Jeremia 8:1-22
8 “E ndalogo,” Jehova owacho, “choke ruodhi mag Juda kod choke jotende, gi choke jodolo, gi choke jonabi, kod choke jo modak Jerusalem ibiro gol e liete.
2 Ibiro mo chokego mondo chieng’ gi dwe gi sulwe me polo ma ne gihero kendo ma ne gilamo orieny kuomgi.+ Ok bi chokgi mondo oyikgi, to ibiro wegi mondo gibed kaka manyiwa e wi lowo.”+
3 “Ji duto modong’ e oganda marachni biro gombo tho kar ngima, e kuonde duto ma abiro keyogie,” Jehova Nyasach oganda lweny owacho.
4 “Kendo iniwachnegi ni, ‘Ma e gima Jehova owacho:
“Be gibiro podho ma ok gichung’ kendo?
Koso ka ng’ato olokore moduogo, donge ng’at machielo bende nyalo lokore ma duogi?
5 Ang’o momiyo ogandani, Jerusalem, osebaro kendo ok gidwar duogo ira?
Gimako miriambo matek;Gidagi duogo ira.+
6 Ne achiko ita mondo awinj wechegi, to ne giwacho mana gik ma ok kare.
Onge ng’at ma nolokore mondo owe richone, kata ma noywagore ni, ‘Ang’o ma asetimoni?’+
Ng’ato ka ng’ato dok e yore ma ji mang’eny luwo mana ka faras ma ringo matek ka dhi e lweny.
7 Kata mana ogungo ma fuyo e kor polo ong’eyo ndalo moketne;Akuche, opija, kod hundhwe* duogoga ka ndalogi ochopo.
To joga ok ong’eyo bura mar Jehova.”’+
8 ‘Ere kaka unyalo wacho ni: “Wariek, kendo wan gi chike mag Jehova”?
Adier, kalamb+ jondikou* itiyogo mana e ndiko miriambo.
9 Osekuod wi jo mariek.+
Luoro maduong’ osemakogi kendo ibiro jukgi.
Neuru! Gisedagi wach Jehova,Koro ere rieko ma gin-go?
10 Omiyo, abiro miyo jomamoko mondegi,Puothegi bende anami jomamoko;+
Chakre ng’at matinie mogik nyaka maduong’ mogik, ng’ato ka ng’ato yudo ohala e yor mibadhi;+Chakre janabi nyaka jadolo, giduto gihero mibadhi.+
11 Gitemo thiedho tuo marach ma joga* nigo mana ka gima ok en gima lich, ka giwacho ni,“Kuwe nitie! Kuwe nitie”To kuwe onge.+
12 Be wigi kuot nikech gik maricho ma gisetimo?
Gionge wich-kuot kata matin!
Bende, ok ging’eyo kata tiend bedo gi wich-kuot!+
Omiyo, gibiro lwar e kind jo ma oselwar.
Gibiro chwanyore chieng’ ma abiro kumogie,’+ Jehova owacho.
13 ‘E kinde ma abiro chokogie, abiro tiekogi chuth,’ Jehova owacho.
‘Onge olemb mzabibu ma biro dong’ e bade, kata ng’owo ma biro dong’ e yadhe, kendo obokegi biro ner.
Kendo gik ma namiyogi biro lal nono.’”
14 “Ang’o momiyo pod wabet kae?
Wachokreuru mondo wadonj e mier mochiel motegno+ mondo watho kuno.
Nimar Jehova Nyasachwa biro tiekowa,Kendo omiyowa pi motimo sum mondo wamodhi,+Nikech waseketho ne Jehova.
15 Ne wageno yudo kuwe, to onge gima ne waneno,Ne wageno ni wabiro chango, to luoro maduong’ e ma omakowa!+
16 Faresene ma futo winjore koa Dan.
Sa ma giywak,Piny duto yiengni.
Gibiro ma gitiek piny kod gik moko duto manie iye,Dalano kod jo modakie.”
17 “Eri akelonu thuonde,Thuonde ma nigi sum ma ok nyal bo,Kendo gibiro kayou,” Jehova owacho.
18 Kuyo ma an-go ok nyal thiedhi;Chunya tuo.
19 Dwond ng’at ma ywak winjore koa e piny maborDwond nyar joga:
“Donge Jehova pod ni Sayun?
Donge ruodhe nie iye?”
“Ang’o momiyo gisewang’o iya gi sanamu maggi,Kaachiel gi nyiseche mag ogendni mamoko?”
20 “Keyo osekalo, oro oserumo,To pok oreswa!”
21 Chunya lit nikech chandruok ma joga* nigo;+Aywak kendo akuyo ahinya.
Luoro maduong’ osemaka.
22 Donge mo mar balsam nitie Gilead, koso?+
Koso jathieth onge kuno?+
Ang’o momiyo joga* pok ochango?+
Weche Moler Piny
^ Kata nyalo bedo, “ongo-wang’.”
^ Kata, “jogorou.”
^ Kata, “nyar joga.”
^ Kata, “nyar joga.”
^ Kata, “nyar joga.”
