“Kinde ma noket osechopo, kendo Pinyruodh Nyasaye osekayo machiegni. Lokuru chunyu ua e richo kendo ubed gi yie kuom wach maber.”​—Mariko 1:15, Loko mar Piny Manyien.

 “Ogik kare, kendo pinyruodh Nyasaye chiegni; lokuru chunyu, kendo yieuru kuom Wach Maber.”​—Mariko 1:15, The Bible in Luo, 1968.

 Yesu Kristo nowacho ni Pinyruodh Nyasaye a ne “chiegni,” kata ni ne “osekayo machiegni,” nikech en e Ruoth mar Pinyruoth ma birono to ne en e kind joma nowuoyogo gie sechego.

 Yesu ne ok owacho ni Pinyruoth koro ne osechako locho gie kindeno. Bang’e nonyiso jopuonjrene ni Pinyruoth ne dhi chako locho e kinde ma biro. (Tich Joote 1:6, 7) Kata kamano, nofwenyore e kinde sie ma nosekor e Muma ni Ruoth b mar Pinyruodh Nyasaye ne dhi fwenyoree. Mano e momiyo ne onyalo wacho ni: “Kinde ma noket osechopo,” tiende ni, kinde ma nonego ochakie lando wach maber mar Pinyruoth.​—Luka 4:16-21, 43.

 Mondo ji oyud gueth mag wach maber mar Pinyruoth, ne dwarore mondo gilok chunygi, tiende ni, giwere gi richo ma ne gitimo chon, kae to gichak dak ka luwore gi puonj mag Nyasaye. Joma ne oloko chunygi gadier ne nyiso ni giyie kuom wach maber mar Pinyruoth ma ne dhi chako locho e kinde ma biro.

 Yesu nowacho wechegi kinde ma nochako tije mar yalo ka en Galili. Mathayo 4:17 wacho ni “chakre kindeno ka dhi nyime,” Yesu ne yalo e wi Pinyruodh Nyasaye. Pinyruoth e wach maduong’ ma Yesu ne lando. Kendo weche ma nowacho ma yudore e buge ang’wen mag Injili c nonwoyo wach Pinyruoth mokalo nyadi 100. E i Muma, Yesu nowuoyo e wi Pinyruoth nyadi ng’eny moloyo wach moro amora ma ne owuoyoe.