Gi janrrage me mⱥjⱥ yo ntee yo bʼꞹnjiba kja yo rretrato kʼo kuatrʼꞹba, yo nteeyo jmurꞹji kja na asamblea. Mi jingua, kʼo israelita tsjɇma tsjɇma mi jmurꞹji jñii bes nangeje Mizhokjimi go xipji ro tsjajikʼo (Deuteronomio 16:16). Nudya yo ri testigojme e Jehová xo ri jmurgojme ja ma tsjaji mi jingua, nzi dʼa kjɇɇ yeje bes ri jmurgojme dʼa paa, xo ri jmurgojme jñii paa. ¿Gi nee ri pa̱rge pje ri kjajme ma ri jmurꞹjme?

Ma ri jmurgojme kja asamblea ri pa̱ra̱jme na punkjꞹ kjuarma. Kʼo israelita me mi mⱥji ma mi jmurꞹji ngekʼua ro dyⱥrⱥji kʼo mi mama o jñaa Mizhokjimi. Xo me ri mⱥkjojme yo paa ma ri jmurgojme ko in kjuarmajme ñe in kju̱jme ri xørꞹjme kʼo mama e Jehová kja ne Biblia (Salmo 26:12; 111:1). Yo paa ma ri jmurgojme poji na punkjꞹ kjuarma kʼꞹ nʼaño ja menzumꞹji. Xo bʼꞹnkʼo gua e̱je̱ kja kʼo país kʼꞹ me na je̱e̱. Ma nrrempa ri ñonꞹjme, ri zenguajme yo kjuarma ri ønꞹjme ja ga bʼꞹnji, xo ri ñagojme pje ro pjechijme (Hechos 2:42). Me ri sʼiyagojme yo in kjuarma ñe yo in kju̱ʼu̱, me ri mⱥkjojme ma ri janrrgojmeyo, xo angezeji me mⱥji ma janrrgajme (1 Pedro 2:17).

Ri jmurgojme ngekʼua ra jitsʼkojme ja rga kjajme kʼo mama ne Biblia. Mi jingua ma mi jmurꞹji kʼo israelita, mi bʼꞹbʼꞹ bʼɇzo kʼo mi jichiji pje mi mama o jñaa Mizhokjimi, mi jichiji pje ro tsjaji ngekʼua ro minji ja ma nee e Jehová (Nehemías 8:8, 12). Me na mubi kʼo jitsʼkojme kja asamblea, texe kʼo jitsʼkojmenu ba e̱je̱ kja ne Biblia. Kʼo kjuarma kʼo tesʼeji kja plataforma xitsigojme ja ga kjaa kʼo mama yo texto ngekʼua ra tendiojme ñe ra kjajme kʼo mama e Jehová. Xo bʼꞹnkʼo kjuarma ñe kju̱ʼu̱ kʼo kjaji demostración, jitsʼkojme pje ra kjajme kja in nzumꞹjme ñe ja rga xøpꞹjme yo ntee. Bʼꞹnkʼo manji pje ma nrrumꞹ pɇsʼiji, xo manji pje nge kʼo pjøsʼꞹji dya ra jyɇzi ra tsjaji kʼo mama e Jehová. Ma ri jmurgojme jñii paa, bʼꞹbʼꞹ kjuarma ñe kju̱ʼu̱ kʼꞹ jeji o bʼitu ñe kjaji ja ma kjaa kʼo ntee mi jingua. Ma ri janrrajmekʼo, pjøxkꞹjme ra kjajme kʼo na joo. Kja yo asamblea xo bʼꞹbʼꞹ ntee kʼo ra jii.

• ¿Pjenga me ri mⱥkjojme ma ri jmurgojme kja asamblea?

• Ma ri mage kʼo paa ma ri jmurgojme, ¿ja gi mbeñege kʼꞹ ra mbøxkʼꞹgekʼo?