XØRꞸ 32
¡Nu Reino e Mizhokjimi a na mandadya!
Nu Reino e Mizhokjimi o mbꞹrꞹ go manda ajensʼe kja ne kjɇɇ 1914. Kʼe kjɇkʼꞹ xo go mbꞹrꞹ kʼꞹ a ra nguarꞹ ra manda yo gobierno kja ne xoñijomꞹ. ¿Pjenga ri pa̱ra̱jiyo? Ri jñanrradya pje go mama ne Biblia ke ro kjogꞹ, xo ri ñuu pje kjogꞹdya kja nrrexe ne xoñijomꞹ ñe ja ga mimi yo ntee ndizi ne kjɇɇ 1914.
1. ¿Pje bo mama ne Biblia ke ro kjogꞹ?
Ma ri xørꞹji ne Biblia kja Daniel ri pa̱ra̱ji ke nu Reino e Diosi ro mbꞹrꞹ ro manda ma ro nguarꞹ yo mamanu ke ngeji “yencho kjɇɇ” (Daniel 4:16, 17). Ma e Jesús o e̱je̱ kja ne xoñijomꞹ go mama ke yo yencho kjɇɇ xo nge “hasta ma ra zⱥdʼⱥ kʼꞹ ya mama Mizhokjimi kʼꞹ dya kja ra mandaji” kʼo gobierno kʼꞹ bi juajnꞹ Mizhokjimi, ñe go mama ke yo kjɇyo dya bʼe mi kjuarꞹ (Lucas 21:24). Ra nuji ke yo yencho kjɇɇ o nguarꞹ kja ne kjɇɇ 1914.
2. ¿Pje kjogꞹ kja ne xoñijomꞹ ñe ja ga mimi yo ntee ndeze nu kjɇɇ 1914?
Kʼo o discípulo e Jesús o dyønꞹji: “¿Pje ra kjogꞹ kʼꞹ ra pa̱ra̱jme ke ri bʼꞹnkʼe ko nutsʼkøjme ñe ma ya rgua chɇzhi kʼo paa ma ra nguarꞹ yo bʼꞹbʼꞹ kja ne xoñijomꞹ?” (Mateo 24:3). E Jesús o mama kʼo ro kjogꞹ ma angeze ro mbꞹrꞹ ro manda ajensʼe kja o Reino Mizhokjimi. Nzakja, ro tsʼaa chu̱ʼu̱, ro kjogꞹ trjijmi ñe ro mbii ne xoñijomꞹ (xørꞹ Mateo 24:7). Ne Biblia xo go mama ja rgua ngeje yo ntee kja yo kjɇɇ “yo ya ba chɇzhi” nuyo ro tsjaa “me rru̱ sʼɇzhi” (2 Timoteo 3:1-5). Ndeze nu kjɇɇ 1914 ri nuji ke nge akjanu ja ga mimi yo ntee, ñe na kjogꞹ kʼo go nⱥdʼⱥ e Jesús.
3. ¿Pjenga me kjogꞹ kʼo me na sʼoo kja ne xoñijomꞹ ma o mbꞹrꞹ o manda o Reino e Tsʼitajensʼe?
Ma o mbꞹrꞹ o manda e Jesús kja o Reino e Tsʼitajensʼe, o tsʼaa na chu̱ʼu̱ ajensʼe, angeze go chu̱ʼu̱ ko e Satanás ñe yo demonio. Go nrro̱mpꞹji e Satanás ñe jango ga mama ne Biblia, “o pjongꞹji ajensʼe ko texe kʼo o anxe angeze. O zⱥtʼⱥji kja ne xoñijomꞹ” (Apocalipsis 12:9, 10, 12). E Satanás me ꞹdʼꞹ na punkjꞹ nangeje pa̱ra̱ ke dya kja ra mezhe kʼꞹ ra chjotꞹji. Ngekʼua na kjaa yo me na sʼoo kja ne Xoñijomꞹ, nujyo kjaa ke me ri supjreji. ¡Akjanu ri unꞹji nguenda pjenga kjogꞹdya kʼo me na sʼoo kja ne xoñijomꞹ! Dya kja ra mezhe ma nu Reino e Tsʼitajensʼe ra kjuatꞹ texeyo.
TEXE YO JÑAA KE ME NI MUBI RA PA̱RA̱JI
Ra nuji pjenga ri pa̱ra̱ji ke o Reino e Diosi o mbꞹrꞹ go manda kja ne kjɇɇ 1914, xo ra nuji pje ni jyodʼꞹ ra kjaji kʼꞹ ri pa̱ra̱jiyo.
4. Yo profecía kʼꞹ nⱥdʼⱥ ne Biblia go zⱥdʼⱥji kja ne kjɇɇ 1914
E Diosi o tsjaa ke e Nabucodonosor, kʼe rey kʼꞹ mi manda a Babilonia, ro nginchʼi na trʼi̱ji̱ nu ja o jichi pje ro kjogꞹ kʼo paa kʼo ro e̱je̱. Kʼe trʼi̱ji̱ ñe kʼꞹ o xipji e Daniel pje mi nee ro mama kʼe trʼi̱ji̱, mi ngeje na profecía kʼꞹ mi nⱥdʼⱥ pje ro kjogꞹ ko nu gobierno e Nabucodonosor ñe ko nu Reino e Mizhokjimi (xørꞹbi Daniel 4:17). a
Xørꞹbi Daniel 4:20-26. Kjanu ri jñanrrabi ne diagrama ñe ri chjꞹrꞹbi yo trʼønꞹ yo ba e̱je̱:
-
A) ¿Pje bo nginchʼi e Nabucodonosor? (Jñanrrabi yo versículo 20 ñe 21).
-
B) ¿Pje ro kjogꞹ kʼe zaʼa? (Jñanrrabi ne versículo 23).
-
C) ¿Pje ro kjogꞹ ma ro nguarꞹ yo “yencho kjɇɇ”? (Jñanrrabi nu versículo 26).
Nu zaʼa kʼꞹ bo nginchʼi e Nabucodonosor ñe nu Reino Mizhokjimi
NU PROFECÍA (Daniel 4:20-36)
Ma mi Manda
A) Na zaʼa kʼꞹ me na nrra̱a̱
Ma dya kja go Manda
B) “Dyɇziji ne zaʼa” ñe jyɇziji akjanu “kja ma ra sotꞹ yencho kjɇɇ”
Ma go yepe go Manda
C) “Ra dyakʼꞹji ri manda na yeje”
Ma otrʼꞹ go zⱥdʼⱥ ne profecía:
-
D) ¿Kjo mi ngeje kʼe zaʼa? (Jñanrrabi nu versículo 22).
-
E) ¿Jingua dya kja go manda? (Xørꞹbi Daniel 4:29-33).
-
F) ¿Pje go kjogꞹ angeze ma go nguarꞹ kʼo “yencho kjɇɇ”? (Xørꞹbi Daniel 4:34-36).
MA OTRʼꞸ GO ZȺDʼȺ NE PROFECÍA
Ma mi Manda
D) Nabucodonosor, nu rey a Babilonia
Ma dya kja go Manda
E) E Nabucodonosor o bʼɇzhi o pjeñe ma o nguarꞹ kʼe kjɇɇ 606 a.e.c. b ñe dya go søø go manda yencho kjɇɇ
Ma go yepe go Manda
F) E Nabucodonosor nrro go nrrꞹmbeñe ñe nrro go mbꞹrꞹ go manda
Kʼꞹ na yeje ba zⱥdʼⱥ ne profecía:
-
G) ¿Kjo mi ngeji kʼe zaʼa? (Xørꞹbi 1 Crónicas 29:23).
-
H) ¿Jingua dya kja go mandaji? ¿Pjenga ri pa̱ra̱ji ke angezeji dya kja mi mandaji ma e Jesús o mimi kja ne Xoñijomꞹ? (Xørꞹbi Lucas 21:24).
-
I) ¿Ja ngeje nu ja go yepe go manda ne reino ñe jingua?
K’Ꞹ NU YEJE BA ZȺDʼȺ NE PROFECÍA
Ma mi Manda
G) Yo rey kʼꞹ mi mandaji a Israel ke o ñʼesʼe e Diosi
Ma dya kja go Manda
H) Ma o chjotꞹji Jerusalén, kja kʼe kjɇɇ 607 a.e.c.; nge ma dya kja o mandaji kʼo rey israelita, ixko mezhe 2.520 kjɇɇ
Ma go yepe go Manda
I) E Jesús bo mbꞹrꞹ go manda ajensʼe kja ne kjɇɇ 1914, angeze ngeje Rey kja o Reino Mizhokjimi
¿Janzi ro mezhe yo yencho kjɇɇ?
Janzi versículo kja ne Biblia pjøxkꞹji ra meyaji pje nee ra mama yo dyaja. Nzakja, kja Apocalipsis mama ke jñii ndee kjɇɇ ngeji 1.260 paa (Apocalipsis 12:6, 14). Ngekʼua ma ra yepeji yo payo sotꞹji 2.520 paa. Bʼꞹbʼꞹ versículo kja ne Biblia ke mama ke na paa chjenjui na kjɇɇ (Ezequiel 4:6). Ngekʼua yo yencho kjɇɇ ke nⱥdʼⱥ Daniel kja ne Biblia ngeji 2.520 kjɇɇ.
5. Kja ne kjɇɇ 1914 o mbꞹrꞹ yo me na sʼoo kja ne xoñijomꞹ
E Jesús o mama pje ro kjogꞹ kja texe ne xoñijomꞹ ma angeze ro mbꞹrꞹ ro manda. Xørꞹbi Lucas 21:9-11 ñe ri chjꞹrꞹbi ne trʼønꞹ nu ba e̱je̱:
-
Yo profecía yo mamaba, ¿pje nge kʼo a bi jñanrrage o gi ⱥrⱥge ke na kjogꞹ?
Ne apóstol Pablo o mama ja rgua ngeji yo ntee kja yo ni nguarꞹ paa kʼꞹ ro manda yo gobierno kja ne xoñijomꞹ. Xørꞹbi 2 Timoteo 3:1-5 ñe ri chjꞹrꞹbi ne trʼønꞹ nu ba e̱je̱:
-
Nzi ga mama yo versículo ja rgua ngeje yo ntee, ¿pje nge kʼo a bi jñandage?
6. Kʼꞹ ri pa̱ra̱ji ke o Reino e Diosi ya na manda kjakꞹji ra nuji pje ni jyodʼꞹ ra kjaji
Xørꞹbi Mateo 24:3, 14 ñe ri chjꞹrꞹbi yo trʼønꞹ yo ba e̱je̱:
-
¿Pje ma bʼɇpji na kjaji kja texe ne xoñijomꞹ ke ñetse ke o Reino Mizhokjimi a na manda?
-
¿Ja xo rgi tsjage ne bʼɇpji?
O Reino e Diosi a na manda, ñe dya kja ra mezhe ra manda kja texe ne xoñijomꞹ. Xørꞹbi Hebreos 10:24, 25 ñe ri chjꞹrꞹbi ne trʼønꞹ nu ba e̱je̱:
-
¿Pje ni jyodʼꞹ ra kjaji “nangeje ri pa̱ra̱ji ke ya ba chɇzhi kʼe paa”?
Ma rgui pjechige pje søø ro mbøsʼꞹ yo ntee ngekʼua dya ro nrru̱ji. ¿pje rgui tsjage?
BʼꞸBʼꞸ KʼO RA DYØNKʼꞸJI: “¿Pjenga yo testigo e Jehová me nⱥdʼⱥji ne kjɇɇ 1914?”.
-
¿Pje ri chjꞹrꞹge?
KʼO YA RO NUJI
Yo profecía ke nⱥdʼⱥ ne Biblia ñe yo na kjogꞹ kja ne xoñijomꞹ ñetse ke o Reino Mizhokjimi a na manda. Ri kreoji ke nge akjanu ngekʼua ri jichiji yo ntee o Reino Mizhokjimi ñe dya ri jɇziji ri jmurꞹji kja congregación.
Pje gi mbeñege
-
¿Pje o kjogꞹ ma o nguarꞹ yo yencho kjɇɇ kʼꞹ bi mama ne libro Daniel kja ne Biblia?
-
¿Pjenga i kreoge ke o Reino e Diosi o mbꞹrꞹ go manda kja ne kjɇɇ 1914?
-
¿Pje ri tsjaa ngekʼua ra ñetse ke i kreoge ke o Reino Mizhokjimi a na manda?
XE SØØ RI PA̱RA̱
Xørꞹ kʼo mama janzi historiador ñe janzi experto ja ba potꞹ yo ntee ndeze ne kjɇɇ 1914.
“Yo kjɇɇ ma yo ntee go jyɇziji go respetaoji yo na joo” (¡Despertad!, abril de 2007)
Jñanrra ja ba mbøsʼꞹ na bʼɇzo ne profecía kʼꞹ ba e̱je̱ kja Mateo 24:14.
¿Pjenga ri pa̱rgøji ke nu profecía kʼꞹ ba e̱je̱ kja Daniel capítulo 4 ro zⱥdʼⱥ ko o Reino e Tsʼitajensʼe?
“¿Jingua go mbꞹrꞹ go manda o Reino Mizhokjimi? (Parte dʼaja)” (La Atalaya, 1 de octubre de 2014)
¿Pjenga ri manji ke yo “yencho kjɇɇ” kʼꞹ mama kja Daniel capítulo 4 bo nguarꞹji kja ne kjɇɇ 1914?
“¿Jingua go mbꞹrꞹ go manda o Reino Mizhokjimi? (Parte yeje)” (La Atalaya, 1 de noviembre de 2014)
b Ne jñaa a.e.c. nee ra mama antes de nuestra era o antes de la era común. Ñe ne jñaa e.c. nee ra mama nuestra era o era común.
Puede que también le interese
KʼO ME ØNꞸJI
¿Ja ga kjaa ne curso bíblico kʼꞹ unꞹji yo testigo e Jehová?
Kja ne curso interactivo søø ri xørꞹge ne Biblia kʼꞹ gi nege. Dya pje ri tsjontrʼꞹ. Søø ri zojnꞹge kja ne curso texe ni pjamiliage ñe yo ntee yo gi joge.
