Jeremia 18:1-23
18 Ma e gima Jehova ne owacho ne Jeremia:
2 “A malo, ilor idhi e od jachue-agulni,+ kendo abiro miyi wechena kuno.”
3 Kuom mano, ne adhi nyaka e od jachue-agulni, mi ayude ka ochueyo agulu e gir chuecho.
4 To agulu ma nochueyono ne okethorene. Omiyo, ne okawo lowono mi ochueyogo agulu machielo mana kaka ne odwaro.
5 Eka wach Jehova ne obirona niya:
6 “‘Yaye dhood Israel, donge anyalo timonu gima jachuechono timo ne lowo?’ Jehova owacho. ‘Neuru! Mana kaka lowo nie lwet jachue-agulni, e kaka un bende un e lweta.+
7 Ka awacho ni abiro pudho, muko, kendo ketho oganda moro kata pinyruoth moro,+
8 to bang’e ogandano olokore mi oweyo timbene maricho, an bende abiro loko pacha kuom masira ma ne adwaro kelonegino.+
9 To ka awacho ni abiro pidho kendo gero oganda kata pinyruoth moro,
10 mi ogandano otimo gik maricho e wang’a kendo gitamore winjo dwonda, an bende abiro loko pacha kendo ok abi timonegi gik mabeyo ma ne adwaro timonegi.’
11 “Omiyo, koro dhi inyis Jo-Juda kod jo modak Jerusalem ni, ‘Ma e gima Jehova owacho: “Aikonu gimoro marach, kendo achano kelonu masira. Akwayou, lokreuru mondo uwe yoreu kod timbeu maricho.”’”+
12 To ne giwacho niya: “Ok wanyal lokore!+ Wabiro luwo mana pachwa, kendo ng’ato ka ng’ato kuomwa biro luwo mana kaka chunye mopong’ gi richo dwaro.”+
13 E momiyo Jehova owacho kama:
“Akwayou penjieuru ogendni wachni.
Ng’ano mosewinjo gima kama?
Jo-Israel* osetimo gima rach moloyo.+
14 Be wi gode mag Lebanon motimo lwendni nyalo bedo ma onge pe adier?
To be pige mang’ich mamol koa ka mabor nyalo duono koso?
15 To wi joga osewil koda.+
Nimar gichiwo misengni ne gik manono,+Kendo gimiyo ji chwanyore e yoregi, e yore ma kweregi ne luwo chon,+Ka giwuotho e yore mogondore, kendo motimo buche.
16 Mondo giketh pinygi obed gima bwogo ji,+Ma ji biro liyo aliya koneno nyaka chieng’.+
Ng’ato ka ng’ato ma biro kalo machiegni biro bwok kuom gima oneno, kendo gibiro kino wigi ka giwuoro.+
17 Abiro keyogi e nyim wasikgi mana ka yamb ugwe.
Abiro lokonegi ng’eya, ok gibi neno wang’a chieng’ ma masira oyudogi.”+
18 To ne giwacho niya: “Biuru, wachanuru gimoro marach ne Jeremia,+ nimar chik ok bi lal ne jodolo, rieko ok bi lal ne jo mariek, kendo wach ok bi lal ne jonabi. Biuru, wahangne wach, kendo kik wachik itwa ne gik mowacho.”
19 A Jehova, akwayi ni iwinja,Kendo ichik iti mondo iwinj gima jo ma kweda wacho.
20 Be onego ochul ber gi richo?
Gisekunyona bur mondo anyumrae.+
Par kaka ne achung’ e nyimi ka anyisi weche mabeyo e wigi,Mondo kik ibed gi mirima kodgi.
21 Kuom mano, we mondo yawuotgi otho gi kech,Kendo chiwgi ne ligangla.+
Mad nyithi mondegi otho, kendo gidong’ mond liete.+
Mad masira malich oneg chwogi,Kendo yawuotgi bende otho e lweny.+
22 Nduru mondo owinj e utegi,E kinde mikelo jomonj kuomgi apoya.
Nimar gisekunyona bur mondo gimakaKendo gisechikona obadho mondo omak tienda.+
23 To in, A Jehova,Ing’eyo chenro duto ma gichano mondo ginega.+
Kik ium kethogi,Kendo kik iruch richogi e wang’i.
Mad gichwanyre e nyimi+Chieng’ mibiro nyisogie mirimbi.+
Weche Moler Piny
^ Kata, “Nyar Israel.”
