bũũ bũkũndema, gũtĩ na gĩtũmi kĩa gwĩta na mbere kũrwa nabu.’ Ĩndĩ thũgaanĩria ũntũ bũbũ: Mũũgĩi akeja kũgitara na akagwa, tĩkũũga atĩũmba gwĩta na mbere na rwĩro rũu, na tĩkuuga acookere mwambĩrĩrio kaĩrĩ. O ũu kinya rĩrĩa waremeerwa na wacookera mũtugo jũmũthũũkũ, tĩ kuuga ũtĩũmba gũtigana naju. Na tĩkuuga gũciũmia kũrĩa ũraciũmĩtie, nĩ kwa ũtheri. Kũgitara nĩ ũntũ bwa wĩthĩre. Ĩndĩ, menya ũkua nkoro! Jehova agĩkwejaga ũtethio, womba gũcinda mũtugo jũmũthũũku.
ANTŨ BAMWE BAUGAGA: “Nĩndamenyeerie. Ntĩũmba gũtiga.”
-
Nĩ ĩandĩko rĩrĩkũ ũmba gũtumĩra kwonia muntũ atĩ, Jehova akĩmũtethagia omba gũtigana na mũtugo jũmũthũũku?
NA NJĨRA ĨNKUĨ
Nĩtũgwĩragia Jehova rĩrĩa twatheria mĩĩrĩ yeetũ, mathũgaanio jeetũ, na mĩtugo yeetũ.
Gũcookera
-
Nĩkĩ bũrĩ ũntũ bwa gĩtũmi mono kwĩthĩrwa tũtheri?
-
Nĩatĩa ũũmba kũthithia nĩkenda ũthingatĩĩra ũtheru bwa mwĩrĩ?
-
Nĩatĩa ũũmba kũthithia nĩkenda wĩthĩrwa ũtheri kĩmathũgaanio, na kĩmĩĩtĩre?
CŨNKŨŨNA
Nĩ mantũ jarĩkũ jamaniini ũũmba kũthithia nĩkenda ũkara ũtheri kĩmwĩrĩ kĩnya kethĩra ũtĩna into bibiingĩ?
Ona matagaaria jarĩa ũũmba gũtumĩra nĩkenda ũtiga kũnyua thĩgara.
Iritane maumĩĩra jamathũũku ja ponografia.
“Ponografia—Rĩ, no Ĩkũthũũkie?” (Mnara wa Mlinzi, Agasti 1, 2013)
Iritane ũrĩa muntũ mũrũme ũmwe aacindĩre rũmenyeria rwa kwona ponografia.
“Nĩndaremeeri Maita Jamaingĩ Mbere Mpũmbana” (Mnara wa Mlinzi Na. 4 2016)
a Ngasĩti ĩrĩa ĩrĩna kĩongo “Ũrĩa Mpũmba Gũtiga Kũnyua Thigara,” ĩrĩa yonanĩtue kĩrĩ gĩcuncĩ kĩa Cũnkũũna gĩa kĩthoomo gĩkĩ, nĩgũtarĩĩria matagaaria jameega jarĩa muntũ omba kũjũkia nĩkenda acinda rũmenyeria rũu.
b Kenda twona ũtethio bwa gũcinda mĩtugo ĩmĩthũũku ya gũũkia irungo bietũ bia ũciari, tega “Nĩatĩa Mpũmba Gũcinda Mĩtugo Ĩmĩthũũku ya Gũũkia Irũngo Bietũ bia Ũciari?” kĩrĩ iuku Biũria Birĩa Antũ Babeethĩ Baciũragia—Macookio Jarĩa Jabatethagia, Iuku rĩa 1, kĩthoomo kĩa 25.
