Ne Jo-Hibrania 10:1-39
10 To nikech Chik oting’o mana tipo+ mar gik mabeyo ma biro,+ to ok gik ma sie, ok onyal* miyo jo ma sudo ir Nyasaye obed ma onge richo kokalo kuom dhi nyime chiwo mana misengnigo higa ka higa.+
2 Ka ok kamano, donge dikoro ne osewe chiw misengni? Nimar jo ma tiyo tij Nyasaye ma gin jo ma ne osepwodh mobedo maler chuth, chunygi koro ok nyal ketonegi bura kendo nikech richogi.
3 Kar mano, misengnigo paro ne ji richogi higa ka higa,+
4 nimar remb ruedhi kod mag diek ok nyal golo richo chuth.
5 Omiyo, ka obiro e piny, owacho kama: “‘Ne ok idwar misango gi chiwo, to kar mano ne iikona ringruok.
6 Ne ok iyie gi misengni miwang’o pep kod misengni mag richo.’+
7 Eka ne awachone niya: ‘Ne! A Nyasaye, asebiro (ondik weche ma wuoyo kuoma e buk modol) mondo atim dwachi.’”+
8 Bang’ kwongo wacho ni: “Ne ok idwar, kendo ne ok iyie gi misengni, gi chiwo, gi misengni miwang’o pep, kod misengni mag richo” —misengni ma Chik dwaro ni ochiw—
9 nowacho kama: “Ne! asebiro mondo atim dwachi.”+ Mano nyiso ni ogolo chenro mokwongo mondo eka okel mar ariyo.
10 Kokalo kuom ‘dwacheno,’+ koro osepwodhwa mi wabedo maler kuom ringre Yesu Kristo ma ne ochiw dichiel ma ok bi nwo kendo, mondo obed misango mar pwodho ji.+
11 Bende, pile ka pile jadolo ka jadolo kawo kare mondo oti tich maler,*+ kendo mondo ochiw mana misengnigo nyading’eny,+ ma gin gik ma ok nyal tieko richo chuth.+
12 To jali ne ochiwo misango achiel ma ok bi nwo kendo ne richo mag ji, mi ne obet piny e bad Nyasaye korachwich+
13 chakre kindeno, korito nyaka chop oket wasike obed kaka raten tiende.+
14 Nikech kuom golo chiwo achiel mar misango, jalo osemiyo jo ma ipwodho mondo obed maler koro bedo malong’o chuth+ kuom kinde duto.
15 E wi mano, roho maler bende chiwonwa neno ni mano en adier, nimar bang’ ka osewacho niya:
16 “Jehova* owacho, ‘Bang’ ndalogo, ma e singruok ma abiro timo kodgi. Anaket chikena e chunygi, kendo anandikgi e pachgi.’”+
17 Eka kendo owacho niya: “Ok anapar richogi kata timbegi ma ok kare ngang’.”+
18 Omiyo, ka osewe ne ji richogi, koro chiwo misango mondo opwodhgigo ok dwarre kendo.
19 Kuom mano, owetena, nikech koro remb Yesu osemiyo wan gi chir mar luwo yo ma donjo e ka malerno,+
20 ma ne oyawonwa mondo obed yo manyien kendo ma terowa e ngima ka nokalo nyaka ei pasia,+ ma en ringrene,
21 kendo nikech wan gi jadolo maduong’ moket e wi od Nyasaye,+
22 koro wasuduru ir Nyasaye ka wan gi chuny ma ni kare kod yie malong’o chuth, nimar osemi chunywa obedo maler kokalo kuom kironwa remo, kendo ringrewa oselwok gi pi maler,+ mi koro waonge gi chuny ma ketonwa bura.+
23 Wamakuru motegno tij hulo wach genowa e lela ma ok wayiengni,+ nimar jalo ma ne omiyowa singono en jal migeno.
24 Bende, wadewreuru* mondo wajiw hera kod timbe mabeyo,+
25 ma ok wajwang’ bedo e chokruogewa kanyachiel+ mana kaka jomoko osebet gi timno, to wajiwreuru,+ to moloyo sa muneno ni chieng’no medo sudo machiegni.+
26 Nimar ka wang’iyo gi timo richo goyiem bang’ ka wasebedo gi ng’eyo malong’o e wi adiera,+ koro onge misango moro amora mibiro gol kendo nikech richo,+
27 to gima odong’ en mana luoro nikech bura kod mirima mager ka mach ma biro tieko jo akwede chuth.+
28 Ng’at mochayo Chik Musa inego ma ok okeche bang’ ka ji ariyo kata adek osechiwo neno.+
29 To ng’at monyono Wuod Nyasaye, mosekawo remb singruok kayiem nono,+ ma en remo ma ne omiyo obedo maler, kendo ng’at mosenyiso achaya ne roho maler ma Nyasaye nyisogo ng’wonone mogundho, uparo ni ng’atno biro yudo kum maduong’ machal nade?+
30 Nimar wang’eyo Jal ma nowacho niya: “Chulo kuor en mara; abiro chulo.” Kendo niya: “Jehova* biro kumo joge.”+
31 En gima lich miwuoro ka ng’ato olwar e lwet Nyasaye mangima.
32 Kata kamano, sikuru ka uparo ndalo machon ka ne useyudo ler,+ kaka ne unano ka ukalo e chandruoge mager ahinya.
33 Nitie kinde ma ne uyudo wich-kuot kod masiche e lela,* kendo nitie kinde ma un bende ne usiro jo ma ne yudo chandruoge kaka mago.
34 Nimar ne unyiso ni ukecho jo ma ne ni e jela kendo ne uyie mondo oyak giu,+ ka ung’eyo ni un uwegi un gi mwandu maber moloyo kendo ma siko.+
35 Kuom mano, kik uwe chir ma un-go olalnu,* obiro miyo uyud gueth mogundho.+
36 Nimar dwarore ni ubed gi sinani+ mondo bang’ ka usetimo dwaro mar Nyasaye, gik ma ne osing ochopnu.
37 Nimar pod odong’ “mana kinde matin ahinya”+ ma “jalno ma biro nochop kendo ok obi deko.”+
38 “To ng’ata makare nobed mangima kokalo kuom yie,”+ to “ka odok chien, chunya ok bi mor kode.”+
39 Koro ok wan kaka jogo ma dok chien e kethruok,+ to wan jogo ma nigi yie ma biro miyo ores ngimawa.
Weche Moler Piny
^ Kata nyalo bedo, “dhano ok nyal.”
^ Kata, “ma tiyo ne oganda.”
^ Som Apendiks A5.
^ Kata, “waparreuru.”
^ Som Apendiks A5.
^ Grik, “kod masiche e lela kaka jo ma nie kar tuke.”
^ Kata, “thuolo ma un-go mar wuoyo olalnu.”
