Yo testigo e Jehová jmurꞹji yeje vez kja nu ngoʼo, nuja jmurꞹji ni chju̱u̱ Salón del Reino. ¿Pje kjajinu? ¿Pjenga me na joo ke ri mage?

•  ¿Pje kjaji kja nu Salón del Reino?

•  ¿Pjenga me na joo ke ri mage?

•  Nu kʼo manji yo dyaja trʼii ñe yo xuntrʼi

 Kja nu Salón del Reino jizhiji kʼo junsʼꞹ kja ne Biblia. Nu kʼo manjinu ra mbøxkʼꞹ:

•   Ri pa̱rge na joo e Diosi.

•   Ri pa̱ra̱ na joo pjenga ri kjogꞹji yo ndumꞹ yo paa ke ri ka̱ra̱jidya.

•   Ri tsjage kʼo me na joo.

•   Ri chøtrʼꞹ yo ntee ke ri jobi na joo.

 ¿Mi pa̱rgeyo? Nuja jmurꞹji yo testigo e Jehová ni chju̱u̱ Salón del Reino, nangeje nu k’o xe nda jichijinu, ngeje o Reino e Palesito ajensʼe (Mateo 6:​9, 10; 24:14; Lucas 4:​43).

 Nu kʼo manjinu ra mbøxkʼꞹ. Kʼo jizhiji kja nu Salón del Reino ra mbøxkʼꞹ ri pa̱rge na joo kʼo mama ne Biblia (Proverbios 4:5). Nujyo nee ra mama ke kʼo junsʼꞹ kja ne Biblia søø ra mbøxkʼꞹ ri juajnꞹ na joo pje ri tsjaa. Xo trjꞹrꞹ yo tr’ønꞹ nzakja:

•   ¿Pjenga ri bʼꞹnkʼøjiba?

•   ¿Nge o sʼokꞹ Mizhokjimi ma ri supjreji?

•   Ma ra tu̱ji, ¿kjo xi ra mimiji?

 Nujyo ngeji janzi yo jñaa ke jizhiji ma ri jmurꞹji ma xabaro o ma ndomgo:

•   ¿Pjenga na joo ra minji janzi ga jizhi ne Biblia?

•   ¿Kjo søø ra øtꞹji ra mbøxkꞹji ma ra kjogꞹji nrrꞹmꞹ?

•   ¿Ja ga mbøxkꞹjidya o Reino e Yose?

 “Na trʼii ke ri dyokjobe kja kolegio o e̱je̱ kja na reunión. O mimi ko in pjamilia ñe ro xørꞹjme yo skuama. Kjanu bo xitsʼkʼo ke me bo ngentjo ma mi nuu ke yo trʼee mi pasʼꞹji o dyɇɇ ngekʼua ro manji na jñaa, xo bo xitsʼi ke kja o nitsjimi angeze dya pɇsʼiji yo libro ke ri pɇsʼkʼøjme” (Brenda).

 ¿Mi pa̱rgeyo? Kʼo poji kja nu Salón del Reino dya pje kjontrʼꞹji ñe dya kjo øtꞹ merio.

 Yo ntee ke pojinu ra mbøxkʼꞹji na punkjꞹ. Ne Biblia mama ke nu kʼo jmurꞹjinu “ni jyodʼꞹ ra pøtꞹ rga zopjꞹji, [ñe] ra sʼiyaji” (Hebreos 10:24, 25) Yo paa ke ri ka̱ra̱jidya bʼꞹbʼꞹ na punkjꞹ ntee ke me na sʼoji, ngekʼua ma ri jmurꞹji ko yo ntee ke matrʼꞹji e Tsʼitajensʼe me joo rga søø in mꞹnkʼøji.

 “Bʼꞹbʼꞹ paa ke me na mboo in kuegø xo me ri soxigø, pe ma ri pagø kja nu Salón del Reino, yo ntee ke pojinu me na jonteji ñe kjakꞹji me na joo rga søgø kja in mꞹbʼꞹ. Ma ra nguarꞹ nu jmurkjimi ñe ri nzhøgꞹ kja in nzungø, a ri søgø na joo, ri to̱jia ñe dya kja ri ndumꞹgo pje ra kjogꞹ ra xo̱rꞹ” (Elisa).

 ¿Mi pa̱rgeyo? Kja texe ne xoñijomꞹ bʼꞹbʼꞹ 120,000 congregación kja yo testigo e Jehová, xo ñeje 60,000 ngumꞹ nuja jmurꞹji. Tsjɇma tsjɇma jⱥbʼⱥji 1,500 Salón del Reino, na ngeje poji kja jmurkjimi na punkjꞹ ntee. a