“Kik uparru kuom kiny, nikech kiny nobed gi parruokne owuon. Odiechieng’ kodiechieng’ nigi chandruokne morome.”​—Mathayo 6:34, Loko mar Piny Manyien.

 “Kik uparru kuom gik ma kiny notimre kiny, nikech kiny nobed gi mage owuon. Odiechieng’ kodiechieng’ nigi chandruokne morome.”​—Mathayo 6:34, The Bible in Luo, 1976.

 Yesu nowacho weche ma yudore e ndikoni mondo ojiwgo jowinjone ni kik giparre mokalo tong’ nikech chandruoge ma kinde ma biro. Kar mano, ne ginyalo dhi maber ka ginyagre mana gi chandruok ma sechego.

 Yesu ok ne tem wacho ni ok onego wapar gik ma kiny kata ni kik waikre ne ngima ma kiny. (Ngeche 21:5) Kar mano, ne okonyowa mondo wawe bedo gi parruok mokalo tong’ e wi gik ma kiny, ma samoro ok bi timore. Parruok ma kamano mayowa mor kendo monowa timo tije monego watim. Parruok e wi chandruoge ma kiny ok bi tiekonwa chandruogego. Kinde mang’eny, weche ok bedga kaka ne waparo, kata samoro chandruogego ok bed malich kaka ne waparo.

 Wechego gin moko kuom puonj mong’ere ahinya e twak ma Yesu nogolo e got, ma yudore e Mathayo sula 5-7. E i twagno, Yesu nowacho ni parruok ok nyal konyo kata medo bor mar ngima ng’ato. (Mathayo 6:27) Bende, nowacho ni ka waketo Nyasaye mokwongo e ngimawa, to ok wabi bet gi parruok mokalo tong’ ne gik ma kiny. Nyasaye rito cham kod le, omiyo, obiro rito bende jogo ma tiyone.​—Mathayo 6:25, 26, 28-33.