Nu tolerancia ngeje “kʼꞹ pjøxkꞹji dya ra chu̱ji ko yo ntee” (Declaración de Principios sobre la Tolerancia de la Unesco, 1995).

 Ma dya ra ngetsʼkʼøji tolerantes o dya ra tʼekjañomꞹji yo dyaja ntee, bʼꞹma ra ꞹmbꞹji. Ñe ma ra ꞹmbꞹji yo ntee kja in mꞹbʼꞹji, ra xiji yo sʼojñaa kʼo ntee ñe bʼꞹma ra chu̱ji ko angezeji.

 Pe na punkjꞹ ntee nrre nʼaño ba manji pje ngeje nu tolerancia. Bʼꞹbʼꞹ yo manji ke nu kʼo ngeji tolerantes ra nuji na joo texe kʼo kjaji yo ntee ñe ja ga minji. Yo ntee yo kreoji kʼo mama ne Biblia tʼekjañomꞹji yo dyaja ntee, xo tʼekjañomꞹji ke nzi dʼaja ntee søø ra juajnꞹ kʼo ra kreo ñe ja rga mimi, zø dya kjaji kʼo na joo.

 Ne Biblia, ¿søø ra mbøsʼꞹ yo ntee ngekʼua ra ngeji tolerantes yo paa ke ri ka̱ra̱jidya?

Ne Biblia mama ja rga ngezgøji tolerantes

 Ne Biblia jizhi ja rga ngezgøji tolerantes. Mama akjaba: “Ni jyodʼꞹ kʼꞹ ri sinbigeji na joo, ngekʼua texe yo ntee ra mba̱ra̱ji kʼꞹ in kjageji na joo” (Filipenses 4:5). Ne Biblia xitsʼkøji ke ra tʼekjañomꞹji texe yo ntee ñe ke ra jonteji ko angezeji. Yo ⱥtⱥji kʼo mama ne Biblia, zø dya kjijñiji nzakja yo ntee, pe tʼekjañomꞹji nangeje nge yo ntee kʼo ra juajnꞹji ja rga minji.

 Ne Biblia mama ke Mizhokjimi xitsiji ja rga minji yo ntee. Mamanu: “Angeze xitsʼi pje nge kʼo na joo [ri tsjaa]“ (Miqueas 6:8). Nujyo ba ñetse ke e Diosi xitsʼkøji ja rga mⱥjⱥ rga minkʼøji (Isaías 48:17,18).

 E Mizhokjimi mama ke dya ngezgøji kʼꞹ ra øtpꞹji nguenrra yo ntee. Ne Biblia mama: “Ngextjo [Mizhokjimi] søø ra jñꞹnpꞹ nguenda na ntee [...]. Natsʼkʼeji, ¿pje pjɇtskɇji kʼꞹ ni sobʼꞹgeji yo nin minteji?” (Santiago 4:12). Mizhokjimi jɇzgøji ra juajnꞹtsjɇgøji pje ra kjagøji, na nge ngetsʼkʼøji kʼꞹ ra unkʼøji nguenda e Yose (Deuteronomio 30:19).

Ne Biblia mama ke ra tʼekjañomꞹji yo ntee

 Ne Biblia mama: ”‏Ri tʼekjañomꞹji texe yo ntee” (1 Pedro 2:17). Nudyama yo ntee ke potpꞹji nguenda kʼo mama nee Biblia, tʼekjañomꞹji texe yo ntee zø nʼaño o religión ñe nʼaño ba minji (Lucas 6:31). Nujyo dya nee ra mama ke yo ⱥtⱥji ne Biblia ra tsjijñiji kʼua ja nzi ga kjijñiji yo ntee. Pe dya ꞹmbꞹji yo ntee xo dya zadʼꞹji nangeje xⱥkⱥji ja nzi bo tsjaa e Jesús.

 Dʼa nu paa e Jesús o chebi na nrrinxꞹ ke mi pɇsʼi nʼaño religión. Ñe kʼe nrrinxꞹ mi ñeje na bʼɇzo ke dya mi ngeje o xira, e Jesús dya mi nuu na jokʼo, zø mi nge akjanu e Jesús mi tʼekjañomꞹ kʼe nrrixꞹ ñe o zopjꞹ na joo (Juan 4:9, 17-24).

 Yo cristiano yo na kjuana xørꞹji na joo ne Biblia, xⱥkⱥji kʼo go tsjaa e Jesús, jichiji yo ntee kʼo nee ra mba̱ra̱ji kʼo ju̱sʼꞹnꞹ, pe tsjaji ko respeto (1 Pedro 3:15). Ne Biblia mama ke yo cristiano dya ra xipjiji yo dyaja pje ra tsjaji ma dya neji. Xo mama ke yo ⱥtⱥji e Cristo “dya ni jyodʼꞹ kjo ra jyonbꞹ chu̱ʼu̱. Ni jyodʼꞹ kʼꞹ ra sʼiya texe yo ntee”, zø nʼaño ga kjijñiji (2 Timoteo 2:24).

Ja ga zøʼø e Yose ma ra ꞹmbꞹji yo ntee

 Ne Biblia mama: “Me ri jyodꞹji ja rgi tsa̱ra̱geji na joo texe yo ntee” (Hebreos 12:14). Dʼa ntee kʼꞹ mimi na joo ja nzi mama e Diosi dya kjo nuu na ꞹꞹ xo dya kjo ra jyombꞹ chu̱u̱ (Mateo 5:9). Xo ne Biblia mama ke ra sʼiyaji yo ntee zø angezeji nukʼꞹji na ꞹꞹ (Mateo 5:44).

 Ne Biblia mama kja Proverbios 6:16-19 ke Mizhokjimi ꞹmbꞹ kʼo na sʼoo, ngekʼua “dya nee” ke ra kjagøjikʼo. Ne jñaa ke ba e̱je̱nu nee ra mama ke angeze dya ga zøʼø na joo ma dʼa ntee kjaa kʼo na sʼoo. Ne Biblia mama ke e Diosi søø ra pombꞹ yo ntee ma ra jyɇziji kʼo na sʼoo ñe ra dyⱥtⱥji angeze (Isaías 55:7).

Yo mama ne Biblia pjøxkꞹji ra tʼekjañomꞹji yo ntee

 Tito 3:2: “Zø pje kʼo ra xipji zø pɇsʼi raso kʼꞹ ra ꞹdʼꞹji me jotrjo rga dyⱥrⱥji, ñe ra jyodʼꞹji rga minji na joo ko yo ntee texe yo paa”.

 Mateo 7:12: “Kʼua ja nzi gi ñegeji kʼꞹ ra sʼiyatsʼꞹji yo ntee, je xo ga kjanu rgi sʼiyagejiyo”.

 Josué 24:15: “Juajnꞹjidya kjo nge kʼꞹ ri matrʼꞹji”.

 Hechos 10:34: “Mizhokjimi dya juajnꞹ kjo ra sʼiya”.

 Habacuc 1:12, 13: “[Mizhokjimi], dya søø ri jyɇzi ra bʼꞹbʼꞹ kʼo na sʼoo”.

 Romanos 12:19: “Ma kjo kʼo pje ra tsjakʼꞹji na sʼoo, dya ri nzhopkeji. Nutsʼkʼeji jyɇziji ra nzhopkꞹji Mizhokjimi. Na ngeje o Jñaa Mizhokjimi je tʼopjꞹ akjaba: “Ngetsʼkʼø ra nzhopkʼø ma kjo kʼo pje kjapꞹ na sʼoo kʼꞹ nu minteji. Ngetsʼkʼø je ra castigao”, eñe kʼin Jmuji”. a

 E Jehová dya nee ke ra nzhopkꞹji kʼo na sʼoo ma pje kʼo ra tsjakꞹji yo dyaja. Angeze ra øtꞹ nguenrra yo ntee nu paa ke a go juajnꞹ. Ma xi gi nee ri pa̱ra̱, xørꞹ ne artículo “¿Alguna vez se hará justicia en el mundo?”.