Ndeze ma kja mi tsʼitʼigø me mi negø texe yo bʼꞹbʼꞹ kja ne xoñijomꞹ. Ko in pjamiliagø mi pa nzhønkʼøjme a ñunꞹ kja kʼe trʼañijñi Jyväskylä a Finlandia. Mi janrrajme nu nrrareje, nu trʼatrʼeje, yo nzhⱥjnⱥ, ñe yo añimale me mi sʼiyagøyo. ¡Ma kja mi chʼikʼegø mi nee ro tabʼꞹgø texe yo dyoo ñe yo mixi ke mi janrragø! Ma a ro tegø, me mi søxigø ma mi nugø ke mi yabʼꞹji yo añimale, nakʼua ro magø ko na organización ke mi ñʼanaji yo añimale, angezeji mi kjijñiji nzakjazgø.

Mi kjajme campaña nu ja mi ñʼanajme yo añimale, mi opjꞹjme skuama nu ja mi ørꞹjme ke ro ngotrʼꞹji kʼo ndenda nu ja mi pøji kʼo xii o kʼo in salea yo añimale, mi kjajme marcha i yo protesta. Xo ro kjajme na organización ke mi ñʼanayo. Texeyo go tsjapꞹ ro ꞹdʼꞹ yo autoridad i go ngokꞹjme a pjorꞹ janzi ves, ñe ro kjotrʼꞹjme multa, xo ro pɇsijme na punkjꞹ ndumꞹ ko yo manrro.

Xi mi bʼꞹbʼꞹ ndumꞹ ke mi kjakʼꞹ dya ro søgø na joo, ngekʼua ro kichʼkʼø kja dʼa organización kʼꞹ mi chju̱u̱ Amnistía Internacional y Greenpeace, i me ro pɇpigø ko texe in sɇzhi ñe in pjeñe. Xo ro ñʼana i ro pjosʼꞹ kʼo ntee ke dya pje mi pɇsiji i ñe kʼo mi kjogꞹji trjijmi.

Ma o kjogꞹ yo kjɇɇ ro unꞹ nguenda ke dya mi søø ro potꞹgø ja ma ngeji yo ntee. Zø mi bʼꞹbʼꞹ janzi ndumꞹ ke mi jokʼꞹjme, xe mi bʼꞹbʼꞹ kʼo mazi ma tetrjo mi nzakja ke mi bʼꞹbʼꞹ dʼa sʼonrrajma ke ma sʼodʼꞹ texe, nzakja kʼꞹ dya kjo mi kjapꞹ nguenda texe kʼo mi kjajme. Mi søgø ke dya pje mi dyɇzgø.

Kʼꞹ dya mi søø ro jokꞹgø yo ndumꞹ go tsjakꞹ ke ro jodʼꞹ e Mizhokjmi ñe ro xørgø ne Biblia. Zø mi jingua a rgua xørgønu ko yo testigo e Jehová, i me ri mbʼenkʼø ke ma jonteji, kʼo pakʼo dya mi søø ro potꞹgø ja ma mbʼenkʼø. Nudya, dya kja je ma kjanu a mi nandyogø.

Ro jodʼꞹ in Biblia i ro pjꞹrꞹ ro xørꞹ. Go nge nzakja na acete ke o ngoskꞹji nu ja ma ꞹʼꞹ. Ro totrʼꞹ nu ja mama ke ra pjorꞹji yo añimale. Nzakja kja Proverbios 12:10 mama: “kʼꞹ na jontee pjorꞹ yo in añimale” (La Palabra de Dios para Todos). Xo ro meyagø ke Mizhokjimi dya pɇsʼi o sʼokꞹ yo nrrumꞹ ke ri kjogꞹji kja ne xoñijomꞹ. Yo nrumꞹ ke ri kjogꞹji mazi na sʼɇzhi nangeje dya ri ⱥtⱥji e Jehová. Me ro sogø na joo kja in mꞹbʼꞹ ke e Jehová me sʼiyazꞹji ñe dya tsʼi ni ꞹdʼꞹ (Salmo 103:8-14).

Kʼo pakʼo ro totrʼꞹ dʼa cupón ke mi nⱥdʼⱥ ne libro ¿Pje jitsʼkøji ne Biblia? I ro pejñe kja correo. Dya go mezhe ma go e̱jui ye testigo e Jehová i go xitsʼkui ma mi negø ro xøkji ne Jñakjimi. Ro mangø ke ja̱a̱. Dya go metsʼkø ma ro magø kja jmurkjimi kja nu Salón del Reino. Jmanchʼa jmanchʼa yo jñaa e Jehová o zⱥtrʼⱥ kja in mꞹbʼꞹgø.

Ne Biblia go mbøxkꞹ ro jɇzgø kʼo ma sʼoo. Dya kja ro sʼꞹtrʼꞹ trju̱sʼꞹ, dya kja ro ti̱gø, a mi jɇgø na joo in bʼitꞹ, dya kja ma sʼoo ma ñagø. A mi tʼekjañomꞹgø yo manrro (Romanos 13:⁠1). Xo ro meyagø ke dya na joo ro obʼꞹgø ko kʼꞹ dya nge mi sugø, nange mi jingua mi kjagø kʼo dya ma joo.

Nukʼo ma zi ma sʼɇzhi nge ke ro nugø yo organización ke mi pjøsʼꞹ yo añimale ñe yo ntee ja ma jñanda e Jehová. Go metsʼɇ ro potꞹgøkʼo nange mi søgø ke ro ꞹdʼꞹji ma ro jɇzgøkʼo. Ro unkʼø nguenda ke ngextrjo o Reino e Yose nge kʼꞹ ra jokꞹ texe yo nrrumꞹ. Ngekʼua ro pjurꞹ ro pɇpi ko texe in mꞹbʼꞹ, ro nⱥdʼⱥ o Reino e Tsʼitajensʼe a texe yo ntee (Mateo 6:33).

Mi jingua ma mi nee ro pjøsʼꞹgø yo ntee, mazi mi jyambꞹgøyo, kʼo ma jontee ñe kʼo ma sʼontee, i me mi kjapꞹgø na sʼoo kʼo mi mangø ke ma sʼontee. Nudya, ne Jñakjimi a mbøxkꞹgø ra sʼiya texe yo ntee, ngekʼua ri kjapꞹ nguenda dya kjo ra ꞹnbʼꞹ (Mateo 5:44). Ne sʼiya kjakʼꞹ ra jichi yo ntee kʼo ra tsjaa o Reino e Diosi. Me ri mⱥkjø ma ri janrra ke yo ntee kjaji kʼo mama Mizhokjimi ngekʼua me mⱥji ga nga̱ra̱ji, nujyo bʼemi pjøsʼꞹ yo ntee.

Kʼꞹ ri jɇzi ke e Jehová ra jñumpꞹ nguenda yo na sʼonte, kjakʼꞹ ra mimi na joo. Kʼꞹ a ro pa̱ra̱ ke e Jehová nge kʼꞹ o dyⱥkⱥji ñe texe yo kjaa kja ne xoñijomꞹ kjakꞹ ra søgø na joo, i ri pa̱rgø ke e Yose dya ra jyɇzi ra mbørꞹ yo añimale, yo ntee ñe dya ra jyɇzi kjo ra sʼødʼꞹ ne xoñijoma. O Reino e Mizhokjimi dya kja ra mezhe ma ra chjøtꞹ texe yo ntee ke kjaji kʼo na sʼoo (Isaías 11:1-9). Me ri mⱥkjø ke ri pa̱ra̱ yo jñaa, ñe ke ra jichi yo ntee ngekʼua ra creojiyo. Dya kja ri nee ra potꞹtsʼɇ yo ndumꞹ kja ne xoñijomꞹ.