XØRꞸ 31
¿Pje ngeje nu Reino e Diosi?
Nu Reino Mizhokjimi nge kʼꞹ mazi nⱥdʼⱥ ne Biblia. Ko o Reino, e Jehová ra tsjaa kʼo mi nee ndeze ma o dyⱥtrʼⱥ yo ntee kja ne Xoñijomꞹ. ¿Pje ngeje ne Reino? ¿Pjenga ri pa̱ra̱ji ke a na mandadya? ¿Pje nge kʼo a go tsjaa? ¿Ñe pje ra tsjaa yo paa yo ba e̱je̱? Yo trʼønꞹyo ra trjꞹrꞹji kja ne xørꞹ ñe kja yo yeje ke ba e̱je̱.
1. ¿Pje ngeje nu Reino e Mizhokjimi ñe kjo nge nu Rey?
Nu Reino e Diosi nge na gobierno kʼꞹ o ñʼeme e Jehová. E Jesucristo ngeje nu Rey ñe o ñʼesʼe ajensʼe ngekʼua ra manda (Mateo 4:17; Juan 18:36). Ne Biblia mama kʼꞹ e Jesús: “Ra manda para siempre” (Lucas 1:32, 33). Angeze ra manda texe yo ra nga̱ra̱ji kja ne Xoñijomꞹ, nangeje nge Rey kja nu Reino e Mizhokjimi.
2. ¿Kjo ra mbøsʼꞹ e Jesús ra manda?
Dya ra mandatsjɇ e Jesús, ra bʼꞹbʼꞹ ntee ke “zø pje ma jñiñi ka̱ra̱ji, zø pje ma jñaa ñaji, zø pje ma razaji [...] ra mandaji” (Apocalipsis 5:9, 10). ¿Janzi ntee ra mandaji ko e Jesús? Ndeze ma go bʼꞹbʼꞹ e Jesús kja ne Xoñijomꞹ, na punkjꞹ ntee ⱥtⱥji kʼo mama angeze. Zø nge akjanu, ngextrjo 144.000 ra moji ajensʼe, ra mandaji ko angeze (xørꞹ Apocalipsis 14:1-4). Texe yo dyaja ra nga̱ra̱ji kja ne Xoñijomꞹ ñe ne Reino xo ra mandaba (Salmo 37:29).
3. ¿Pjenga nu Reino e Diosi mazi na joo ke yo gobierno kja ne xoñijomꞹ?
Zø bʼꞹbʼꞹ gobierno kja ne xoñijomꞹ ke nee ra tsjaji kʼo na joo, dya søø ra tsjaji. Ñe ma kjogꞹ yo paa, yo nandyo gobierno bʼꞹma dya nee ra mbøsʼꞹji yo ntee . Ma ra manda e Jesús kʼꞹ nge Rey kja nu Reino Mizhokjimi dya kja xi ra bʼꞹbʼꞹ nandyo gobierno kʼꞹ ra manda. E Mizhokjimi o ñʼesʼe “naja kʼꞹ ra manda kja o reino, dya ra nguarꞹ rga manda” (Daniel 2:44). E Jesús ra manda kja texe ne Xoñijomꞹ ñe dya ra juajnꞹtrjo kjo ra tsjapꞹ na joo. Angeze me na jonte, me nee yo na joo ñe me sʼiya yo ntee, xo ra jichi angezeji ra tsjaji kʼo na joo, ra sʼiyaji ñe ra tsjapꞹji yo na joo yo dyaja (xørꞹ Isaías 11:9).
TEXE YO JÑAA KE ME NI MUBI RA PA̱RA̱JI
Ra nuji pjenga nu Reino e Diosi mazi na joo ke yo gobierno kja ne xoñijomꞹ.
4. Me na zɇzhi nu Reino kʼꞹ ra manda kja texe ne Xoñijomꞹ
Texe yo kjɇɇ ke a go mandaji yo gobierno kja ne xoñijomꞹ, dya bʼꞹbʼꞹ na Rey nzakja e Jesucristo ke me na zɇzhi ñe me na joo ga manda. Xørꞹbi Mateo 28:18 ñe ri chjꞹrꞹbi ne trʼønꞹ nu ba e̱je̱:
-
¿Pjenga dya chjenjui ja ga manda e Jesús ñe yo gobierno kja ne xoñijomꞹ?
Yo gobierno kja ne xoñijomꞹ ngextrjo mandaji nu ja menzumꞹji ñe ngextrjo mandaji janzi kjɇɇ. ¿Pje ra kjogꞹ ko o Reino e Mizhokjimi? Xørꞹbi Daniel 7:14 ñe ri chjꞹrꞹbi yo trʼønꞹ yo ba e̱je̱:
-
¿Pjenga me na joo ke dya kjo ra chjotꞹ o Reino Mizhokjimi?
-
¿Pjenga me na joo ke ra manda kja texe nu Xoñijomꞹ?
5. Yo gobierno kja ne xoñijomꞹ dya kja ra mandaji
¿Pjenga me na joo ke o Reino e Tsʼitajensʼe ra chjotꞹ yo gobierno kja ne xoñijomꞹ? Jñanrrabi ne VIDEO ñe ri chjꞹrꞹbi ne trʼønꞹ nu ba e̱je̱:
-
¿Pje ma nrrumꞹ ke kjogꞹ kja ne xoñijomꞹ nge o sʼokꞹ yo gobierno?
Xørꞹbi Eclesiastés 8:9 ñe ri chjꞹrꞹbi ne trʼønꞹ nu ba e̱je̱:
-
¿Gi kjijñige ke nu Reino e Tsʼitajensʼe ni jyodʼꞹ ra chjotꞹ yo gobierno ke mandaji kja ne xoñijomꞹ? ¿Pjenga?
6. Kʼo mandaji kja o Reino e Diosi pa̱ra̱ji na joo ja rga mbøxkꞹji
E Jesús kʼꞹ nge in Reygøji, go mimiba kja ne Xoñijomꞹ ngekʼua søø ra “juentsʼkøji ma ri jyopꞹji” (Hebreos 4:15). E Jehová o juajnꞹ 144.000 bʼɇzo ñe nrrinxu kʼꞹ ⱥtⱥji angeze ngekʼua ra mandaji ko e Jesús. “Zø pje ma jñiñi ka̱ra̱ji, zø pje ma jñaa ñaji, zø pje ma razaji” nu ja ni ñe̱ji angezeji (Apocalipsis 5:9).
-
¿Ja gi søge kʼꞹ gi pa̱ra̱ ke e Jesús ñe texe kʼo ra manda ko angeze pa̱ra̱ji na joo yo ri kjogøji? ¿Pjenga?
Jehová o juajnꞹ bʼɇzo ñe nrrinxu kʼꞹ o mimiji kja nrre nandyo kjɇɇ ñe nandyo jñiñi ngekʼua ra mandaji ko e Jesús.
7. Yo ley o Reino e Tsʼitajensʼe mazi na joo ke yo ley yo pɇsiji yo ntee
Yo gobierno nee ra mbøsʼꞹji ñe ra mbørꞹji yo ntee kʼꞹ mandaji ngekʼua kjaji ley. Yo neji ke o Reino e Tsʼitajensʼe ra mandaji, ni jyodʼꞹ ra dyⱥtⱥji o ley kʼꞹ unꞹ angeze. Xørꞹbi 1 Corintios 6:9-11 ñe ri chjꞹrꞹbi yo trʼønꞹ yo ba e̱je̱:
-
Pje gi mange, ¿ja rga mimi texe yo ntee ma ra dyⱥtⱥji kʼo manda e Mizhokjimi? a
-
¿I kreoge ke yo ntee ke ra mimiji ma ra manda ne Reino ni jyodʼꞹ ra dyⱥtⱥji yo mama e Jehová? ¿Pjenga gi mange akjanu?
-
¿Pjenga ri pa̱ra̱ji ke yo ntee yo dya ⱥtⱥjidya yo mama Mizhokjimi søø ra sⱥⱥ nu paa ma ra tsjaji kʼo nee angeze? (Jñanrrabi nu versículo 11).
Yo gobierno kja ne xoñijomꞹ pɇsʼiji ley ke pjøsʼꞹji ñe pjørꞹji yo ntee yo mandaji. Yo o ley nu Reino Mizhokjimi mazi na joo, nangeje pjørꞹji ñe pjøsʼꞹji yo ntee yo ⱥtⱥji angeze.
BʼꞸBʼꞸ KʼO MANJI: “Nu Reino e Diosi bʼꞹbʼꞹ amboo kja in mꞹnkʼøji”.
-
¿Pje ri chjꞹrꞹge?
KʼO YA RO NUJI
Nu Reino e Mizhokjimi nge na gobierno kʼꞹ bʼꞹbʼꞹ ajensʼe ñe ra manda kja texe nu xoñijomꞹ.
Pje gi mbeñege
-
¿Kjo ra mandaji kja o Reino e Diosi?
-
¿Pjenga nu Reino e Diosi mazi na joo ke yo gobierno kja ne xoñijomꞹ?
-
¿Pje nee e Jehová ke ra tsjaji yo nee ra mimiji ma ra manda o Reino?
XE SØØ RI PA̱RA̱
Xørꞹ kʼo o mama e Jesús ja ro bʼꞹbʼꞹ nu Reino.
“¿Bʼꞹbʼꞹ amboo kja in mꞹnkʼøji nu Reino e Diosi?” (Xørꞹ kja jw.org)
¿Pjenga yo testigo e Jehová mazi ⱥtⱥji o Reino e Diosi ke yo gobierno kja ne xoñijomꞹ?
Xørꞹ yo mama ne Biblia pjenga e Jehová o juajnꞹ 144.000 ntee ke ra mandaji ko e Jesús.
¿Ja ba mbøsʼꞹ na nrrinxu kʼꞹ mi oʼo a pjørꞹ ro mba̱ra̱ ke ngextrjo e Diosi ra jokꞹ texe yo na sʼoo ke kjogꞹ kja ne xoñijomꞹ?
“Ro pa̱ra̱ kjo ra jokꞹ texe yo nrrumꞹ” (¡Despertad!, noviembre de 2011)
a Kja nu sección jñii ra nuji ja ga nee e Mizhokjimi ke ra minji.
Puede que también le interese
KʼO ME ØNꞸJI
¿Ja ga kjaa ne curso bíblico kʼꞹ unꞹji yo testigo e Jehová?
Kja ne curso interactivo søø ri xørꞹge ne Biblia kʼꞹ gi nege. Dya pje ri tsjontrʼꞹ. Søø ri zojnꞹge kja ne curso texe ni pjamiliage ñe yo ntee yo gi joge.
