PENJO MAR 2
Gin Yore Mage ma Inyalo Puonjorigo e Wi Nyasaye?
“Bug Chikni kik a e dhogi, to some gi dwol mapiny odiechieng’ gotieno mondo omi iluw weche duto mondik e iye; eka inibed gi rieko, kendo yoreni duto biro dhi maber.”
“Ne gidhi nyime somo bugno gi dwol maduong’, ne gisomo Chik Nyasaye madier, ka gilero tiende maber. Omiyo, ne gikonyo ji winjo tiend gima isomo.”
“Ng’at mamor en ng’at ma ok luw paro ma joricho ng’ado . . . , to omor gi chik Jehova, osome gi dwol mapiny odiechieng’ gotieno. . . . Gimoro amora motimo nodhi maber.”
“Filipo noringo nyaka e bath garino mi nowinjo ka Ja-Ethiopiano somo bug janabi Isaya gi dwol maduong’, mi nopenje kama: ‘Be adier iwinjo tiend weche misomogo? ’ Nodwoko niya: ‘Kuom adier, ere kaka dawinj tiendgi ka ok ng’ato olerona? ’ ”
“Kido ma en-go ma dhano ok nyal neno, tiende ni, tekone mochwere kod duong’ ma en-go kaka Nyasaye, osebedo ka nyisore maler chakre chuech piny ka dhi nyime, nimar ginenore e gik ma nochueyo. Omiyo, dhano ok nyal wuondore ni gikia.”
“Par matut kuom wechegi; ket chunyi duto kuomgi, mondo dongruok mari onenre ayanga ne ji duto.”
“Wadewreuru mondo wajiw hera kod timbe mabeyo, ma ok wajwang’ bedo e chokruogewa kanyachiel.”
“Ka nitiere ng’ato e kindu mochando rieko, osik kokwayo Nyasaye, nimar Nyasaye chiwo rieko ne ji duto e yo mogundho ma ok omany ketho kuom ng’ato, kendo enomiyego.”
