Ne Jo-Hibrania 9:1-28
9 To singruok ma chonno ne nigi chike miluwo motudore gi tij Nyasaye kod ka maler+ e piny.
2 Nimar ne oger hema mopog iye, kae to ka ma ne opog mokwongo ne nitie gir chungo taya,+ kod mesa, gi makate michiwo e nyim Nyasaye;+ to iluongo kanyo ni Ka Maler.+
3 To e tok pasia mar ariyo,+ ne nitie ka ma opog e hemano miluongo ni Ka Maler Moloyo.+
4 Kanyo ne nitie gir wang’o ubani molos gi dhahabu+ kod sandug singruok+ ma omwon gi dhahabu lilo,+ ma iye ne nitie agulu molos gi dhahabu. Aguluno ne oting’o manna,+ ludh Harun ma ne oloth,+ kod kite mopa+ mag singruok;
5 to gi ka wiye malo ne nitie jokerubi ma nigi duong’ ka giumo raum mar loso winjruok.+ To sani ok e sa mar wuoyo e wi wechego e yo matut.
6 Ka noseger gigo e yo ma kamano, pile jodolo ne donjo ka ma opog mokwongo e hemano mondo giti tije mowal;+
7 to jadolo maduong’ kende e ma ne donjo dichiel e higa+ ka ma opog mar ariyono, kendo nodonjo gi remo+ modhi chiwo ne en owuon+ kendo ne richo ma oganda+ nosetimo ka gikiya.
8 Kuom mano, roho maler nyiso ratiro ni yo ma dhi ei ka maler ne pok ofwenyore e kinde ma hema mokwongono ne pod nitie.+
9 Hemano en mana ranyisi mar ndalo ma sani,+ kendo kaluwore gi chenrono, ne ichiwo mich kanyachiel gi misengni bende.+ Kata kamano, mago ok mi ng’at ma timo tij Nyasaye obed malong’o chuth mi koro obed gi chuny ma onge bura.+
10 Gin mana gik motudore gi chiemo gi gik mimadho kod tim lwokruok mopogore opogore.*+ Ne gin mana chike mag ringruok,+ kendo ne oketgi mondo giti nyaka chop ndalo ma noseket mar rieyo gik moko.
11 Kata kamano, ka Kristo nobiro kaka jadolo maduong’ mar gik mabeyo mosetimore, nodonjo e hema maber moloyo kendo malong’o chuth. Ok en hema molos gi lwedo, tiende ni ok en chuech mar pinyni.
12 Ne odonjo iye nyaka e ka malerno, ok gi remb diek kod mag nyiruedhi, to nodonjo gi rembe owuon,+ kotimo kamano dichiel ma ok bi nwo kendo, mi nokelonwa resruok ma nyaka chieng’.+
13 Nimar ka remb diek gi mag ruedhi+ kod buch nyaroya ma ne ikiro kuom jo ma nosebedo ma ok ler ne pwodhogi mi gibed maler e ringruok,+
14 mano kaka remb Kristo biro timo kamano e okang’ maduong’ moloyo!+ Nimar ne ochiwore owuon kokalo kuom roho ma siko nyaka chieng’, ka oonge mbala e nyim Nyasaye. Donge obiro pwodhowa ka ogolowa e timbe ma kelo tho+ mi wabed gi chuny maler, mondo wati ne Nyasaye mangima?+
15 Mano e momiyo en jagach mar singruok manyien+ mondo kokalo kuom thone, nengo ma nochiwo owar ji+ a e ketho ma ne gitimo e bwo singruok machon, mondo jo ma oseluong obi oyud singo mar pok ma nyaka chieng’.+
16 Nimar sa mitimo singruok, chuno ni dhano ma timo singruogno nyaka tho,
17 nimar singruok tiyo mana ka gimoro otho, nikech ok onyal tiyo e kinde moro amora ka ng’at ma ne otimo singruogno pod ngima.
18 Nikech mano, singruok machon bende ne ok ochako tiyo ma onge remo ma ne ochuer.
19 Nimar ka Musa nosewuoyo gi ji duto e wi weche duto manie Chik, nokawo remb nyiruedhi, gi mag diek, gi pi, kae to ne okirogi e bug* singruok kendo kuom ji duto, kotiyo gi yie rombo makwar motue e yadh hisobu
20 kowacho niya: “Ma e remo mar singruok ma Nyasaye osechikou mondo uriti.”+
21 Kamano bende, ne okiro remo e hema kendo e gik moko duto mitiyogo e tich maler.+
22 Ee, kaluwore gi Chik, chiegni ni gik moko duto ipwodho mana gi remo,+ kendo onge richo minyalo we ne ng’ato mak mana ka remo ochuer.+
23 Kuom mano, ne dwarore ni gigo ma ne gin kaka ranyisi+ mag gik manie polo opwodh kitiyo gi yorego,+ to dwarore ni ochiw misengni malong’o moloyo ne gik manie polo.
24 Nimar Kristo ne ok odonjo ei ka maler molos gi lwedo,+ ma en mana kaka tipo mar gima sie,+ to ne odonjo ei polo+ mondo koro ochung’ e nyim Nyasaye e lowa.+
25 Mano ne ok tim ni mondo ochiwre owuon nyading’eny kaka jadolo maduong’ jadonjo ei ka maler higa ka higa+ kotiyo gi remo ma ok mare owuon.
26 Nono to dine odwarore ni osandre nyading’eny nyaka a chakruok mar piny. To koro sani ma en giko pinyni,* osebiro owuon dichiel ma ok bi nwo kendo, mondo otiek richo kokalo kuom chiwo ngimane owuon kaka misango.+
27 Kendo mana kaka tho orito dhano dichiel ma ok bi nwo kendo, eka bang’ mano bura,
28 e kaka Kristo bende ne ochiw dichiel ma ok bi nwo kendo, mondo oting’ richo mag ji mang’eny;+ kendo e kinde mar ariyo ma obiro fwenyoree, ok obi timo kamano mondo ogol richo, to mondo jo ma manye gi kinda ka gigeno yudo warruok obi onene.+
Weche Moler Piny
^ Grik, “batiso mopogore opogore.”
^ Kata, “bug adola mar.”
^ Kata, “chenro mar ndaloni.” Som Tiend Weche.
