Jeremia 39:1-18
39 E higa mar ochiko mar loch Zedekia ruodh Juda, e dwe mar apar, Nebukadnezar* ruodh Babulon kaachiel gi jolwenje duto nobiro Jerusalem, mi gilwore.+
2 E odiechieng’ mar ochiko dwe mar ang’wen, e higa mar 11 mar loch Zedekia, ne gimuko ohinga mag dalano.+
3 Eka jotend ruodh Babulon nodonjo e i dalano, mi gibet e rangach miluongo ni Rangach ma Diere.+ Jotelogo ne gin Nergal-shareza ma Ja-Samgar, Nebo-sarsekim ma Ja-Rabsaris,* Nergal-shareza Ja-Rabmag,* kod jotelo duto mag ruodh Babulon.
4 To ka ne Zedekia ruodh Juda kod jolwenje duto oneno gima nosetimore, ne giringo+ ma giwuok e dalano gotieno. Ne ging’ado puoth ruoth, mi giwuok gi rangach ma ne nie kind ohinga ariyo ka giluwo yo ma dhi Araba.+
5 To jolweny mag Jo-Kaldea ne olawogi mi gijuko Zedekia e paw Jeriko.+ Ne gimake mi gitere ir Nebukadnezar* ruodh Babulon ma noyudo ni Ribla+ e piny Hamath.+ Kuno e ma ne ong’adoe buch Zedekia.
6 Ruodh Babulon ne ochiko mondo oneg yawuot Zedekia koneno mana e Ribla kanyo. Bende, nochiko mondo oneg jotelo duto mag Juda.+
7 Eka ne otucho wenge Zedekia, kae to otueye gi nyororo mag mula, motere nyaka Babulon.+
8 Bang’e, Jo-Kaldea ne owang’o od ruoth gi ute ji,+ kendo ne gimuko ohinga mag Jerusalem.+
9 Kae to Nebuzaradan+ ma ne en jatend jorit, ne okawo jo ma nodong’ e dalano, jo ma ne odokne, kod ng’ato ang’ata ma pod ne ni kanyo, mi oterogi e tuech e piny Babulon.
10 Kata kamano, Nebuzaradan jatend jorit ne oweyo jo modhier e piny Juda ma ne onge gimoro amora. Chieng’no bende nomiyogi puothe mag mzabibu mondo gitiye.*+
11 To Nebukadnezar* ruodh Babulon ne ochiko Nebuzaradan jatend jorit e wi Jeremia niya:
12 “Dhi ikaw Jeremia kendo irite maber; kik itimne gimoro marach, to ne ni imiye gimoro amora mokwayo.”+
13 Omiyo, Nebuzaradan jatend jorit, Nebushazban ma Ja-Rabsaris,* Nergal-shareza ma Ja-Rabmag,* kod jodong ruodh Babulon duto ne ooro wach
14 mi ne ogol Jeremia e Laru mar Jarit.+ Ne okete e lwet Gedalia+ wuod Ahikam+ wuod Shafan+ mondo otere e ode. Kamano Jeremia ne odak gi ji.
15 E kinde ma Jeremia pod ne otue e Laru mar Jarit,+ wach Jehova nobirone niya:
16 “Dhi inyis Ebed-melek+ Ja-Ethiopia ni, ‘Ma e gima Jehova Nyasach oganda lweny, Nyasach Israel owacho: “Masira ma ne akoro ni adhi kelo ne dalani biro timore, kendo inine odiechiengno.”’
17 “‘To abiro resi chieng’no,’ Jehova owacho, ‘ok bi chiwi e lwet jo ma iluorogo.’
18 “Nimar abiro resi, kendo ok initho gi tho ligangla. Ngimani nobed ka gimoro miseyako e lwet wasigu,*+ nikech ne iketo genoni kuoma,’+ Jehova owacho.”
Weche Moler Piny
^ Iluonge bende ni Nebukadereza.
^ Yo machielo ma indikogi e dho Hibrania en, “Nergal-shareza, Samgar-nebo, Sarsekim, Rabsaris.”
^ Kata, “jatend ajuoke ma koro gi sulwe.”
^ Iluonge bende ni Nebukadereza.
^ Kata nyalo bedo, “mondo gitiye kaka wasumbni.”
^ Iluonge bende ni Nebukadereza.
^ Kata, “jatend jo ma tiyo e od ruoth.”
^ Kata, “jatend ajuoke ma koro gi sulwe.”
^ Kata, “ibiro reso ngimani e lwet wasigu.”
