Nikech Jachien en chuech mar roho, odak kama ok wanyal neno. Kata kamano, mano koro ok nyis ni odak kama iwang’oe joricho gi mach, mana kaka onyis e picha manie sulani.

“Lweny ma notimore e polo”

Kuom kinde, Satan Jachien ne nyalo dhi e polo kaka odwaro. Bende, ne onyalo dhi e nyim Jehova mana kaka malaike moko mochung’ motegno ne timo. (Ayub 1:6) Kata kamano, Muma ne okoro ni lweny ne dhi ‘muoch e polo’ kendo lwenyno ne dhi miyo oriemb Satan e polo ma ‘wite e piny.’ (Fweny 12:7-9) Muma kaachiel gi gik ma timore e piny nyiso gadier ni lwenyno ne osetimore e polo. Koro Jachien ni e piny kendo ok onyal dok e polo.

Be mano koro nyiso ni nitie kamoro sie ma Jachien odakie e pinywani? Kuom ranyisi, Muma luongo taon machon mar Pergamo ni “ka ma kom-loch mar Satan nitiere” kendo “ka ma Satan odakie.” (Fweny 2:13) Wechego nyiso mana ni lamo mar Satan nopong’ ahinya e taondno. Muma wacho ni Jachien en jaloch e wi “pinjeruodhi duto mag piny” omiyo, ok wanyal wacho ni odak kamoro sie e piny. Kata kamano, gima wang’eyo en ni en e piny kendo ok onyal dok e polo.​—Luka 4:5, 6.