Batiso En Ang’o?
Dwoko ma Muma chiwo
Batiso en nyumo dend ng’ato duto e pi kae to ichako igole oko. * Mano emomiyo nobatis Yesu e aora maduong’. (Mathayo 3:13, 16) Ja-Ethiopia moro bende nokwayo mondo obatise ka ne gichopo e “yawo moro ma nigi pi.”—Tich Joote 8:36-40.
Tiend batiso
Muma pimo tiso ng’ato kod yiko ng’ato. (Jo-Rumi 6:4; Jo-Kolosai 2:12) Sama itiso ng’ato, ochalo ka gima otho nikech oweyo ngimane machon kae to ochako ngima manyien kaka Jakristo mochiwore ne Nyasaye. Batiso kod okenge ma ng’ato kawo eka otise, en chenro ma Nyasaye oketo ma miyo ng’ato bedo gi chuny maler koketo yie kuom misango mar Yesu Kristo. (1 Petro 3:21) Mano emomiyo Yesu nonyiso jolupne ni nyaka batisgi.—Mathayo 28:19, 20.
Be tiso ng’ato gi pi lwoko richo?
Ooyo. Muma puonjo ni mana remb Yesu ma ne ochuer kende e ma nyalo pwodho richowa duto. (Jo-Rumi 5:8, 9; 1 Johana 1:7) Kata kamano, mondo misango mar Yesu okony ng’ato, nyaka obed gi yie kuom Yesu, olok ngimane mondo oluwre gi puonj mag Yesu, kae to obatise.—Tich Joote 2:38; 3:19.
Be Muma puonjo ni onego obatis nyithindo matindo?
Ooyo. Muma ok puonj ni onego batis nyithindo matindo. Kanise moko timoga nyasi sama gitiso nyithindo ka gikiro kata olo pi e wigi kae to gimiyogi nying. Joma pachgi otegno ma nyalo winjo kendo yie kuom “wach maber e wi Pinyruodh Nyasaye” e ma onego obatis. (Tich Joote 8:12) Batiso otudore gi winjo wach Nyasaye, yie kuom wachno, kod weyo richo, to mago gin gik ma nyathi ma pod tin ok nyal timo.—Tich Joote 2:22, 38, 41.
E wi mano, Muma nyisowa ni Nyasaye neno nyithindo matindo kaka joma ler e wang’e nikech jonyuolgi omakore kode. (1 Jo-Korintho 7:14) Dine bed ni Nyasaye dwaro ni obatis nyithindo matindo, kare onge tiende mondo okwan-gi kaka joma ler mana nikech timbe jomamoko. *
Miriambo ma ji wacho e wi batiso mar Jokristo
Miriambo: Kiro kata olo pi e wi ng’ato sama itise chal mana gi nyume e pi.
Adiera: Joma ne obatis miwuoyo kuomgi e Muma ne onyum e pi. Kuom ranyisi, sama Filipo notiso Ja-Ethiopia, ‘ne gilor mi gidonjo e i pi’. Bang’e, ne “giwuok e pi.”—Tich Joote 8:36-39. *
Miriambo: Sama Muma wacho ni joot duto ne obatisi, mano noriwo nyaka nyithindo matindo. Kuom ranyisi, Muma wacho kama e wi jarit jela moro ma ne ni Filipi: “En kaachiel gi joode duto ne obatisgi.”—Tich Joote 16:31-34.
Adiera: Weche molernwa e wi jarit jelano, nyiso ni joma itiso winjo “wach Jehova” kendo gibedo ‘mamor ahinya’ gi wachno. (Tich Joote 16:32, 34) Wechego nyiso ni nyithindo ma ne nitie e od jarit jelano ne ok obatis nikech ne ok ginyal winjo tiend wach Jehova.
Miriambo: Sama Yesu nowacho ni Pinyruodh Nyasaye en mar nyithindo, mano nyiso ni onego batis nyithindo.—Mathayo 19:13-15; Mariko 10:13-16.
Adiera: Yesu ne ok wuo e wi batiso sama ne owacho wechego. Kar mano, notemo wacho ni joma ne dhi donjo e Pinyruodh Nyasaye, ne nyaka bed joma obolore kendo minyalo puonj mana kaka nyithindo.—Mathayo 18:4; Luka 18:16, 17.
^ par. 1 E dho Grik, wach molok ni “batiso” tiende en “nyumo.” Som Theological Dictionary of the New Testament, Volume I, ite mar 529.
^ par. 5 Kaluwore gi The International Standard Bible Encyclopedia, “onge gimoro amora e Muma Manyien manyiso ni onego batis nyithindo.” Bugno medo wacho ni tiso nyithindo en “miriambo mochuog achuoga” nikech ji paro ni batiso gologa richo.—Volume 1, ite mar 416-417.
^ par. 7 E bwo wich ma wacho ni “Batiso (e Muma),” buk miluongo ni New Catholic Encyclopedia wacho kama: “Nenore ni kanisa mokwongo ne nyumo ji e pi sama ne ibatisogi.”—Volume 2, ite mar 59.
Samoro Inyalo Hero Magi Bende
ESSENTIAL BIBLE TEACHINGS
Be Nyasaye Oyie gi Dinde Duto?
Ji mag’eny paro ni ng’ato nyalo lemo e din moro amora.
DWOKO PENJO MA JI NIGO E WI MUMA
Warruok En Ang’o?
Ng’ato nyalo timo ang’o mondo oware? To iwaro ng’ato kuom ang’o?
