Yo testigo e Jehová o usaji na punkjꞹ Biblia ngekʼua ro mba̱ra̱ji na joo yo mama ne Biblia. Akjanu nuji me na joo nu Traducción del Nuevo Mundo -bʼꞹbʼꞹ kja na punkjꞹ jñaa-, nangeje ju̱sʼꞹ nu trju̱u̱ e Yose ñe nrrexe kʼo trju̱sʼꞹnu nrre nan kjuana ñe yo jñaa yo ju̱sʼꞹnu dya ga sʼɇzhi.

•   Ju̱sʼꞹ nu trju̱u̱ e Yose. Dya texe yo Biblia unji respeto nu kʼꞹ go dyⱥtrʼⱥ nu Biblia. Bʼꞹbʼꞹ dʼa Biblia ke mama más de setenta trju̱u̱ yo ntrʼee ke o mbøsʼꞹji ro dyⱥtrʼⱥjinu, pe dya  o dyopjꞹji ni ri dʼa vez nu trju̱u̱ de nu kʼꞹ o dyⱥtrʼⱥ nu Biblia: Jehová.

   Kja nu Traducción del Nuevo Mundo, ri tøtrʼꞹji na punkjꞹ o trju̱u̱ e Yosi kʼua ja kʼo nrre mi tʼopjꞹ mi jingua i dya ju̱sʼꞹ o trju̱u̱ yo bʼɇzo yo bo dyⱥtrʼⱥjinu.

•   Nrrexe k’o trju̱sʼꞹnu nrre nan kjuana. Bʼꞹbʼꞹ yo Biblia yo dya mama na joo ja ma mama yo jñaa mi jingua. Dʼa ejemplo nge yo ju̱sʼꞹ dʼa Biblia kja Mateo 7:13 kʼꞹ mama: “Tsichʼigeji kja ne ngoxtʼi kʼꞹ sʼich’i, nangeje ne ngoxtʼi kʼꞹ na mbⱥtrʼⱥ ñeje ne ñʼiji kʼꞹ jyadʼꞹ ngeje kʼꞹ sⱥtʼⱥ kja ñixjua”. Pe yo jñaa mi jingua dya mama “ñixjua”, mama “nguarꞹ (chjotꞹ)”. Yo bo potꞹji yo jñaa mi creoji ke yo nan sʼonte ra ma supjreji kja ñixjua. Pe nu Biblia dya mama ke nan kjuanayo. Ngekʼua nu Traducción del Nuevo Mundo mama “nguarꞹ (chjotꞹ)”, ja ga mama yo jñaa mi jingua.

•   Yo jñaa yo ju̱sʼꞹnu dya ga sʼɇzhi. Zø me na joo ke dʼa Biblia ra mama nu nan kjuana, me na joo ke dya ra mbɇsʼi yo jñaa yo na sʼɇzhi. Ra nunji dʼa ejemplo. Bʼꞹbʼꞹ nan punkjꞹ Biblia ke kja Mateo 5:3 mama akjanu: “Me mⱥjⱥ yo ya nda pɇsʼi espíritu”. Pe nujyo dya nrra søø ra meyaji na joo yo ntee yo ka̱ra̱dya. Ngekʼua nu Traducción del Nuevo Mundo tʼopjꞹ a kjaba: “Me mⱥjⱥ yo ntee yo pa̱ra̱ji ke ni jyodʼꞹji Mizhokjimi”.

 Nu Traducción del Nuevo Mundo ju̱sʼꞹ nu trju̱u̱ e Yose, trenxe kʼo trju̱sʼꞹnu nrre nan kjuana, yo jñaa yo ju̱sʼꞹnu dya ga sʼɇzhi, dya ngextrjokʼo: dya bʼøønu. Nujyo kjaa ke nan punkjꞹ ntrʼee søø ra mbɇsʼiji dʼa Biblia kʼꞹ ra zopjꞹji, zø ri ñaji nandyo jñaa o zø dya ri jꞹ̱ji mechʼi ngekʼua ra nrro̱mꞹji kʼa dʼaja.