Mi jingua go mimi na trʼii kʼꞹ go mbøsʼꞹ e Pablo ngekʼua dya ro mbøtrʼꞹji. Dya ri pa̱rgoji pje mi chju̱u̱ kʼe trʼii, pe mi ngeje nu sobrinu e Pablo. Kʼe trʼii dya pje mi su̱u̱. ¿Gi nee ri pa̱ra̱ pje go tsjaa?...

A Jerusalén je mi oʼo a pjørꞹ e Pablo. Go zꞹrꞹji nange mi jichi yo ntee kʼo go tsjaa e Jesús. Mi bʼꞹbʼꞹ bʼɇzo kʼo mi ꞹmbꞹji e Pablo ñe mi nuji ja rgua tsjapꞹji kʼo ma sʼoo. Mi nee ro ma xipjiji kʼe bʼɇzo kʼꞹ mi manda yo xundaro: “Pejñe yo xundaro ra zidyiji e Pablo nu ja jꞹmpꞹji nguenda yo ntee”. Angezeji ro tsjo̱ji kja kʼe ñʼii ngekʼua ma ro kjogꞹnu e Pablo ro mbøtrʼꞹji.

Ma o mba̱ra̱kʼo nu sobrinu e Pablo, ¿pje go tsjaa? Go ma xipji nu tío pje mi nee ro tsjapꞹji yo ntee. Nudyakʼua e Pablo go xipji: “Xⱥdʼⱥ ri ma xipji texe kʼo gui dyⱥrⱥ nu bʼɇzo kʼꞹ manda yo xundaro”. Kʼe bʼɇzo mi mero manda kja yo xundaro, ngekʼua dya kjo mi nee ro ma bobʼꞹ a jmiikʼꞹ. Zo mi nge ga kjanu, ¿pje go tsjaa kʼe trʼii?... Dya go zu̱u̱, go maa ja mi bʼꞹbʼꞹ kʼe bʼɇzo go ma xipji texe.

Kʼe bʼɇzo kʼꞹ mi manda kja yo xundaro go dyⱥrⱥ kʼe trʼii. Nukʼua go mbejñe quiniento xundaro ro zidyiji e Pablo kja kʼe jñiñi nu mi chju̱u̱ Cesarea, o xipjiji ro mbørꞹji ngekʼua dya pje ro tsjapꞹji. Kʼe bʼɇzo go xipji yo xundaro: “Ri sidyiji e Pablo nu xomꞹdya”. ¿Go mbøtrʼꞹji e Pablo yo ntee kʼo mi ꞹmbꞹji? ¿Pje gi mange?... ¡Iyo, dya go mbøtrʼꞹji! Yo bʼɇzo kʼo mi ꞹmbꞹji dya pje go tsjapꞹji e Pablo.

¿Pje jitsʼi yo ro xørꞹji?... ¿Gui unkʼe nguenrra ke dya go zu̱u̱ in sobrinu e Pablo? Xo ñetsʼkʼe, ¡søø ri tsjage nzakja angeze! Ra øtꞹji e Jehová ra mbøxkoji ngekʼua dya ra su̱ji rga zopjꞹji yo ntee o Jñaa angeze. Natsʼkʼe, ¿dya ri su̱u̱ ri zopjꞹ yo ntee yo mama e Jehová?... Mi na joo ma ra jichiji yo ntee kʼo mama e Mizhokjimi. Akjanu na punkjꞹ ntee ra søø ra mimiji kja ne Xoñijomꞹ ma me rga zøø.