Ooyo, pinywani ok nyal kethi, ok nyal wang’e, kata wile gi machielo. Muma puonjo ni Nyasaye nochueyo piny mondo ji odagie nyaka chieng’.

• “Jo makare nobed weg piny, kendo ginidagie nyaka chieng’.”​—Zaburi 37:29.

• “[Nyasaye] oseguro piny motegno e wi misene, piny ok bi yiengni nyaka chieng’.”​—Zaburi 104:5.

• ‘Piny siko nyaka chieng’.’​—Eklesiastes 1:4.

• “Jal ma nochueyo piny mi oguro misene motegno, ne ok ochueye kayiem nono, to nochueye mondo ji odagie.”​—Isaya 45:18.

Nyasaye ok bi weyo mondo dhano oketh piny chuth ka gichide, gikethe gi gige lweny, kata gik mamoko. Kar mano, obiro “ketho jo ma ketho piny.” (Fweny 11:18) Obiro timo mano nade?

Pinyruodh Nyasaye makare chuth biro kawo kar pinjeruodhi mag piny ma ok osemiyo piny obedo kama ber. (Daniel 2:44; Mathayo 6:9, 10) Wuod Nyasaye ma en Yesu Kristo e ma biro telo ne Pinyruodhno. (Isaya 9:6, 7) Ka ne Yesu ni e piny, notimo honni madongo. (Mariko 4:35-41) Kaka Ruoth mar Pinyruodh Nyasaye, Yesu biro bedo gi loch e wi gik moko duto manie piny. Obiro chueyo gik moko mondo gibed manyien, kolosogi mana kaka ne gin e puodho mar Eden.​—Mathayo 19:28; Luka 23:43.

Ooyo, ok opuonj kamano. Miriambono bedoe nikech paro ma ok kare ma ji nigo e wi ndiko mar 2 Petro 3:7, ma wacho niya: “Polo kod piny ma nitiere sanigi osekan ne mach.” Ne ane weche moko ariyo madongo manyalo konyowa winjo tiend ndikono:

1. Muma tiyo gi weche kaka “polo,” “piny,” kod “mach” kowuoyo e wi gik mopogore opogore. Kuom ranyisi, Zaburi 33:8 wacho niya: “Piny duto mondo oluor Jehova. Ji duto manie piny mondo oluore.” E ndikono, “piny” ochung’ ne oganda dhano.

2. Weche molworo ndiko mar 2 Petro 3:7 konyowa ng’eyo tiend polo, piny, kod mach ma ndikono wuoye. Kwan matindo 5 kod 6 wacho gima chalo gi ma notimore e Ataro mar kinde Noa. E kindeno piny nokethi, kata kamano, piny ma wadakieni to ne ok olal. Kar mano, Atarono noyweyo oko “piny” ma en jogo ma ne timo timbe mag mahundu. (Chakruok 6:11) Bende, noketho “polo,” tiende ni jogo ma ne locho e wi ogandano. Omiyo, noketh jomaricho, to ok pinyni. Noa kaachiel gi joode notony e kindeno kendo ne gidak e piny bang’ Ataro.​—Chakruok 8:15-18.

“Mach” miwuoye e ndiko mar 2 Petro 3:7 bende chalo gi pi e kinde Ataro nikech obiro ketho ji duto maricho, to ok pinywani. Nyasaye osingonwa “polo manyien gi piny manyien, ka ma tim makare nobedie.” (2 Petro 3:13) “Polo manyien,” kata loch manyien mar Pinyruodh Nyasaye biro locho e wi “piny manyien,” kata oganda dhano manyien. E kinde ma Pinyruodhno biro locho, piny biro bedo paradiso.​—Fweny 21:1-4.