Fweny mar Johana 21:1-27
21 Eka ne aneno polo manyien gi piny manyien;+ nimar polo machon gi piny machon kargi ne oselal nono,+ bende nam+ koro ne onge.
2 Ne aneno bende dala malerno, ma en Jerusalem Manyien, ka lor piny koa e polo ir Nyasaye,+ kendo noseikore kaka miaha mobidhore ne chwore.+
3 Eka gikanyono ne awinjo dwol moro maduong’ moa e kom-lojno ka wacho niya: “Neuru! Hema mar Nyasaye koro nigi dhano, kendo obiro dak kodgi, mi ginibed joge. To Nyasaye owuon nobed kodgi.+
4 Kendo obiro yweyo pi wengegi duto,+ mi tho ok nobedie kendo,+ kata kuyo, kata ywak, kata rem ok nobedie kendo.+ Gik machon osekadho.”
5 To Jal mobet e kom-lojno+ nowacho kama: “Neuru! Aloso gik moko duto obed manyien.”+ Bende, owacho niya: “Ndik wechegi nikech gin weche migeno kendo madier.”
6 Eka nowachona niya: “Wechego koro osetimore! An e Alfa kendo an e Omega,* chakruok kendo giko.+ Abiro miyo ng’at ma nigi riyo pi ngima moa e soko nono.+
7 Ng’at molocho biro yudo gigo kaka pokne, anabed Nyasache to en nobed wuoda.
8 To jo moluor, gi jo ma onge yie,+ gi jo ma timbegi odwanyore, gi jonek,+ gi joterruok,*+ gi jo ma timo timbe-juok, gi jo ma lamo sanamu, kod jomiriambo duto,+ kargi nobed e ataro ma liel gi mach kod salfa.*+ Mani en tho mar ariyo.”+
9 Eka achiel kuom malaike abiriyo ma ne nigi bakunde abiriyo moting’o masiche abiriyo mogik,+ nobiro mowachona niya: “Bi, ananyisi miaha ma en chi Nyarombo.”+
10 Eka roho nomaka, kendo malaikano notera nyaka e got moro maduong’ kendo mabor, kae to nonyisa dala maler, Jerusalem ka lor piny koa e polo ir Nyasaye,+
11 kendo ka en gi duong’ mar Nyasaye.+ Ne orieny ka kidi ma nengone tek ahinya, kaka kidi mar jasper ma rieny maler.+
12 Dalano ne nigi ohinga maduong’ kendo modhi malo ahinya, bende ne en gi rangeye 12, gi malaike 12 e rangeyego, kendo e rangeyego ne ondikie nying dhoudi 12 mag nyithind Israel.
13 Yo wuok chieng’ ne nitiere rangeye adek, to yo nyandwat rangeye adek, kendo yo milambo rangeye adek, kendo yo podho chieng’ rangeye adek.+
14 Ohinga mag dalano bende ne nigi kite 12 mag mise, kendo kuomgi ne ondikie nyinge 12 mag joote 12+ mag Nyarombono.
15 Koro ng’at ma ne wuoyo kodano noting’o odundu mar dhahabu mipimogo, mondo opimgo dalano gi rangeyene kod ohingane.+
16 To dalano ne nigi bethene ang’wen ma romre, kendo duong’ mar borne ariwa romre gi lachne. Eka nopimo dalano kotiyo gi odunduno, to ne en chiegni kilomita 2,220;* borne ariwa gi lachne kod borne ka dhi malo, duto romre.
17 Ne opimo bende ohinga mar dalano, ne en bede 144* kaluwore gi pimo mar dhano, kanyachiel gi pimo mar malaika bende.
18 Koro, ohingano ne olos gi kite mag jasper,+ kendo dalano ne en dhahabu lilo, machal gi kio ma rieny.
19 Mise mag ohinga mag dalano ne obidh gi kit kite duto ma nengogi tek: mise mokwongo ne en kidi mar jasper, mar ariyo safir, mar adek kalkedo, mar ang’wen zumaridi,
20 mar abich sardonikso, mar auchiel sardius, mar abiriyo krisolait, mar aboro berul, mar ochiko topaz, mar apar krusopraso, mar apar gachiel huakintho, mar apar gariyo amethusto.
21 Bende, rangeye apar gariyogo ne gin kite 12 mag lulu; rangach ka rangach ne olos gi kidi mar lulu achiel. Kendo ndara maduong’ mar dalano ne en dhahabu lilo, ma chal gi kio ma rieny maler.
22 Ne ok aneno hekalu e i dalano, nikech Jehova* Nyasaye Manyalo Duto+ kod Nyarombo e hekalu mare.
23 To dalano ok dwar ler mar wang’-chieng’ kata dwe mondo orienyne, nimar duong’ mar Nyasaye e ma rienyne,+ kendo taya mare en Nyarombo.+
24 Kendo ler mare biro rieny e ndara ma ogendni wuothoe,+ kendo ruodhi mag piny nokel duong’gi nyaka e iye.
25 Ok bi lor rangeyene ngang’ godiechieng’, nimar kanyo otieno ok nobedie.+
26 Kendo ginikel duong’ kod luor mag ogendni nyaka e iye.+
27 To gima ochido kata ng’at ma timo gik modwanyore kod mag wuond ok bi donjo e iye ngang’,+ mak mana jo mondik nyinggi e buk modol mar ngima mar Nyarombo.+
Weche Moler Piny
^ Kata, “An e A kendo Z.” Alfa e nyukta mokwongo e dho Grik, to Omega e nyukta mogik.
^ Som Tiend Weche, “Terruok.”
^ Ma en kit poda moro ma mako mach mapiyo ahinya, kendo sa ma oliel ogolo tik mager kendo marach.
^ Stadia 12,000. Som Apendiks B14.
^ Chiegni mita 64. Som Apendiks B14.
^ Som Apendiks A5.
