Tich Joote 28:1-31
-
Paulo yalo gi chir kuom higni ariyo (30, 31)
28 Ka ne wachopo maber e dho wadhno, ne wafwenyo ni chulano ne iluongo ni Molta.+
2 Jochulano* nonyisowa ng’wono e okang’ maduong’ ahinya. Nikech koth ne chue kendo koyo ne ng’ich, ne gimokonwa mach mi girwakowa waduto e yo mang’won.
3 Kata kamano, sa ma Paulo nochoko yien moko mi oketo e mach, thuol moro nowuok nikech mach kendo nomoko e lwet Paulo.
4 Ka jo chulano noneno thuol ma nigi sumno koliero e lwete, ne gichako wacho e kindgi kama: “Adier, ng’atni en janek, kendo bura ok oyiene mondo obed mangima kata obedo ni osetony e nam.”
5 Kata kamano, Paulo noteng’o thuondno mi ne olware e mach, to ne ok ohinyore.
6 Jogo ne paro ni lwete ne dhi kuot kata ni ne odhi gore piny apoya mi otho. Ka ne giserito kuom seche moko mogwaro mi gineno ni onge gima rach ma ne timorene, ne giloko pachgi mi gichako wacho ni Paulo en nyasaye.
7 Koro e alwora mar gweng’no ne nitie puothe mag jatend chulano ma nyinge Publio. Norwakowa gi mor mi noritowa maber kaka wende kuom ndalo adek.
8 To wuon Publio ne nindo nikech ne en gi tuo mar midhusi kod ndira,* eka Paulo ne odhi ire molemo koketo lwetene kuome kendo ne ochange.+
9 Ka mano nosetimore, jomamoko ma ne tuore ma nodak e chulano bende nochako biro ire mondo ochanggi.+
10 Jogo ne odhialowa ahinya kuom miyowa mich mogundho, kendo kane wachako wuodhwa e nam, ne gimiyowa gik moko duto ma ne wanyalo konyorego.
11 Dweche adek bang’e, ne wachako wuoth ka waidho meli moro ma nigi kido mag Yawuot Zeu gi yo ka wiye. Melino nowuok Aleksandria, to nikech ne en ndalo koyo noyudo ogowo e chulano.
12 Ne wagowo e wath ma Surakusa ma wabedo kanyo kuom ndalo adek.
13 Ka ne waa kanyo ne wadhi mi wachopo Regium. Odiechieng’ achiel bang’e, yamo mowuok milambo nosieko mi kinyne ne wachopo Puteoli.
14 Kanyo ne wayudo owete kendo ne gikwayowa ni wabed kodgi kuom ndalo abiriyo, eka ne waa kanyo mi wachomo Rumi.
15 Ka owete nowinjo ni wadhi kuno, ne gibiro romonwa e Chiro mar Apio kod kar chiemo gi buoro miluongo ni Udi Adek. Ka Paulo nonenogi, nogoyo ne Nyasaye erokamano kendo nobedo gi chir.+
16 Gikone, kane wadonjo Rumi, ne oyie ne Paulo dak kende e ode mochulo ka en gi jalweny ma rite.
17 Kata kamano, ndalo adek bang’e, ne oluongo jotend Jo-Yahudi. Ka ne gisechokore, nowachonegi kama: “Owetena, kata obedo ni ok ne atimo gima kwedo ogandawa kata tim kwerewa,+ ne ogola Jerusalem kotueya mi oketa e lwet Jo-Rumi.+
18 Kendo ka ne gisenono wachna,+ ne gidwaro gonya nimar ne ok giyudo gimoro kuoma mowinjore gi tho.+
19 To ka Jo-Yahudi ne ok dwar ni ogonya, ne akwayo mondo Kaisar e ma oyala,+ to ne ok atimo kamano nikech ne an gi wach moro ma ne adwaro donjogo ne ogandawa.
20 Wachni e momiyo ne akwayo ni mondo aneu kendo awuo kodu, nimar otueya gi nyorochegi nikech geno ma Israel osebedogo.”+
21 Ne gidwoke kama: “Pok wayudo barupe moa Judea ma wuoyo kuomi, bende onge ng’ato ang’ata kuom jowetewa moa kuno mosehulonwa kata mosewachonwa gimoro amora marach kuomi.
22 Kata kamano, waneno ni ber mondo wawinj paro ma in-go iwuon, nimar wang’eyo ni kamoro amora ji wuoyo marach kuom kidieny mar dinni.”+
23 Eka ne gichano odiechieng’ moro mondo girom kode, kae to ne gibiro ire ji mang’eny kama ne odakie. Ne oleronegi wachno kochiwonegi neno e okang’ mong’ith e wi wach Pinyruodh Nyasaye kotiyo gi Chik Musa+ kod weche Jonabi+ mondo olokgo pachgi giyie kuom Yesu.+ Notimo kamano chakre okinyi nyaka odhiambo.
24 Moko kuomgi noyie kuom weche ma nowachogo; to moko ne ok oyie.
25 Omiyo, nikech ne gipogore e paro e kindgi, ne gichako a, kendo Paulo nowacho kama:
“Roho maler nowacho kare ne kwereu kokalo kuom janabi Isaya
26 niya, ‘Dhi ir ogandano mondo iwachnegi kama: “Adier winjo to unuwinj to ok unung’e tiende ngang’, kendo adier rango to unurang, to ok unune ngang’.+
27 Nimar chuny jogi osetamore rwako wach, kendo gisewinjo gi itgi to ok gitim gimoro, kendo giseumo wengegi mondo kik wengegi nen ngang’, mondo kik itgi winj wach, mondo kik wach donj e chunygi, kendo kik gilokre mi achanggi.”’+
28 Omiyo, daher mondo ung’e ni warruok moa kuom Nyasayeni, oseter ne ogendni mamoko.+ Kuom adier, gibiro rwake.”+
29 *—
30 Omiyo, ne obet kanyo kuom higni ariyo mangima, ka opango ode owuon,+ kendo jogo duto ma nobiro ire ne ojarwakogi e yo mang’won,
31 koyalonegi wach Pinyruodh Nyasaye, bende kopuonjogi wach Ruoth Yesu Kristo, kendo ne owuoyo ka en thuolo ahinya ma onge luoro,+ kendo onge gima ne geng’e.
Weche Moler Piny
^ Joma ne wacho dhok ma wendo.
^ Mae en tuo ma miyo ng’ato diewo nyaka remo.
^ Som Apendiks A3.
