Biro mar Kristo Tiende En Ang’o?

TUGE

Dwoko ma Muma chiwo

Muma wuoyo nyading’eny e wi kinde ma Kristo biro biro e piny mondo ong’ad ne ji bura. * Kuom ranyisi, Mathayo 25:31-33 wacho niya:

“Ka Wuod dhano [Yesu Kristo] obiro e duong’ne, kendo ka malaike duto ni kode, eka nobed e kom-lochne ma nigi duong’. Ibiro chok ogendni duto e nyime, eka obiro pogo ji koketogi e kidienje ariyo mana kaka jakwath pogo rombe gi diek. Kendo noket rombe e bade korachwich to diek koracham.”

Kinde mag ng’ado bura miwuoye e ndikono nobed e ndalo “masira maduong’,” ma en masira ma pok notimore nyaka nene. Masirano biro chopo e gikone e lweny mar Har–Magedon. (Mathayo 24:21; Fweny 16:16) Jowasik Kristo miwuoyo kuomgi kaka diek e ngero ma Yesu nogoyono “biro yudo buch kum mar kethruok ma nyaka chieng’.” (2 Jo-Thesalonika 1:9; Fweny 19:11, 15) Joma iwuoyo kuomgi kaka rombe to biro yudo “ngima ma nyaka chieng’.”—Mathayo 25:46.

Kristo nobi karang’o?

Yesu nowacho niya: “Kuom wach chieng’no kod sano, onge ng’at mong’eyo.” (Mathayo 24:36, 42; 25:13) Kata kamano, nowuoyo e wi “ranyisi” moting’o weche bwora ma ne dhi konyo ji fwenyo ni biro mare chiegni.—Mathayo 24:3, 7-14; Luka 21:10, 11.

Be Kristo biro biro ka en gi del mar polo koso mar ringruok?

Yesu ne ochier ka en gi del mar polo, omiyo, obiro biro mana gi del ma kamano to ok del mar ringruok. (1 Jo-Korintho 15:45; 1 Petro 3:18) Mano e momiyo e odiechieng’ mogik ka pok Yesu notho, nonyiso jootene kama: “Pod odong’ kinde matin to piny ok bi nena kendo.”—Johana 14:19.

Puonj moko ma ok ni kare ma ji nigo e wi biro mar Kristo

Puonj ma ok ni kare: Ni sama Muma wacho ni ji biro neno Yesu “ka biro e boche polo,” mano nyiso ni ji biro nene gi wang’gi.—Mathayo 24:30.

Adiera: Kinde mang’eny, Muma tiyo gi boche polo kowuoyo kuom gima ok nyal ne gi wang’. (Tim Jo-Lawi 16:2; Kwan 11:25; Rapar mar Chik 33:26) Kuom ranyisi, Nyasaye nonyiso Musa kama: “Abiro iri e bor polo mapek.” (Wuok 19:9) To Musa ne ok oneno Nyasaye gi wang’e. Kamano bende, sama Muma wacho ni Kristo biro “biro e boche polo,” tiende en ni ji biro fwenyo ni osebiro kata obedo ni ok gibi nene gi wang’gi.

Puonj ma ok ni kare: Ni weche ma otigo kiwuoyo e wi biro mar Kristo e Fweny 1:7 ni “wenge duto biro nene,” nyiso ni ji duto biro nene achiel kachiel.

Adiera: E dho Grik, wach ma Muma tiyogo ni “wang’” kod “neno” seche moko itiyogo kiwuoyo kuom fwenyo kata ng’eyo gima ji mang’eny ok ong’eyo, to ok neno gimoro achiel kachiel. * (Mathayo 13:15; Luka 19:42; Jo-Rumi 15:21; Jo-Efeso 1:18) Muma wacho ni Yesu ma ne ochier en “jal modak e ler ma ok nyal chopie, . . . ma onge dhano . . . ma nyalo nene.” (1 Timotheo 6:16) Omiyo, sama Muma wacho ni “wenge duto biro nene,” gima owacho en ni ji duto biro fwenyo ni Yesu e jal ma ng’ado bura e lo Nyasaye.—Mathayo 24:30.

Puonj ma ok ni kare: Ni weche ma yudore e 2 Johana 7 nyiso ni Yesu biro biro gi del mar ringruok.

Adiera: Ndikono wacho niya: “Jowuond mang’eny osesieko e piny, ma ok nyis yie ni Yesu Kristo ne obiro e ringruok.”

E ndalo jaote Johana, nitie jomoko ma ne odagi yie ni Yesu ne osegabiro modak e piny kaka dhano kae en gi del mar ringruok. Ne ging’ere kaka Jonostik (Gnostics). Ndiko mar 2 Johana 7 ne ondik mondo orie pach joma kamago.

^ par. 1 Sama jomoko wuoyo kuom biro mar Kristo, gihero tiyo gi weche kaka “birone mar ariyo” or “duoke mar ariyo”. Kata kamano, wechego ok yudre e Muma.

^ par. 9 Ne buk miluongo ni The New Thayer’s Greek-English Lexicon of the New Testament (1981), ite mag 451 kod 470.