Har-Magedon ochung’ne lweny mogik ma biro betie e kind loje mag dhano kod Nyasaye. Lojego kaachiel gi joma riwogi, kwedo Nyasaye kendo gitamore riwo lwedo lochne kata mana gie kindegi. (Zaburi 2:2) Har-Magedon biro tieko loje duto mag dhano.​—Daniel 2:44.

“Har-Magedon” yudore dichiel e Muma e Fweny 16:16. Bug Fweny ne okoro ni, “ruodhi mag piny mangima,” biro chokore ne “lweny mar odiechieng’ maduong’ mar Nyasaye Manyalo Duto” e ka ma iluongo gi dho Hibrania ni Har-Magedon.​—Fweny 16:14.

Gin jomage ma biro kedo e Har-Magedon? Yesu Kristo biro telo ne oganda lweny manie polo mondo gitiek jowasik Nyasaye. (Fweny 19:11-16, 19-21) Jowasigugo oriwo joma kwedo loch mar Nyasaye kod joma ochaye.​—Ezekiel 39:7.

Be lweny mar Har-Magedon biro timore mana e alwora mar Middle East? Ooyo. Lweny mar Har-Magedon biro timore e piny duto, to ok mana kamoro achiel.​—Jeremia 25:32-34; Ezekiel 39:17-20.

“Har–Magedon” (ma e dho Hibrania iluongo ni Har Meghiddohnʹ), tiende en “Got mar Megido.” Megido ne en achiel kuom taonde ma ne nie Israel machon. Weche histori nyiso ni lwenje mager ne igoyoga kuno. Moko kuom lwenjego ondik e Muma. (Jong’ad Bura 5:19, 20; 2 Ruodhi 9:27; 23:29) Kata kamano, Har-Magedon ok en kamoro sie ma yudore but Megido. Onge got maduong’ kuno, kendo kata mana Paw Jezreel duto man machiegni gi kanyo ok nyal romo ji duto ma kedo ne Nyasaye. Kar mano, Har-Magedon en wach mitiyogo kiwuoyo kuom gima biro timore sama ogendni duto ochokore mondo giked gi loch mar Nyasaye.

Weche biro chalo nade e kinde lweny mar Har-Magedon? Kata obedo ni ok wang’eyo ni Nyasaye biro tiyo gi tekone e yo mane, gima wang’eyo en ni Nyasaye nyalo tiyo gi gik ma notiyogo e kinde mokalo kaka pe, yiengni mar piny, koth, mach kod salfa, mil polo, kod tuoche. (Ayub 38:22, 23; Ezekiel 38:19, 22; Habakuk 3:10, 11; Zekaria 14:12) Nikech chochni biro betie, nitie jowasik Nyasaye moko ma biro negore, kata kamano, gibiro fwenyo ni Nyasaye e ma kedo kodgi.​—Ezekiel 38:21, 23; Zekaria 14:13.

Be Har-Magedon e ma biro bedo giko mar piny? Ooyo, ok obi bedo giko mar pinywani nikech kae e kama dhano biro dakie nyaka chieng’. (Zaburi 37:29; 96:10; Eklesiastes 1:4) Har-Magedon ok bi ketho dhano duto, kar mano ibiro res “oganda . . . mang’ongo” mar jotich Nyasaye.​—Fweny 7:9, 14; Zaburi 37:34.

Sama Muma wuoyo e wi “piny,” ok owuoga awuoya e wi piny ma wadakieni kende. Kar mano, seche moko owuoyoga e wi joma richo ma kwedo Nyasaye. (1 Johana 2:15-17) Mano nyiso maler ni lweny mar Har-Magedon biro ketho mana joma richo lilo.​—Mathayo 24:3.

Lweny mar Har-Magedon biro timore karang’o? Sama Yesu ne wuoyo e wi “masira maduong’” ma gikone ne dhi kelo Har-Magedon, nowacho niya: “Chieng’no kod sano, onge ng’at mong’eyo, kata malaike manie polo kata Wuod Nyasaye, to mana Wuora.” (Mathayo 24:21, 36) Kata kamano, Muma nyisowa ni Har-Magedon biro timore e kinde ma Yesu nitie, ma gin kinde ma nochakore e higa 1914.​—Mathayo 24:37-39.